Read idege AYỊSAYA 21 Bible Online

AYỊSAYA 21 - idege bible

AYỊSAYA 21

¹Ọlẹ ri ẹrụ odudu chajị nya ọpyị nya ịBabịlọn[5]. Jaabwọ ká ugbochịrị kaa da bwu edii, ịnyịnyị-ịnyịnyị akama à wẹẹ wẹ bwu ọpyị oluhi-uhi lẹ.

²Ọyị kam yẹ-ẹ̀ wẹ-ẹ́ ri nya ẹla ọnyịịla koo, ọ-pịrị ha juwa wẹ, ang ọwụwụ kpa rụ, ang ọ-ta ayịreji. Angịdẹwụ nya ala Elam ee, anụ kịnyaa lẹwụ ọdada, angịdẹwụ nya ala iMidiya ee, anụ kele kaka chị urwe yaa dada mẹ. Akama ịlẹ wuu ká ala ịBabịlọn yẹ angịnyị lẹ, Ohe Oluhye ka ya ukpotu nya ọọwa tu ugbẹnyị lẹ.

³Uhi ojuju nya ang ịlẹ kam yẹ-ẹ̀ wẹ rum lẹtẹ-lẹtẹ, ẹla ịlẹ kam wo kpam ẹkpa tudu eji lala ọnyang à hya ụma nya ọnyị ọmama.

⁴Egbeju nyam dọrị, uhi hụm kpẹkẹ-kpẹkẹ, m̀ ya obyi ā hi kam nune mẹ, obyi ọọwa tị lam lala ododo.

⁵M̀ yẹ kị lalẹẹ la ọhụhụ ọtụka-ọtụka, ị hị ọba da ha angga, ị lalẹẹ ri, ị lalẹẹ nwa. Alegbeju nya ẹwụ, anụ wuleji me oo! Anụ go akụmada nyanụ kpa giri-giri mẹ.

⁶Ọọwa, Ọngọlahị à byim yẹkẹẹ, “Chụ ọngọgbeji ọhẹ kụ, kọ ka ya dodehe ang myị ang ọlẹ kọ yẹ.

⁷Ó-ri kọ yẹ alẹng kị juwa kụ anyịrẹ warị angị imiiye angị imiiye, ká angịkịla juwa kụ ibyiyó bala anyịrẹ-ịkamẹlụ aalẹ, ọ kpẹhị chịng, kọ wụlayẹ yẹẹyẹẹ mẹ.”

⁸Ọọwa, ọngọgbeji à dakọ gboo yẹkẹẹ, “Ayịbam ee, am̀ ẹ-ẹga o-gbeji nyam m̄ kụ lẹẹ tụ odu tụ ẹnụ lẹ.

⁹Ugbẹnyị lẹ, m̀ yẹ alẹng u-uhye nya anyịrẹ kị juwa tụ awụlẹ da angị imimimiiye warị!” Ọọwa, ọngọhẹ à dakọ gboo yẹkẹẹ, “Ẹhẹẹ, ịBabịlọn ta ayịreji lẹ oo! Ọ ta ayịreji lẹ. Ekpeku nya ijiga ịlẹ ká alụwa kaa kpụ eteji ha wuu tụrụ bwụjẹ-bwụjẹ chị ị-ịpyị lẹ!”

¹⁰Anụ ala Isirẹlụ angịnyị nyam ịlẹ kị hịrịịnụ jaabwọ kịị hịrị ajẹ nya ang ee, ẹla ọlẹ kam wo bwu ẹga nya Amkpaa Agụgụ Ohe Oluhye nya ala Isirẹlụ, m̄ ya dodehe jenu-ù wẹ lẹlẹ.

¹¹Ọlẹ ri ẹrụ odudu chajị nya ọpyị nya Ẹdọm. Ọngọhẹ be ẹkọ tọm wo bwu Ẹdọm yẹkẹẹ, “Ọngọgbeji ee, odu ohihi tị́ jẹ ba ányị-ị̀ wẹẹ? Ya jem wẹẹ, ahị juwa ka pyẹ lẹka-á?”

¹²M̀ wẹ byoo yẹkẹẹ, “Ahị juwa ka pyẹ lẹ, odu tị juwa ka hi wẹẹ-ẹ̄. Ọ́ háng ká ka towo, à ka mwẹẹkpẹ warị myị.”

¹³Ọlẹ ri ẹrụ odudu chajị nya Arebyiya. Anụ ala ịDẹdan ịlẹ kanụ chịkụ u-ugbileji nya Arebyiya logu ẹdịyẹ nya iru nya anyịrẹ nyanụ,

¹⁴anụ ya enyi ha angịlẹ ká imyi-enyi nwụ, kị wẹẹ wẹ ẹga nyanụ. Anụ ala ịTẹma ee, anụ ya ang oriri ha angị la edawụ ka.

¹⁵Angịwẹ juwa rụnyẹ rụ hi ẹwụ, nyọka be hi oge nya ẹwụ bala ịcha ịlẹ ịnọ kị ka chaa bala ọgbẹwụ ọ-chị ila.

¹⁶Ọọwa Ọngọlahị à byim yẹkẹẹ, “Ụka kọ nọ lala ẹka lẹpwụ-lẹpwụ, ehe ọlala nya ala ịKẹdaa ka myị.

¹⁷Angị kaa da ịcha lá ka i-ju ugbodu angị ịmanyị-ịmanyị nyaa-à ka hi lẹ. Am Amkpaa Ohe Oluhye nya ala Isirẹlụ à ya ẹlẹwẹ lẹ.”