Read idege AYỊSAYA 23 Bible Online

AYỊSAYA 23 - idege bible

AYỊSAYA 23

¹Ọlẹ ri ẹrụ odudu chajị nya ịTaya. Anụ angị ju agbọ nya enyi ilihu ọtụka ee, anụ be ẹkọ ida mẹ! Ị ta epweji nya ịTaya ẹga o-wu agbọ nyanụ godayị ayịreji kpá lẹ! Oja ọlẹ kanụ wo ụka kanụ-ụ̀ jẹ nyà bwu ịSayịpịrọsị wẹẹ ri nya ịlẹhị.

²Anụ alọnụ-enyi, anụ bida lọnụ ujuji, tụụnụ anụ alọhị ịla ịSayịdọn, alọhị nyanụ kaa jẹ kpoye nya ihu

³tụ enyi ịtụka da. Ị kpa ambakpa kaka ra Ijipiti, ị rara bwu ụwa kpa wanụ. Anụ à ri ube nya ihi nya alodehe wuu lẹlẹ.

⁴Ahụ epweji ọtụka nya ịSayịdọn, oyoyi jung lẹ-ẹ! Ihu ọtụka bala ụjẹ-ẹmwụ ya ịnyamwụ dodehe yẹkẹẹ, “Aḿ hya ụma nya ọnyị ọmama ẹnẹhẹ lẹka, ḿ ma anyị alẹng ẹnẹhẹ lẹka, ḿ tị ma anyang ẹnẹhẹ lẹka ịnyịnyị.”

⁵Oja nya ayịreji ọtata nya ịTaya-á wo ala Ijipiti ọyị, ị ka yụbwọ bọnụ.

⁶Anụ alọnụ-enyi, anụ be ẹkọ ida, kanụ rụnyẹ kpa ịlọnụ be kele ka ịTaachichi lẹ.

⁷Ahyu! Anụ ya ká epweji nya ịTaya ẹga ọ-yụya, epweji o-bwu orogo-orogo ọlẹ à lẹẹ wẹẹ-ẹ́? Epweji kpá kọọ dụ angịnyị kaka cheji ẹpwa hwẹẹ ọ-ọpyị datị-datị.

⁸Oowo kpá à tị́ me obyi nya akama ọlịịwẹ da epweji ịTaya? ỊTaya ịnọ ri epweji nya ịdịrịhụ, alọhị ịlụwa wuu ri ịdịrịhụ-ịdịrịhụ, ịwa ịnọ à rị alọhị ilihi-ihi gụ odehe wuu lẹlẹ.

⁹Amkpaa Agụgụ à me obyi ọọwa lẹ. Ọ họ ịnyị nyọka mwụ ọbọọchẹ nya alụwa ẹhị eku, bala ọ-ka hu ẹpẹpẹ ju alihi ịtụka nyaa.

¹⁰Anụ ala ịTaachichi, anụ wu ọpyị nya ịTaya nyanụ wuu ẹrụ lala ala Ijipiti mẹ, ang ọ-ka chẹwụ keenu á ji ugbẹnyị kaka.

¹¹Amkpaa hu ụbwọ nyamwụ hwaa yahị da ihu, ọpyị nya alụma datị-datị hụ jigi-jigi. Ọ da hile tụ ọpyị nya iKenan pyịpyị nyori ebe nya ihi ịlẹ kị ri ọngịrị nya alụwa ka ta ayịreji.

¹²Amkpaa ya ẹla rụ epweji nya ịSayịdọn yẹkẹẹ, “Anụ ala ịSayịdọn ee, ọkẹkẹnị ọchịchị nyanụ cheju lẹ, ọtụpyịpyị ka ji ha angịnyị nyanụ lẹ! Anụ wuleji, kanụ rụ kpoye kele ka ịSayịpịrọsị mẹ-ẹ̀, ánụ ka ye okpunyi ụ-ụwa ka ịnyịnyị.”

¹³Anụ kụ ẹhị yẹ ọpyị nya ala ịBabịlọn wẹẹ, oowo à tị́ wo ẹnyị nyaa alẹ wẹẹ? Ala Asiriya mwẹla taa, ta ẹga myị ẹga ayịreji. Ịyo ịlẹpwamẹ à kụ egwawụ nyaa-à wẹ lẹlẹ. Ị me ebe iluhye ịlẹ kị kụ chị urwe ya ụwa dada, tụrụ ebe ịnyịịngịrị ịlụwa beji, pẹhi ụwa kpụ egwawụ-egwawụ.

¹⁴Anụ agbọ nya enyi nya ala ịTaachichi, anụ be ẹkọ ida, epweji ọtụka ọlẹ kanụ kpụnịrọ ta ayịreji lẹ!

¹⁵Ụka wẹẹ wẹ kị ka deeri nya ịTaya ẹka iwo irwiye gbẹgbịlẹ jaabwọ ká adịrahụ kaa ri ehe kaka ba. Ẹka ịịwa-á myị kpá epweji nya ịTaya ka lala ọlakpara ọlẹpwụ nya eje ọlẹ:

¹⁶“Ọlakpara ọlẹ ká ọngọhẹ-ẹ́ kpịtịya ka ee, hu ogum̀ nyang ka ga tụ epweji da, du ogum̀ ọwẹ lala ọnggwọ, ká mwu iru nya eje nyang, chajị ká angịnyị ka kpịtịya nyang mẹ.”

¹⁷Ẹka iwo irwiye ịwẹ-ẹ́ chịpwụrụ kpá, Amkpaa ka ba hi ịTaya kọ ka tịrẹkpẹ kaka da ọhị onyogo nyamwụ. Ọ ka juwa kpa ịlọmwụ da alụma ọnyị myị ọnyị nya odehe ọlẹ igu.

¹⁸Ị tị ka hu okpoko ọlẹ kọ ka la bwula ọhị nyamwụ wuu ha Amkpaa. Ị́ ka tụ ang bọọ kpịrẹ-kpịrẹ nọ a-ang ka, ị ka kpa ra ang oriri bala ang ịkụrụ-kụrụ ịlahịchịng ha angị kaa gbịgba ha Amkpaa.