Read idege AYỊSAYA 2 Bible Online

AYỊSAYA 2 - idege bible

AYỊSAYA 2

¹Ọlẹ ri ẹrụ ọlẹ ká Ohe Oluhye ya du Ayịsaya ọnyị nya Amọsị chajị nya iJuda bala iJerusalẹm.

²Ụka ká ẹnụtụrụ ịlụka ohyẹẹkpẹ ka pwụ eji, epweji ọlẹ kị nwụ Ube nya Amkpaa rịrị ka lehe gụ epweji ịkịla wuu. Ọ ka la gidogboo gụ ẹga ịkịla wuu. Alụma lụmẹ-lụmẹ ka mwụ tọọọ lala enyi ka ụwa.

³Alụma lụmẹ-lụmẹ ka byi awụlẹ yẹkẹẹ, “Anụ kẹwẹ kahị wule kele ka ọgbọdọ nya Amkpaa, kele ka Ube nya Ohe Oluhye nya ala Isirẹlụ[2] mẹ. Ọ ka mẹjẹẹhị jaabwọ kahị ka hịhị, ahị ka họ ang ọlẹ kọ ya ahị nyị họ.” Amkpaa kaa mẹ ehile nyamwụ jẹ bwu iJerusalẹm, Ị-ịSayọn ọọ ya ẹla ta angịnyị nyamwụ bwu lẹ.

⁴Ọ ka myị ẹla ịlẹ ká alụma datị-datị kpa ta awụlẹ lala ọngọleje nya alepwoja datị-datị. Ị ka go ige ị-kpa dẹwụ nyaa hyà alẹ ị-kpa wu ẹrụ, ị ka ya awangga nyaa hyà ịma ị-kpa ma ekeji ábwọ. Alụma ọhẹ-ẹ́ ka dẹwụ ta alụma ọkịla kaka. Ẹwụ ọ-mẹjẹ awụlẹ ka myị gbanggbang.

⁵Lẹẹlẹ, anụ ala Isirẹlụ ee, anụ kẹwẹ kahị jẹdịyẹ ẹ-ẹpwụ nya ahịgbọọ ọlẹ ká Amkpaa ya hahị mẹ!

⁶Amkpaa pwa anyị ịtụma nya iJekọbụ angịnyị nyamwụ lẹ, ị juwa mwụ ịnwa gbịla alọmwẹnụ-ụtụrụ bala ijiga ịkpụkpụ nya ala iFilisitiya. Átabwọ nyaa bala ịnya angị jẹ Ohe-ka á kewa ka.

⁷Ọpyị nya Isirẹlụ myị la okpoko onyowuru bala okpoko ịgọm, ụdụ ọkụkpụ nyaa-á la ọbaba ka. Anyịrẹ nyaa myị ẹga myị ẹga, ị́ ka jụ ang ịrụnyẹ nyaa wa kpa myị ka.

⁸Ịpyị nyaa ri ijiga-ijiga wuu, ịị gbịgba ha ekpeku-ekpeku ịlẹ kị kpa abwọ nya ịlaa họ.

⁹Ị ka chị oyoyi jwaa ọngọhẹ-ọngọhẹ, ị ka hu ẹpẹpẹ jwaa wuu. Amkpaa-á ka yaa chịng nya ang onyobyi ịlẹ kị họ ka!

¹⁰Ị kele kị kpịbaa ẹ-ẹpwụ nya ágbụ nya ajwọ ilikiti, kị ya ịlaa kpịbaa átajẹ ịlẹ kị chị chajị kị ka be hi ikẹjẹ-awụrụ nya Amkpaa bala ụmụmẹ bala ọngịrị nyamwụ mẹ.

¹¹Ẹnụtụrụ ọhẹ tị juwa wẹ ị-ịlahị, ẹnụ ọọwa, ọbọọchẹ ohihi nya angịnyị ehe ka myị. Ahị ohihi nyaa ka cheju, Amkpaa kẹnẹ-kẹnẹ ị ka hu hwaa ẹnụ ọọwa lẹ.

¹²Ẹnụ ọọwa ọlẹ ká Amkpaa Agụgụ hunọ, angị hi ọbọọchẹ kpịlaa ka uhye tụ angị hu ịlaa kombooo wuu, Amkpaa Agụgụ ka pwaa ọmwụ cheji.

¹³Amkpaa ka tụrụ ekeji nya isida ị-la uhye jọngjọng ịla iLibanọn bala ekeji nya ooku ịla ịBachan wuu.

¹⁴Ọ ka bwuru ịgbọdọ iluhye wuu tụ ikiti ịlẹ kị la kuu wuu, kị ka la pẹẹpẹẹ.

¹⁵Ọ ka tụrụ ebe iluhye wuu, bala egwalọ ịnyịịngịrị wuu.

¹⁶Ọ ka họ ká agbọ nya enyi ịtụka ị-kpa da ọhị tụ agbọ nya enyi ị-há ụhị wuu ka yẹ byi-enyi kpá gbanggbang.

¹⁷Ẹnụtụrụ ọhẹ tị juwa wẹ ị-ịlahị, ẹnụ ọọwa, ọbọọchẹ ohihi nya angịnyị ehe ka myị. Ahị ohihi nyaa ka cheju, Amkpaa kẹnẹ-kẹnẹ ị ka hu hwaa ẹnụ ọọwa lẹ.

¹⁸Angịnyị-ehe ka yụbwọ la ijiga ọkpụkpụ beji, kị ka taa ayịreji gbanggbang.

¹⁹Ụka ká Amkpaa ka wẹ kaka hụ́ odehe ọlẹ jigjigi, angịnyị ka rụ ka kpịbaa ẹ-ẹpwụ nya ágbụ nya ajwọ ilikiti, ị ka ya ịlaa kpịbaa átajẹ, chajị kị ka be hi ikẹjẹ-awụrụ nya Amkpaa bala ụmụmẹ bala ọngịrị nyamwụ.

²⁰Ẹnụ ọọwa-á pwụ eji, ị ka pẹhi ekpeku nya okpoko ịgọm bala okpoko onyoowuru ịlẹ kị họ kị kaa gbịgba ha chị e-eji ha ijiga bala erwo.

²¹Ụka ká Amkpaa ka wẹ kaka hụ́ odehe ọlẹ jigi-jigi, angịnyị ka rụ ka kpịbaa ẹ-ẹpwụ nya apewa nya ajwọ, bala ẹ-ẹpwụ nya ágbụ nya ikiti i-ju ajwọ, chajị kị ka be hi ikẹjẹ-awụrụ nya Amkpaa bala ụmụmẹ bala ọngịrị nyamwụ.

²²Ānụ dahịhile ọngịnyị ehe olinyi e-egbeju koo, ịhụ ọ-da pweepwee nyamwụ ọwẹ kẹnẹ-kẹnẹ mẹ ịnyị. Ọ́ ka da ọngọhẹ ụbwọ myị ka.