Read idege AYỊSAYA 24 Bible Online

AYỊSAYA 24 - idege bible

AYỊSAYA 24

¹Anụ yẹ mẹ, Amkpaa juwa ka ta odehe ayịreji, tụ hyoo kpụ egwawụ-egwawụ. Ọ ka pyị odehe anyoko, nyi alodehe epepe yịrị ẹga yịrị.

²Ẹbyi ọlẹ kọ ka họ igbodiya, ọwa-à ka họ angịkiliya lẹ, jaabwọ kọ ka la ọnyọhị, ọ ka la ayịbamwụ lẹ, jaabwọ kọ ka la ọnchẹ ọnyang, ọ ka la ayaamwụ lẹ, jaabwọ kọ ka la ọngọ ra ang, ọ ka la ọngọ ya ang ra lẹ, jaabwọ kọ ka la ọngọ ya okpoko ju ohi, ọ ka la ọngọ kpịla ang kpịla lẹ, jaabwọ kọ ka la ọngọ ya ang kpịla, ọ ka la oluri lẹ— ẹẹla ọ-la ahụ hi ọrụ ka.

³Odehe ka bịrị chịkẹ-chịkẹ, yẹ ịkpangkachị, Amkpaa-à ya ẹlẹwẹ lẹ.

⁴Ịpyị pyị kpịịlẹẹ, gbu womboo, odehe hi kanggbaa, gbiri-gba, uhye-ọgba bala eji gbu ba wuu lẹ.

⁵Angịnyị ju odehe ibyi bwula okpoye nya ehile nya Ohe Oluhye, tụ hi ọmẹjẹ nyamwụ deeji, bịrị iro o-gbe oyi myị oyi ọlẹ kọ nwa taa.

⁶Lẹ, ọlọ nya Ohe Oluhye wu odehe lẹ, alodehe juwa ye uri nya ang onyobyi ọlẹ kị họ, ila juwa ba alodehe, angị ihihi la wure-wure.

⁷Alakọnụ gbu womboo, ị́ ji nyọka kpa họ ere kaka, angị kaa yụya hụlọ ahụ pyàáá-à juwa chị ị̀pyọ́.

⁸Eje nya ọkẹkẹnị ọlẹ kịị du ịchẹchẹ ju kpụba, ịgbụ nya ọkẹkẹnị ịlẹ kịị rụ ba kpá chochoocho, ị́ du ogum̀ myị kaka.

⁹Eje o-mwu kpa ere nwa myị, ere la angị nwanwa ujujwo lala ụpyị lẹ.

¹⁰Ojigi-jigi kpeji e-epweji lẹ, ọngọ myị ọng tụ ụgbẹyị nya ube nyamwụ kụ.

¹¹Angịnyị ya eko kpọnụ o-opeje, chajị ere-é ji kaka. Ọkẹkẹnị ọchịchị cheju gbanggbang lẹ, ọ myị hi ọpyị lẹ.

¹²Epweji kpụ egwawụ-egwawụ, ị be ogirigba ịlụwa wuu ene.

¹³Jaabwọ kọ ka la ẹ-ẹpwụma ọnyị myị ọnyị tụ odehe ọlẹ wuu da à wẹ lẹlẹ. Ọ ka lala ụka nya egbe ọhyahya, ụka kị hya egbe nya olivu kpá, lee jaabwọ ká alakọnụ ịmanyị-ịmanyị kaa chị ọmwụ beji ụka kị hyaa kpá.

¹⁴Angị hi lọhịhị ka hu mwu eje nya ọkẹkẹnị, alọmwẹnụ-obyi ka ya dodehe, jaabwọ ká Amkpaa lụmẹ kaka ba.

¹⁵Alọmwẹnụ-ụtụrụ ā ka gwogbo ha Amkpaa, angị kụ ọnụ-enyi wuu ā gwogbo ha Amkpaa Ohe Oluhye nya ala Isirẹlụ.

¹⁶Bwu ọbaba nya odehe ọlẹ wuu ahị ka wo eje nya ogbo ogwogwo kị juwa mwu ha Ohe Oluhye ọlabwẹla ọnyịịla. Am tị lẹ, ajẹ chịm pwuuu! M̀ jida chị ka ẹpwụ-ẹpwụ, chajị angị pịrị angịnyị ha wẹẹ kịnyaa la ọ-pịrị angịnyị ha kịlahị-ịlahị.

¹⁷Anụ alodehe, anụ wo mẹ, uko-ò wẹ kanụ ka chị, ị chị ajẹ bala ọ-da anya wẹ gbenu.

¹⁸Ọngọ ka maga nya ụnyẹ ọrụrụ hi ang oluhi-uhi ka chabwọ kpụ ụjẹ, angị be bwu ụjẹ myị tị ka pụ ẹpwụ nya ụnya. Ị wụrụ iwindo nya akama da dodo bwu uhye-ọgba lẹ, itiwe nya odehe ka hụ kpuka-kpuka.

¹⁹Odehe bịrị kpá ju elego lẹ, ọ hụla hi awụlẹ kpá hwẹẹhwẹẹ lẹ, ojigi-jigi ọtụka kpeji lẹ.

²⁰Odehe gu gbaagbaagbaa lala olere, juwa yẹjii lala igbachịwụ à da ụdaa. Olo nyang onyobyi olodehe yọọ jii lẹ, ọ́ mileji lẹ, ọ́ ka wuleji kpá ẹnẹnẹhẹ kaka.

²¹Ẹnụ ọọwa, Amkpaa ka yẹ ịngịrị iluhye-ọgba akama, ọ ka yẹ ịdịrịhụ ilodehe akama ịnyịnyị.

²²Ohe Oluhye ka tụ ịdịrịhụ kpilo lala alagba ụ-ụjẹ, ọ ka jwaa agba ẹ-ẹpwụ nya ụjẹ, gbee da ka ẹnụ kị ka ya eje waa, yaa akama.

²³Ọya ka họ kudu-kudu, ẹnụ-ụ́ ka chị ahịgboo-ò ji ka. Amkpaa Agụgụ à ka ri adịrahụ lẹ. Ọ ka ri adịrahụ i-iJerusalẹm ọ-Ọgbọdọ nya ịSayọn, alegbeju ka yẹ ụmụmẹ nyamwụ.