Read idege AYỊSAYA 32 Bible Online

AYỊSAYA 32 - idege bible

AYỊSAYA 32

¹Yẹmẹẹ Adịrahụ ọla abwẹla ọnyịla chalẹẹ warị.

²Ọ ka chị-ewu ke ala Isirelụ hi ukpenyi bala igbachịwụ, ọ ka họ kọka la ịlọmwụ lala ihu ọla ugbileji bala ụrụrụ ọ kpụ dọọ ọla ekpeleji nya ẹjwo ọtụka ọlẹ kọ juwa a-dẹnụ nya ọpyị.

³Ụka ọwa ọng-myọng ọlẹ kọ jẹ yọyị ká pịlahị nya Amkpaa bala angịlẹ wuu kị jẹ wọ-ẹla ka-ke ụrụ la omyi nyamwụ.

⁴Angịnyị ịlẹ kị jẹ-ang-jẹka ẹpwarịrị nyaa ka myị-lang ọjẹjẹ. Angịlẹ kị jẹká-á da ẹla wụlẹ ka, ị-jẹka ya ẹla kpụrụrụ.

⁵Ụka ọọwa, ị ká wụrụ a lụchị ịlẹ kị jẹ Ohe Oluhye-ka nya ọ-gẹwụ kaka lee ọwụrụ alụdụ ịlẹ kị káá họ angịnyị-ri nya alihi nya al-ụma kaka.

⁶Ọng-myọng ka-jẹ angịlẹ ká alụchị ị-jẹ Ohe Oluhye ịị-wa ri. Ị-káá juwa kpa ọnọkịla pyẹ ba. Ọngọlahị ị-káá yang orịrị ha angịlẹ ka imi nwụ-ka lee ọ ya enyi ha angịle ka imenyi nwụ ka.

⁷Ijehị ọ-jẹjẹ nya angị họ abwẹla inyibyi ka chehe tụ ọnọkịla ịlẹ kị-káá kpa tụ ikpeika ba ụ-ụbe nya eje.

⁸Ma angịnyị ịnyịịla ka pyẹ ụbwọ nyaa maa ha angịkịla, ị ka-la ahyọ wawa chajị nya ang ịlẹ wuu kị-họ.

⁹Ke ụrụ anụ anyang ịlẹ ka ọnọkịla omeme tụ ịga-myịga-da banụ ahị. Anụ ke ụrụ m-ẹẹ, m-juwa ka ya uri ọlẹ kanụ ka ye jenu.

¹⁰Lụka ọ-kpii, lala ẹka da uhye pyịnyẹng, anụ angịlẹ ka ẹla a-káá rinu ẹla ka-wuu, ẹla ka domwụ nyọka rinu ẹla ahahị. Chajị egbe nyang nya ẹrụ nyanụ áká nwụ ka, anụ a ka ye egbe nyang ịla ẹrụ wụụ ka.

¹¹Anụ che-bwe-bwe-bwe luhi mẹ, anụ anyang ịlẹ ka ẹla a-káá rinu ẹla ka. Anụ ya ẹla orinu ẹla ka ọ-wẹ darụ mẹ, kanụ pwọ ịwụrụ ị-huhị nyanụ ịwẹ cheeji chajị kanụ go iwụrụ nya ida ọbaba kụrụ mẹ.

¹²Ya ụbwọ mịla ọkịlẹtụ chajị nya ujujwo nya ang nya ẹrụ ịtụka nyanụ ịlẹ kịị ka ta ayịreji ahahyị bala egbe ịnyọ-nyẹ nya ịVịnẹ nyanụ ịlẹ kịịwẹ ka ta ayịreji kilahị.

¹³Ọpyị nyanụ ka myị la amẹ bala ejwo. Ẹpwa nyanụ ịlẹ kanụ káá yụya bala epweji nyanụ ọlẹ kanụ káá chị ọkẹkẹnị ju á ka ji kaka.

¹⁴Ị ka rụ wuu hi epwa nya adịrahụ bala epweji nyanụ Epweji ọtụka nyanụ ọlẹ ka angịnyị ka họ ang ụka mị-ụka ka da uhuhwo. I ka kpa ogu nya anyịrẹ bala ogu nya ịkpịlọ ri amẹ u-uhye nya ịgbọdọ ẹgẹlẹ ka ube oluhye ọlẹ kịị kụ gbeji ji.

¹⁵Gbee pwụka ọlẹ kị ka ya ọlẹgu yẹ kụrụụhị bwu uhye-ọgba, ọọwa, ọpyị ọchọrụ a ka yẹ ka ri ọpyị o-ju eyo lẹlẹ. Ọpyị o-ju eyo ka nwa ka ri ipyinu o-ju eyo.

¹⁶Ẹla ọhọhọ kpakpa ka ji ugbileji. Abwẹla ọnyịla ka ji ụwa ọ-ọpyị.

¹⁷Ugbe nya abwẹla ọnyịla ọọwa ka kpa okpunyi warị okpunyi bala ahị ọdahile ka juwa ọ-ọpyị pyịyọọ.

¹⁸Angịnyị nyam ka juwa lokpunyi bala ọdụmwọ ẹ-ẹpwa nyaa. Ị ka la ịnyọ ọmwụmwụ.

¹⁹Ọ-ọri kị dọmwụ ta ipyinu ayịreji lee ọtụrụ epweji ju eji.

²⁰Amkpaa ka wahị kụrụ angịnyị nyamwụ ọtụka-tụka. Ụka myị ụka ka angịnyị nyam a ye egbe tọọ, ị ka wụ egbe nya ẹrụ mwụba-mwụba. Ogu nya iyo ileji nyaa ka ye edamẹ ịjwọọjwọọ ri.