Read idege AYỊSAYA 19 Bible Online

AYỊSAYA 19 - idege bible

AYỊSAYA 19

¹Ọlẹ ri ẹrụ ọlẹ ká Ohe Oluhye du chajị nya Ijipiti: Amkpaa wẹẹ wẹ Ijipiti, ọ wẹẹ tụ egbamwụ da lagaga warị. Ekpeku nya ala Ijipiti ka che kpákpaakpa ị-ịlahị nyamwụ, ala Ijipiti ayịdang ka gbu oje-oje.

²Amkpaa yẹkẹẹ, “M̀ ka tụ ala Ijipiti ahị ju awụlẹ, aanịna-aanịna ka da awụlẹ ẹwụ, angị kụ ẹpwa ba awụlẹ ka da awụlẹ ẹwụ, alepweji ọhẹ ka jahị da epweji ọkịla, ịdịrịhụ-ịdịrahụ ka ju ọngịrị nya ọpyị nyaa ọkpakpa ju.

³M̀ ka kpịla irya omeme nya ala Ijipiti ahị, ọkịlẹtụ ka kpaa enyi. Ị ka maga nyọka wo ẹla bwu ẹga nya ekpeku bala alegu bala alegino nyaa kị ka daa ụbwọ.

⁴M̀ ka ya ala Ijipiti ekpeleji nya ayịbaba ọlọngịrị ọhẹ ọlẹ kọ ri adịrahụ ọlọkwọ ọ-jẹ olujwo-ka. Am Amkpaa Agụgụ à ya ẹlẹwẹ lẹ.”

⁵Enyi nya Ihu ịNayịlị ka chị ẹhya pilotooo, gbee ká ihu ka nwụ kịrẹ-kịrẹ.

⁶Anyapa nya Ihu ịNayịlị nyi oru pwuu, ụka ka enyi ịlụwa juwa nwụ. etungkohyo bala egbiranyọ ịlụwa ka gbu womboo.

⁷Ang ịlẹ kị wu tụ ọnụ nya ịNayịlị da ka nwọnwụ bwụgẹ-bwụgẹ, ụtọ ị-kpa wu ang ịlụwa wuu ka dụwa kwangga.

⁸Angị kaa da urwe-enyi ụ-ụwa kpa hị, ka jida gbokiri. Angị kaa da ịkụja tụ angị kaa da ụbagala-á ka ye ụkụrwọ họ kpong-kpong kaka.

⁹Angị kaa nụ ịpwụ ka kụ abwabwọ, ị́ ka ye iwu ka.

¹⁰Alụkụrwọ nya ụbwọ tụ alịbańg datị-datị ka bwọ ayiiji, angị họ ụkụrwọ ye uri wuu ka kpụ ịlọgọ.

¹¹Alegbeju nya alepweji nya iSowan ri aluchi, angị jẹ ẹla gụgụ wuu Ijipiti juwa ju angịnyị irya uchi-uchi. Ọ ka jẹ-ẹ̀ byi adịrahụ ịwa nyị ri anyị ịtụma nya angị jẹ ẹla bala ịdịrịhụ nya alene myị wẹẹ-ẹ́?

¹²Adịrahụ nya Ijipiti ee, angị jẹ ẹla i-jung irya ji ale ji-ī? Ị wẹ kaka ya jeng ká jẹ ang ọlẹ ká Amkpaa me obyi nyọka họ ala Ijipiti mẹ-ẹ̀.

¹³Alegbeju nya ala iSowan ri aluchi, alegbeju nya iMemfisi la ịnyịnyị. Ịwa anyị kị ri ochirigogo nya ala Ijipiti, mwọọgịlẹ kpaa hwahị lẹ.

¹⁴Amkpaa kpịla irya nyaa ahị, ọ họ ala Ijipiti-í jẹ họ ẹlẹlẹhẹ ọrịrị ọgba kaka, ị juwa yata lala olere ọ-kọ ọnụ-eji kọ yata.

¹⁵Ọngọngọhẹ Ijipiti wuu, alụdụ tụ alẹbyahị á ka jẹ-ẹ̀ da ụbwọ i-iwe-ahụrụ nyaa ọwẹ kaka.

¹⁶Ụka juwa wẹ ká ala Ijipiti ka ju uhi huko-huko lala anyang. Ị ka che kpákpaakpa ụka kị yẹ ká Amkpaa Agụgụ á hu ụbwọ nyamwụ hwaa jahị daa nyọka yaa akama.

¹⁷Ala Ijipiti ka ju uhi nya ala iJuda lala ododo. Ị́ wo ẹnyị nya iJuda wo ụ-ụrụ lẹ, ị ka dapwụ hụ amẹ ọọ-lajị nya elego ọlẹ ká Amkpaa Agụgụ me obyi nyọka haa-a họ.

¹⁸Ụka ọọwa-á pwụ eji, epweji ịrụ ịhyẹ ọ-ọpyị nya Ijipiti ka juwa ká alụwa ka ba ẹla nya Amkpaa Agụgụ jẹ. Ị dọmwụ ka ya òja nya iHiburu hịlẹ-hịlẹ. Ẹnyị nya epweji ọhẹ ẹ-ẹpwụ nyaa ka ri “Epweji nya Ẹnụ”.

¹⁹Ụka ọọwa, ị ka me ogidi ọhẹ ha Amkpaa ẹ-ẹpwarịrị nya Ijipiti kpammkpa. Ị ka ya ẹjwọ ọhẹ weji o-oyi nya ọpyị nya Ijipiti nyọka chị ihi ju Amkpaa.

²⁰Ị ka ri ang-ẹjẹẹ nya ijata ojiji nya Amkpaa Agụgụ ụ-ụwa Ijipiti. Ụka ká aluji-í juwa taa pyịpyị, kị chị eko wụrụ Amkpaa, ọ ka du ọngọhẹ kele kaka da ụbwọ.

²¹Amkpaa ka chị ịlọmwụ ehe ha ala Ijipiti. Ị ka jọọ jẹ, ị ka gbịgba họọ bwula ọ-kpa ọhaha bala iya ọkịlaakịla wọọ. Ị ka myị ọnụ nya ang datị-datị ha Amkpaa, ị tị ka haa jịra ịnyịnyị.

²²Amkpaa ka yẹ ala Ijipiti akama, ọ tị ka haa uda. Ị ka yẹ irya da wẹ ẹga nyamwụ, ọ ka wo abwọ ọrịrị nyaa lẹ, ọ ka haa uda lẹlẹ.

²³Ụka ọọwa, ụgbẹyị-uche ọhẹ ka da bwu Ijipiti kaka ju ka Asiriya. Alọpyị imiimiiye ịwẹ ka tụ aha ka ọpyị nya awụlẹ. Ị tịtị ka gbịgba lawụlẹ ịnyịnyị.

²⁴Ụka ọọwa, Isirẹlụ bala Ijipiti bala Asiriya ka memeeme. Ịwa alọpyị ịtịta ịwẹ ka ri ahị ọwawa ha alodehe wuu.

²⁵Ụka ọọwa, Amkpaa Agụgụ ka wahị kụrwaa byaa yẹkẹẹ, “M̀ wahị kụrụụnụ anụ ala Ijipiti angịnyị nyam bala anụ ala Asiriya angịlẹ kam họhọ bala anụ ala Isirẹlụ angịlẹ kam chụchụ.”