Read idege AYỊSAYA 31 Bible Online

AYỊSAYA 31 - idege bible

AYỊSAYA 31

¹Ayịreji ọtata jụwa ha angịlẹ ki ya ẹhị riri ka ala Ijipiti daa ụbwọ angịlẹ kị jụwa dahịhile anyịre nyaa ịwa bala anyịre ikpolo nyaa, ọkọkọ nyọka dahịhile Amkpaa Ọngọ Ọlịgọgọ nya ala Isirẹlụ.

²Ẹ-ẹpwụ nya ẹla ọjẹjẹ Amkpaa ka du ayịreji ọtata chaa ọgụ, ọ ka tịrị irya nyamwụ ẹkpẹ ka. ọ ka wuleji jahị da angị họ ang inyibyi, bala angị da angị họ ang onyobyi ụbwọ.

³Ala Ijipiti ịwẹ, angịnyị ehe ị ri lẹ. Ị́ ri Ohe Oluhye ka. Anyịrẹ nyaa rị ugba nya ịnyịrọ, ị́ ri olegu ka ụka ọlẹ ka Amkpaa a nịra ụbwọ kpaaa jahị daa, ị ka chabwọ kaa mila angịlẹ kị wẹẹ daa ụbwọ. Ịwa wuu a ka mileji ị ka gbu lawụlẹ lẹlẹ.

⁴Ma Amkpaa byim yẹkẹẹ, “Ụka ka ugẹbẹ nwụ iyo kọ ka ryoo, ọ́ kaa ju uhi ka. Iru nya angịgbikpịlọ-ọ́ dụgba wule awụlẹ juwa kpụ ịkata wẹwẹ, ọọ rụnyẹ rụ ka, ọọ hụ kpiki ka. Ịịwẹ am Amkpaa Agụgụ à ka kụ giri-giri juwa dẹwụ yẹ Ọgbọdọ nya ịSayọn dada lẹlẹ.”

⁵Amkpaa Agụgụ ka pyẹ achọọ ke epweji nya iJerusalẹm jaabwọ ka ọchinụ káá pyẹ achwọ kụrụ awụ nyamwụ. Ọngọlahị ka da ẹ-wụ, ọ ka chị epweji da. Ọ ka chịpwụrụ bwu uhye-ọgba nya epweji ọ ka chọọ da.

⁶Chajị nyọwa lẹ, anụ angịnyị nyam, ọri-nyịlẹhị anụ họ ang inyibyi bala la egbeju-ọngịrị anụ nya tịrẹkpẹ wẹ ẹga nya Amkpaa mẹ.

⁷M̀ jẹ ka enụtụrụ juwa warị ọlẹ ká ọng myị ọng nyanụ ka go ekpeku nya okpoko ịgọm bala ịnya okpoko onyoowuru ịlẹ kanụ họ labwọ nya ịhọbịrị nyanụ chịịrụ.

⁸Ala Asiriya ka ta ayịreji ma ọọngịnyị a ka nwaa ka. Ị ka rụnyẹ rụ. Aluji ka wu ikolobya nyaa kpa rụ kaka ri anyịhị.

⁹Alegbeju nya angịdẹwụ nyaa ka che kpakpakpa, ị ka juhị, ị ka rụnyẹ rụ ụka ọlẹ kị chi ẹhị kaa ye ụgbang nya angịdẹwụ. Ịnyị Amkpaa ọlẹ ka ahịgboo nyamwụ juwa hụ kpangkpang i-iJerusalẹm a ya lẹ.