Read idege AYỊSAYA 25 Bible Online

AYỊSAYA 25 - idege bible

AYỊSAYA 25

¹Amkpaa ee, ahụ a ri Ohe Oluhye nyam lẹ. M̀ ka jung ihi bala o-gwogbo ha ẹnyị nyang, à họ ang ịlẹbyẹbyi, obyi ịlẹ ká me gbalẹ-gbalẹ lẹ, à haa jịra kpẹẹkpẹẹ wuu.

²À yẹ epweji ịtụka la ọtẹwụụ, a ta epweji ịlẹ kị me egwalọ dagaga ju ayịreji. Ẹpwa nya ịdịrịhụ nya aluji nyahị ta ayịreji lẹ, ị́ ka maa nwụ kpá ẹnẹnẹhẹ kaka.

³Lẹẹlẹ, alẹpwụma ịlọngịrị ka gwogbo hang, alepweji ịlẹpwụma i-jujwo nya angịnyị ka kà ju uhi nyang.

⁴À ri ẹga ọkpịbaa ha alẹbyahị, ewu ọ-chị ke ha angị la ọbaba ẹ-ẹpwụ nya akama, à ri ụdaa o-ke ọngịnyị hi igbachịwụ bala ụrụrụ o-ke ọngịnyị hi ọchịpwuu. Ọtụpyịpyị o-bwu ẹga nya aluji lala igbachịwụ ọlẹ kọọ mịla ugulọ nmoo,

⁵ọ lala ọchịpwuu nya ọlọpyị ọchọrụ. Ahụ Amkpaa tị tụ aluji nyahị ọnụ pịrị, ụkwa ọchịchị nya aluji nyahị kpụba, jaabwọ ká egbamwụ kaa kpụ ọchịpwuu ba.

⁶Am̀ u-uhye nya Ọgbọdọ nya ịSayọn ẹgẹlẹ Amkpaa Agụgụ a nwụla ang oriri nya angị la ihihi nọ ha alepwoja ilodehe wuu lẹ. Ọhụhụ ọọwa ju ang oriri ịlahịchịng bala ere ọ-hagụ wuu ẹ-ẹpwụ.

⁷Am̀ u-uhye nya ọgbọdọ ẹgẹlẹ Amkpaa ka nwụla apwụ nya ọjụjụ ọlẹ kọ daba rị angịnyị wuu. Ọ ka nwụlọọ hi alẹpwụma nya odehe wuu.

⁸Ụka ọọwa, Amkpaa Agụgụ ka ta igu ayịreji pyịyọọ! Ọ ka yịlẹ egbejida hi ahị nya ọng myị ọng wuu, ọ ka hu oyoyi bala ẹpẹpẹ ohu ju angịnyị nyamwụ wuu kpa rụ hyaa am odehe ọlẹ wuu, chajị Amkpaa a ya ịnyị lẹ.

⁹Ẹnụ ọọwa, angịnyị wuu a ka ya dodehe yẹkẹẹ, “Anụ yẹ mẹ, Ohe Oluhye nyahị a lẹẹ lẹ! Ahị dahịhiloo lẹ, ọ chịhị da. Ọwa-à ri Amkpaa lẹ. Ahị dahịhiloo. Lẹẹlẹ, āhị chị ọkẹkẹnị juwa yụya chajị nyọlẹ kọ chịhị da mẹ.”

¹⁰Ụbwọ nya Amkpaa ka wẹ kaka kpẹhị rịrị Ọgbọdọ nya ịSayọn. Ma ị tị ka kụrụ ala iMowabụ chẹẹchẹẹ jaabwọ kịị pẹhi ajeyi kịị yẹ la ọtẹwụụ.

¹¹Ọ ri nya ịlẹhị ala iMowabụ ka pyẹ abwọ nyaa maa jaabwọ ka angị da awa kaa pyẹ abwọ nyaa dẹẹ ụka kị ka da awa.

¹²Ugulọ nya ajẹ ọ-chị yẹ epweji nyanụ dada la uhye lụmẹ ha ka gbeng, ma ị tị ka tụrwọọ ju eji, bene pwụrẹ-pwụrẹ.