Read idege AYỊSAYA 3 Bible Online

AYỊSAYA 3 - idege bible

AYỊSAYA 3

¹Elego wẹ lẹ! Ọngọlahị Agụgụ Amkpaa wẹẹ ka pwụ e-eji lẹ oo! Ọ ka go ang myị ang ịbaba ịlẹ ká angịnyị kpụnịrọ— enyi ọnwanwa tụ ang oriri wuu kpa rụ hi ala iJerusalẹm bala ala iJuda.

²Ịnyịlẹhị ịnyị! Ọ ka tụ angịlẹ wuu ka ẹkpẹ— angị họ ogu tụ angị họ ẹga, angịleje tụ alọmwụ nyaa, alegino tụ ịgabwọ nyaa,

³alegbeju nya angịdẹwụ tụ alegbeju ilihi-ihi nyaa, angị jẹ ẹla nya upe tụ angị mwụ ịnwa nyaa wuu.

⁴Ụka ọọwa, Amkpaa ka go anjwo ichiche ri alegbeju nyaa anyị ị-jẹ ẹlẹlẹhẹ lẹka à ka ri ịdịrịhụ nyaa lẹ.

⁵Angịnyị ka juwa yẹ awụlẹ ba— aligu-aligu ka jahị dawụlẹ, angịnyị-angịnyị nya awụlẹ ka juwa tụ awụlẹ pyịpyị, anjwo ka hu ọnụ da angịgbahị, angị ju alịwụ ju-ka kà gu alihi ọnụ.

⁶Ánụ jẹ ka tụbwọ aalẹ, ẹnụ ọọwa, angịhyẹ nyanụ ka yụbwọ chị ọọnanụ ọhẹ chẹẹ byoo yẹkẹẹ, “Ẹhẹẹ, ahụ ụbwọng à la ang ọkụrụ-kụrụ lẹẹ lẹpwụ nyahị lẹlẹ. Ahụ ā ri olegbeju nyahị, ká kpẹhị rịrịịhị ẹ-ẹpwụ nya uhila nya akama ọlẹ mẹ!”

⁷Ọ tị ka wẹ yẹkẹẹ, “Eheehe, aam koo! Ḿ ka jụ ẹlẹlẹhẹ họ myị ka. Ḿ la ang oriri lee ang ọkụrụ-kụrụ ọlẹrwa ọhẹ ẹ-ẹpwa nyam kaka. Anụ hum olegbeju nyanụ koo.”

⁸IJerusalẹm chị ụchụụ ene lẹ, ọ́ ka godayị kaka, iJuda tị wẹẹ tụrụ bwụjẹ-bwụjẹ lẹ! Ị yaya lọnụ, ị họ abwẹla họhọ ba Amkpaa la egeju-ọngịrị jahị da Ohe Oluhye ẹ-ẹpwarịrị nyaa.

⁹Ọ-jẹ oye-oye nya ya eje waa, ịị họ ang onyobyi u-ugbọdọda lala ala ịSọdọm, la ọ-kpọọ ịbaa chẹẹ ka. Ị ri enyi gu-obyi lẹ! Ịwa-à tị wụrụ akama ọwẹ chịlaa ọgụ lẹ.

¹⁰Byi angị họ ang ọnyịịla mẹ, ị ka pyẹẹẹ, ị ka ye uri nya ang ọnyịịla ịlẹ kị họ.

¹¹Angị họ ang onyobyi tị lẹ, ị jẹ mẹ, ị ri enyi gu obyi lẹ! Ang onyobyi ọlẹ kị họ angịnyị, ị tị̀tị̀ ka ya nwaa uri tịrẹkpẹ lẹ.

¹²Ahyu! Anụ yẹ iwe-ahụrụ nya alịnyahị alẹ wẹẹ! Anjwo ịlam-ịlam à wẹẹ kpaa ẹkpa ri eji lẹ! Anyang amamadiroko à wẹẹ ri ịdịrịhụ nyaa lẹ! Alịnyahị ee, angị kaa kpanụ ụgbẹyị kpanụ kaka hwahị lẹ, chọọ! Ị kpanụ ụgbẹyị kaka ju ka ẹpwụ nya ayịreji lẹ!

¹³Amkpaa Ọngọleje nwụlanọ nyọka la eje nyamwụ lẹ. Ọ hụhụ kọ ka la angịnyị nyamwụ eje.

¹⁴Ọ juwa ka la ịgabwọ bala alegbeju nya angịnyị nyamwụ eje. Ịwa-à bịrị Isirẹlụ ọlẹ kọ ri ẹrụ nya Amkpaa chị̀kẹ-chịkẹ lẹ, ị nu alẹbyahị ang ịlẹ kị la kpa kaka myị ẹpwa nyaa kpọrịkọọ.

¹⁵Ọngọlahị Amkpaa Agụgụ juwa byaa yẹkẹẹ, “Ányị tị́ kanụ wẹẹ ru angịnyị nyam chwọọchwọọ, kpaa ọnụ ri eji ịnyị ene-è?”

¹⁶Amkpaa yẹkẹẹ, “Chàaa! Anyang nya ala ịSayọn hi ọbọọchẹ lụmẹ pyị́ịị̀, ị jẹdịyẹ go ikwinyi rịrị u-uhye gogoogo juwa tọ oru nya alẹng la īworo ilidikiribyi nya ata nyaa juwa họ ọmọnyọ wuro-wuro.

¹⁷M̀ ka pwaa inyi hi ẹtẹ-ẹtẹ daa inyi olegbeju nyaa pwẹẹpwẹẹ”

¹⁸Ẹnụ ọọwa, ọngọlahị ka nu anyang ịwẹ ịjang nyaa tụ ang ịdaabwọ bala idoomyi nyaa.

¹⁹Ọ ka pwáa ang i-gu arụ nyaa bala ikpoko ịdụụbwọ bala ịpwụ i-ke ahị nyaa.

²⁰Amkpaa ka nwụla ikpo ị-kụrụ egbeju ị-kpa igbo chị egbirabwọ, agba ịdụụbwọ bala egba ịchọhị nyaa bala akpa nya ida ịwụwụ nyaa kpa rụ lẹlẹ.

²¹Ịmapẹ i-ju akachụ bala ịmapẹ i-ju ikwinyi.

²²Ịwụrụ icheji-cheji ị-kpa ya ụya nyaa bala ịwụrụ i-gu ene da ọkịlẹtụ bala ịbang nyaa.

²³Amkpaa ka pwaa ịwụrụ ịlẹ kị kụrụ ká angịnyị jẹ-ẹ̀ yọyị bwurwaa kpoye bala ọ-yẹ ịlọng u-uhye nyaa lala ịnyọ bala ịwụrụ igbileji ịlẹ kị kpa ịpwụ ịlala ihiriki họ bala anyịpwụ nyaa bala ịpwụ ịkrụ ahị nyaa.

²⁴Ọkọkọ kị ka wụ ida ichoru kwọkwọ, ị ka nyi oru kpọrịị. Ọkọkọ kị ka ye ugba ọchọhị lẹ, ori ị ka ya chị lẹ. Ọkọkọ kị ka gu inyi nwurwo-nwurwo, ị ka nehya legbeju dụwa bọngbọng. Ọkọkọ kị ka kụrụ ịwụrụ ịnyịịla-ịnyịịla, ị ka kụrụ ịwụrụ nya ida ọbaba. Ọkọkọ nya ụhị ọháha, oyoyi a ka jwaa lẹ.

²⁵Ẹwụ ka alẹng nyanụ, angịdẹ ri wụ ịtụka nyanụ ka myị kụrwa-kụrwa.

²⁶Ogirigba nya iJerusalẹm ka bida bala o-be ẹkọ ida ngịrọrọọrọ, epweji ayịdang ka lala ọnyang ọlẹ kị yoo apwụ ji lọhị-lọhị hụhụ ị-ịpyị.