Read idege AYỊSAYA 22 Bible Online

AYỊSAYA 22 - idege bible

AYỊSAYA 22

¹Ọlẹ ri ẹrụ odudu chajị nya Ọkpọọ nya Ọyị Ọyẹyẹ. Ẹlẹhẹ ji le? Anyị tị́ ká ẹpwayịrẹtẹ nya ẹpwang nyanụ ānụ wẹẹ la ọhụhụ-ụ̀?

²Epweji wuu hụ jigi-jigi lẹ, ọmọnyọ bala ịgbụ ọrụrụ pyàáà yịrị eji yịrị. Angịnyị nyanụ ịlẹ kị nwụ-ụ̀ wẹ-ẹ́ gbu ọ-ọgbẹwụ ka, ụụka kị juwa dẹwụ ị nwaa ka.

³Alegbeju nyanụ wuu tị́ rụnyẹ rụ, ị waa pyẹẹpyẹ̀ẹ̀pyẹẹ la ọ-dẹwụ da lẹka, anụ angị ihihi rụnyẹ mwụ ata bịmwụ kpá nanaana lẹ, ị tị́ kunu kaka wu kpa rụ nya alagba lawụlẹ-awụlẹ.

⁴Anụ bahim kam jida mẹ, kam jida onyuujujwo chajị nya angịnyị nyam ịlẹ kị gbu, ānụ kam ida koo.

⁵Ahyu! Ẹbyị à họ alẹ lẹẹ-ẹ́ẹ̀! Ụka ọlẹ ri ụka nya uko ọchịchị ọtụka, oyoyi bala ojigi-jigi ọtụka ká Ọngọlahị Amkpaa Agụgụ kpa warị chịhị ọgụ wẹ Ọkpọọ nya Ọyị Ọyẹyẹ. Ị tụrụ egwalọ nyahị beji kpalị-kpalị wuu, eko onyoowuru nyahị pwụ ịgbọdọ.

⁶Angịdẹwụ i-bwu Elam kụ anyịrẹ bala ang ịrụnyẹ nyaa warị lịcha bala eda. Ala iKii go akụmụda nyaa kụ giri-giri.

⁷Ọkpọọ ịnyịịla ịla iJuda wuu ri ang ịrụnyẹ yịrịtịtịịtị, ị chụ angị kpa anyịrẹ dẹwụ kụ gagaaga ogirigba i-bwu ka iJerusalẹm.

⁸Egwalọ ị-chẹwụ ke iJuda tụrụ hụrụ lẹ. Ẹnụ ọọwa, anụ jahị kpata da ka ẹga ọ-ya ang-abwọ nya ẹwụ kpịbaa.

⁹Anụ yẹ jaabwọ ká egwalọ nya Epweji nya iDevidi bene ẹ-ẹga lụmẹ-lụmẹ. Anụ wu enyi ọlẹmwụ oleji kụrụ.

¹⁰Ụka kanụ wụla ebe ịla iJerusalẹm yẹ, anụ tụrụ ịhyẹ nyọka gba ajwọ nyaa kpa me ugulọ nya epweji kọ ka la gogo.

¹¹Anụ me irim o-wu enyi kụrụ ọtụka ọhẹ ju eji, ká enyi o-bwu ẹmwụ-enyi onyogo ka mwụ ju kele. Ánụ tị kpahị kpa nya Ohe Oluhye ọlẹ kọ me obyi nyamwụ gbalẹ-gbalẹ, bala ọ-họ kọ jẹ lịnyị ka.

¹²Ọngọlahị Amkpaa Agụgụ à wụrụụnụ ụka ọọwa nyọka jida bala ọ-bida, kanụ ka pwọ inyi nyanụ bala ọ-ka duru apwụ nya owuru ọkpakpa lẹ.

¹³Anụ tị mwọọgịlẹ chị ọkẹkẹnị hụlọ ahụ chama-chama. Anụ nwụ ịkpịlọ bala ịna ri, juwa nwa ere lẹ, ānụ juwa byi awụlẹ yẹkẹẹ, “Āhị ri ang bala ọ-nwa ere jaabwọ kọ haahị alẹ mẹ, chajị ijuju ahị ka gbu myị!”

¹⁴Ọngọlahị Amkpaa Agụgụ lịlọmwụ ya ẹla tam yẹkẹẹ, “Ḿ ka hịnyọhi ọhọbịrị ọwẹ kị họ-ọ̀ wẹ kpá lọhịhị nyaa kaka. Am Ọngọlahị Amkpaa Agụgụ à ya ẹlẹwẹ lẹ.”

¹⁵Ọngọlahị Amkpaa Agụgụ byim am nyị kele ka ẹga nya iChebuna olegbeju nya ẹpwa nya adịrahụ kaka byoo yẹkẹẹ,

¹⁶“IChebuna ee, oowo kpong-kpong ā tị́ byi ịlọng ká ri? Oowo tị́ ya iwe hang nyọka wu iworu da ha ịlọng gbịlẹ-gbịlẹ ẹ-ẹjwọ ọlọka nya ikiti ẹga kịị ju ịdịrịhụ eji-ì?

¹⁷Wo mẹ, á ri ọngọtụka ri, Amkpaa tụbwọo ka wung pyẹẹ, dang ẹjwọ daarụ pwụrụm lẹẹ.

¹⁸Ọ ka wang ju nmini-nmini, hung da ẹjwọ lala òló kele ka ọpyị ọtụka ọhwẹ̀ẹ ọhẹ. À ka gbu ụ-ụwa chahị ju ang ịrụnyẹ ịnyịịla nyang ịwụ ká kaa kpa hi ahị. Ọngọ kpa oyoyi kịla ayịbamwụ ā ri lẹ!

¹⁹Amkpaa ka nung ụkụrwọ, pwọng ọmwụ cheji bwu iwe-ahụrụ nyang ọwẹ.”

²⁰Amkpaa byi iChebuna yẹkẹẹ, “Ụka ká ẹlẹwẹ-ẹ́ họ jịra, m̀ ka du kaka wụrụ Eliyajim ọnyị nya iHilikaya.

²¹M̀ ka pwọng awụrụ kụrwọọ, ya ugba ọchọhị nyang chọọ ọ-ọhị, kam ka ye ọngịrị bwu ụbwọ nyang họọ. Ọọwa, ọ ka kpẹhị rịrị lala adịda nya ala iJerusalẹm bala iJuda lẹlẹ.

²²M̀ ka ya ọngịrị nya ẹhị ọ-kpa rịrị ẹpwa nya iDevidi jwoo ụ-ụbwọ. Ọwa-à ka kpa ịgbọgọlọ nya ụkụrwọ ọlụwa lẹ. Ang myị ang kọ wụrụ lẹ, ọngọngọhẹ-ẹ́ ka tọọ ku kaka. Ang myị ang kọ tị tuku lẹ, ọngọngọhẹ-ẹ́ ka wụrwọọ kaka.

²³M̀ ka yọọ ẹtụ rịrị e-eji giri-giri jaabwọ kị kaa ya iloo wu eji. Ọọwa, ọ ka kpa ihi ọlala wẹ ugbiyegu nyamwụ wuu lẹlẹ.

²⁴Aanamwụ wuu tụ angịlẹ kị hụ tọọ ka dodo bọọ wuyooo jaabwọ kịị ya ịchụ pịlẹ ojawụlọ. Ọ ka kpa olo nyaa wuu.

²⁵Ẹnụ ọọwa-á pwụ, ilọọ ọlẹ ịnyị kị ya gu ang giri-giri ene-ene-è wẹ ka gba deeji. Olo ịlẹ kị do pịlọọ ene-ene ka chị ori kpuru hyoo.” Amkpaa-à ya ẹlẹwẹ lẹ.