Read idege AYỊSAYA 30 Bible Online

AYỊSAYA 30 - idege bible

AYỊSAYA 30

¹Amkpaa ya ẹla yẹkẹẹ, “Anụ angịlẹ kanụ ri alegbeju ịkpẹ ẹhị rịrị ala iJuda da ta ayịreji lẹ, chajị ịla egbeju ongịrị tụm pyịpyị. Ịba obyị omeme nya ịlaa jẹ, ọlẹ kị rị ịnyam ka, ọlẹ kị nwa ịro yụbwọ ju ụpwụ ẹ-ẹpwụ tụ ịrya nyam pyịpyị go ịhọbịrị ịhyẹ guru ụ-uhye nya ịkịla gbudum.

²Ị rụ kele ka Ijipiti kị ka ye ubwọ ọdọda bwu ụwa la o-wo lam ene ka. Ị tịtọ ká ala Ijipiti ka chẹwụ kaa. Ọọwa, ị ya ịlaa kpụnịrọ adịrahụ nya ala Ijipiti lẹlẹ.

³Ma ọ-ya ịlọnụ kpịbaa e-ekpeleji nya adịrahụ nya ala Ijipiti ka kpa oyoyi wanụ. Ụdaa nya ala Ijipiti ọlẹ kanụ dahịhile ka yanụ kpụ ịtẹbyị.

⁴Ịnyịlẹhị lẹ, adịrahụ ya alụkụrwọ nyamwụ ịhyẹ hụ e-epweji nya iSowan bala ịHanẹsị.

⁵Ọng myị ọng nyanụ anụ ala iJuda wuu ka chị ịjẹma chajị nya ọ-dahịhile ẹpwụma ọlẹ kọ ka jụ ịngịhyẹ họ hanụ ka. Ẹpwụma kanụ yẹhị rịrị gbe nya ụbwọ ọdada bala apyobwuna ka mwọọgịlẹ kpa oyoyi bala ẹpẹpẹ wanụ.”

⁶Ẹrụ ọlẹ ka Ohe Oluhye du chajị nya iyo ilugbileji oledii à lẹẹ lẹ: Alẹrụ hu ang ẹdịyẹ juwa jẹ bwu ẹga iluhi-uhi ịlẹ ká egabẹ bala ilo ịlẹhwa bala egbiriyọ ịlẹ kịị hụ̀ ji. Ị ju ibyiyó bala anyịrẹ-ịkamẹlụ olo gọọọ lang-ụdụ juwa kpa kaka ga ha adịrahụ nya Ijipiti. Ijipiti-í tị ri ẹpwụma ọlẹ kọ ka jụ ịngịhyẹ họ hanụ myị kpong-kpong ka.

⁷Ụbwọ ọlẹ ká Ijipiti ka da ri uhwongkolo nya ang ododu. Lẹẹlẹ, Ugbiriyo Ọwụlẹlẹ à ri ẹnyị ọlẹ kam kaa wụrụ Ijipiti lẹ.

⁸Ohe Oluhye byim am nyị da ẹla ọlẹ ju ụ-ụpwụ ha angịnyị, chajị ká ẹla ọọwa ka juwa nya ang ibeenu ọ-kpa kpịtịya pyịyọọ.

⁹Ị ri angị la egbeju-ọngịrị, alịnịịkịla ịlẹ kị myị kaa ke ụrụ la ọmẹjẹ nya Amkpaa kpong-kpong ka.

¹⁰Ịị byi alọmwụ yẹkẹẹ, “Anụ tụ ọnụ pịrị pyíiì! Anụ ya jehi ang ọlẹ kọ pwoku ọhọhọ kaka. Ẹla ọ-kpụ umwu ụ-ụrụ anụ ka ya jehi lẹ. Ị́ ri ịnyịlẹhị ri ka, anụ ya jehi odu mẹ.

¹¹Anụ tụkịnyaa la ọ-chịhị ochuchuu mẹ. Anụ bahiihi lẹla nya Ọngọ Ọlịgọgọ nya ala Isirẹlụ ọlẹ kanụ-ụ̀ kpa chị ọhị yẹrị-yẹrị mẹ.”

¹²Ọngọ Ọlịgọgọ nya ala Isirẹlụ yẹkẹẹ, “Ajị nyọlẹ kanụ pwa ẹla nyam ọlẹ kam ya jenụ, kanụ kpụnịro ẹla nya abwọga bala ọpịrịju-ù wẹ lẹ,

¹³akama ọwẹ ka chịnụ ọgụ lala ugulọ ọlẹ kọ luhye kọ tị gu ene, chị eku kụkụ bala ọ-yẹ gbagbaa nyọka kpụkpụ. Lụka ọmwaaa ọ ka kpụ gbedem baanụ.

¹⁴Anụ ka bene yịgẹ-yịgẹ lala ọta ọlẹ kọ bene lune nyamwụ ọhẹ-lọhẹ hi há nyọka kpa chụ ila lee ọ-ya chị enyi ka.”

¹⁵Ọngọlahị Amkpaa Ọngọ Ọlịgọgọ nya ala Isirẹlụ jam byinu yẹkẹẹ, “Anụ yẹ irya da kanụ kpa ọkịlẹtụ nyanụ dahịhilem mẹ aalẹ, anụ ka chịda. Ánụ ba kem juwa dahịhile ọngịrị nya ịlọnụ aalẹ, ánụ ka wu ọchịda ọyị myị ka.” Ánụ tị myị họ ịnyị ka!

¹⁶Ọkọkọ nya ọọwa, anụ juwa yẹkẹẹ, “Eheehe, ahị ka kụ anyịrẹ nyahị rụnyẹ rụ. Anyịrẹ ịlẹ kị lịmịla ahị ka kpa be rụ lẹ.” Ee, anụ ka rụnyẹ kpa ịlọnụ be ịnyịlẹhị. Anyịrẹ nya angị wẹẹ ka kunu ku tị lịmịla gụ ịnyanụ wẹẹ!

¹⁷Angị ụnọ nyanụ ka rụnyẹ mwụ ata bịmwụ hi ọngọdẹwụ ọngọ ookpokpo nya aluji. Ọ́ tị kpụ kị pwụ angị ịrụ lẹ, anụ wuu ka rụnyẹ nya ọhịhị nyanụ lẹ. Angị hihi nyanụ ka la ịlaa nwee lala okoji oweji nya ụgbàńg a-achinege nya ọgbọdọ.

¹⁸Tị kpọkpọọkpọ, Amkpaa wẹẹ godayị nyọka mẹ ọháha nyamwụ jẹẹnụ bala ọ-ka yẹnụ ahyẹẹrwẹrwa. Amkpaa ri Ohe Oluhye ọ-họ ẹla ọkpakpa. Ịnya angịlẹ kị dahịhiloo há haa lẹ.

¹⁹Ẹla nyịlẹhị ị-ịnyị, Anụ angịnyị nya ala ịSayọn Jerusalẹm, anụ ka je ịda kpa gụ ọwẹ kaka. Amkpaa Ohe Oluhye ri ọngọ yẹ ahyẹẹrwẹrwa. Ọ ka yẹ ahyẹẹrwẹrwa nyanụ chajị nya omyị nya ịda nyanụ pyịị lẹ; ụka kanụ chị eko chị wụrwọ nya ụbwọ ọdada lẹ, ọka wẹnụ lẹ.

²⁰Ọ rị nyịlẹhị Ọngọlahị ka họ kanụ ka chịpwụrụ bwụ ẹpwụ nya akama lee ụka olujwo, ma ọwa lịlọmwụ a ka juwa nyọka mẹ ang jẹẹnụ lẹ. Anụ ka myịmyị-ị̀ juwa pịlahị nyamwụ gụ ọọwa kaka.

²¹O-ri kanụ dọmwụ hụ-ahị rụ hị ụgbẹyị koye ụbwụrịrị lẹe ụpụpịla, arụ nyanụ ka wo omyị ẹ-ẹkpẹ nyanụ kọ juwa yẹkẹẹ, “Ụgbẹyị lẹẹ ẹgẹlẹ, anụ dirọọ mẹ.”

²²Ụka ọọwa, anụ ka bịrị ịjịga nyanụ ịlẹ kanụ kwaa lokpoko onyoowuru bala okpoko ịgọm, anụ ka gyaa chịhụrụ lala achịpwụ; ọọwa lẹ anụ ka byyaa yẹkẹẹ, “Anụ tụ kịnya-a hị ahị nyam-pyịị.”

²³Ụka ọọwa Ohe ka do enyị hanụ ọlẹ kanụ ka kpa tọ ẹgbe nya ang abwọ nya ẹrụ nyanụ bala ajẹ nya ang ịhụhụ ị-ịpyị nyanụ, ọlẹ ka ambakpa bala ẹgbe nya ang ịnwụnwụ ịlọpyị, ọlẹ kọ ka họ kanụ kaye ang abwọ nya ẹrụ o-dụdụ bala gbe ọhyahya lụmẹ-lụmẹ ịyo ịlẹpwa nyanụ ka yẹ edamẹ ri lụmẹ-lụmẹ.

²⁴Ụka ọọwa ịna alẹng ịlẹ kị kaa kpa bwuru eji bala ọ-hịrị-ajẹ nya ang bala agba nya anyịrẹ ka ye ang rị wu ẹpwụ.

²⁵Ẹnụ kanụ dẹwụ bịrị ẹga ọkpụ-ịbaa nya alujị nyanụ, kanụ nwụ ịru nya angịnyị lụmẹ aalẹ, enyị ka mwụ bwu. Uhye nya ọgbọdọ ọtụka-ọtụka ọnyị myị ọnyị bala uhye nya ịkịtị ọnyị myị ọnyị.

²⁶Ọgụgụ wuu ahịgboo nya ọya ka hụ tang lala ahịgboo nya ẹnụ, ẹnụtụrụ ọọwa, ahịgboo ọ la ahị ọpyẹpyẹ ọokpọkpọ ọọwa ka lala ahịgboo nya ẹnụtụrụ ịrwịye nya tụchawụlẹ la ọokpọkpọ. Ịlẹ wuu ka họ ụka ka Amkpaa a họ angịnyị nyamwụ uda bala ọ chaa abacha nya ẹbẹ ọlẹ kọ chaa.

²⁷Anụ yẹ mẹẹ, ẹnyị nya Amkpaa Ohe Oluhye bwu ẹga ọ lụrụ-lụrụ warị, agbama nyamwụ juwa wuru lala ẹlẹlẹ-ịla, ọlẹ kọ wuleji kọkọ, chị ụka lala ịmwụ-ịla, egbịnụ nyamwụ myị la agbama, ẹlẹlẹ nyamwụ lala ịla ọ ta-ang ayịreji, ịla bala ịmwụ-ịla mẹ agbamaa nyamwụ jẹ. Ọrị ka ọya ẹla, ẹla nyamwụ kaa wuru lala ịla.

²⁸Ọọwa, Ohe Oluhye a du igbachihu ji lahi nyamwu lala ukpenyi otuka ọlẹ ka ogang myị hang kparu lele. Ukpeenyi oowa tụ-eji lépwuma lume lume kaka t'ayireji, ọ da ang onyobyi ọlẹ kị me obyi nyọka họ chị ọpyị.

²⁹Ma, anụ angịnyị nya Ohe Oluhye wuu ka chị ọkẹkẹnị bala o-mwu eje lala al'odu ọlẹ ka anụ kaari ang oriri ọlịgọgọ nyanu. Anụ ka chị ọkẹkẹnị lala angịlẹ wuu kii jediye ka ọgbọdọ nya ayịloo nya uhule odudu kele ka ube ịgọgọ nya Ohe Oluhye ọlẹ ka ori ọngọchehu ke nya ala Isirẹlụ.

³⁰Amkpaa ka họ ká ọng myị ọng ka wo omyi ọtụka nyamwụ kị ka jẹ jaabwọ ká agbama nyamwụ la nyẹẹnyẹẹ kaka ba. Elele nya ile, egbamwu ogwenegu, ekpawe-ododo bala ate nya enyi ka ji.

³¹Ala Asiriya ka juhi otuka uka kii wo onyi nya Ohe Oluhye bala oribenu nya ọngiri nya, akama nyamwu.

³²Jaabwọ ká Amkpaa ka juwa yaa akama mwụba-mwụba, ịnyịnyị-ịnyịnyị angịnyị nyamwụ à ka juwa chị ọkẹkẹnị leba bala ogum̀ odudu lẹ. Ohe Oluhye lịlọmwụ ka mwẹla ta ala Asiriya lang-abwọ nya ẹwụ nyamwụ.

³³Ị nwụla ẹga kị ka jụ adịrahụ nya Asiriya ila nọ tata lẹ. Ụwa la kpori-kpori la, ọ ju ẹpwụ ju. Ịwụ ịlụwa kụ ogu ọtụka-ọtụka gbudum-m. Amkpaa ka chị ịhụ pwuu du ukpilo nya ila kaka rụ ịwụ ịịwa.