Read idege AYỊSAYA 27 Bible Online

AYỊSAYA 27 - idege bible

AYỊSAYA 27

¹Ẹnụtụrụ ọọwa Amkpaa Ohe ka kpa ema nya ẹwụ nyamwụ ọlẹ kọ myị la ọngịrị, ọlẹ kọ la uhihi bala ochila lụmẹ ye ugbiriyo akama, ilo ọlẹ kọ kaa huhu bala ilo-enyi ọlẹ kọ ju achwo bala ata ọlẹ kii wuru dragon bala ọ-ka nwụ ugbiriyo-ọtụka ohe ọlẹ kọ no-epwa ẹpwụ nya Ihu ọtụka.

²Ẹnụtụrụ ọọwa, anụ ka mwu eje rụ ẹrụ nya alakọnụ ọnyịịla.

³“Am Amkpaa a ri ọngọ kpẹhị rịrị ẹrụ ọlẹ le. Ụka wuu m̀ kaa kpa enyi jwoo. M kaa gboo lodu bala alẹnụ, chajị ka ọngọngọhẹ-ẹ́ ka jwọọ họ ịngịngịhyẹ myị ka.

⁴Ikẹjẹ-awụrụ nyam ta ala Isirẹlụ myị lẹ. Ó-ri ká ejwo ịhyẹ juwa nyọka gwaa nyanyaanya, m̀ ka kpa ẹwụ taa kam ka rwaa ila wuu.

⁵Le oti ri ka aluji nyam a myị ya abwọ ku eji ham kị bile ẹhị ọ-kpa rịraa. Am ka kpẹhị rịraa ale, ị họ okpunyii tam mẹ. Ee, ịnyịlẹhị ịnyị ikẹwẹ ka họ okpunyi tam mẹ.”

⁶Ẹnụtụrụ ihye juwa warị ka ala isirel anyị ịtụma nya jekob ka dọmwụ nya oda atẹ lala okoji, ọọwa lẹ ika gu apwụ juwa nwụ egbe lẹ, egbe nyaa a ka pye yiri odehe ọlẹ yiri wuu lẹlẹ.

⁷Amkpaa yẹ ala Isirẹlụ akama jaabwọ kọ yẹ aluji nya ala Isirẹlụ lee? lee onwu ala Isirẹlụ lụmẹ ju iru jaabwọ ka ala Isirẹlụ nwa iwa myii?

⁸Amkpaa yẹ angịnyị nyamwụ akama bwula o-kwaa rụ ka ọpyị ọkịla. Igbachịwụ ọnyọọngịrị o-bwu ọmwẹnụ-ụtụrụ ọ kpa kwaa rụ hi ọpyị nyaa lẹ.

⁹Ma ọhọbịrị nya ala Isirẹlụ ka ju ọhịnyọhi haa ó-ri kị be ada ị-kpụ ijiga nyaa ene yịgẹ-yịgẹ hụrụ jaabwọ kịị be ajwọ ene. Ụka ọọwa, ekpeku nya Achẹra ojiga ọnyang ọhẹ-lọhẹ-ẹ́ ka hi kaka.

¹⁰Epweji itụka ịlẹ ịnọ kpa kị me egwalo ju chi-aje yaa dada, hi chu-uwa luhwo-luhwo, angịnyị mwu rụ hi ẹga ịlẹ kị ku-epwa ene-ene rụ nyi-ekpe da lala ugbileji; imwe-ekpe ye ri ẹga ka angịnyị kaa kpa iyo-ilepwa nyaa ri ame bala ẹga kị kaa mwi-inyo bala ọ juwa kaa bwuru-eji.

¹¹Angịnyị nyam lala abwọ nya ekeji ịnwọnwụ ịlẹ ká anyang ka mwụ kaka tụ ila ju e-ekpeleji nya ẹchụ. Chajị angịnyị nyam iwe chị uchi, ọlẹ kị je ịngịngịhyẹ ka, iju emwa kpa chwiichwii; chajị nya ọọwa a du lẹ ka ayịbaa ọlẹ kọ haa a ka ye ahi-erwerwa nyaa kaka lẹ, Ohe Oluhye ọngọlẹ kọ haa a ka me ọnahị nyamwụ ọhẹ-lọhẹ jaa kaka lẹ.

¹²Ẹnụtụrụ ọọwa Amkpaa ka tu angịnyị nyamwụ guru bwu Ihu nya ala Ijipiti, Amkpaa ka tu angịnyị nyamwụ guru ọngọ ookpokpo-ookpokpo wuu, jaabwọ ka anụ ala Isirẹlụ la ka ba.

¹³Ụka ká ẹnụtụrụ ọọwa a pwụ lẹ, ika chị ekurwe ọtụka beko wuru anyị nya ala Isirẹlụ ịlẹ wuu kị juwa i-pyi nya ala Asiriya bala Ijipiti nya tịrẹkpẹ bwu ẹpwụ nya ọnyọhị oriri. I ka nya warị ka raabwọ ha Amkpaa e-epweji nya iJerusalẹm u-uhye nya ọgbọdọ ọlịgọgọ nyamwụ.