Read idege AYỊSAYA 33 Bible Online

AYỊSAYA 33 - idege bible

AYỊSAYA 33

¹I yoo ari nyang ahụ epweji nya Asiriya. A tang myị ang ọ dagaga jung wuu ayịreji ma ahụ ayịdang a tị ta ayịreji ka. A da ahị hile ka angịkịla ka họ ọnụ ọmyịmyị ọlẹ kị myị hang wuu ma ahụ a kaa họ ọnụ ọ myịmyị nyang ọlẹ ka myị haa ka. Chajị nyọwa lẹ, angịnyị ka pịrịng-ju bala ọ tang ayịreji ịnyịnyị.

²Ma Amkpaa a yẹ ahyẹẹrwẹrwa nyahị chajị ahụ ahị dahịhile lẹ. Ahụ a ri ọngịrị nyahị ẹnụ myị ẹnụ bala ọngọ chịda nyahị ẹ-ẹpwụ nya akama lẹ.

³Aluji ka rụnyẹ rụ ụka ọlẹ kị wo omyị nyang, ụka ọlẹ ká dahị kọkọ alẹpwụma ka rụnyẹ ọtụka-ọtụka.

⁴Jaabwọ ọlẹ ká ịyịrị káá rị ang nya ẹrụ hịlẹ-hịlẹ bala ọ-nẹ apwụ nya alakọnụ, ịnyịnyị ala iJerusalẹm a ka ta angịdẹwụ nya ala Asiriya ayịreji lẹ.

⁵Ịnyịlẹhị ịnyị Amkpaa lụmẹ ọtụka tụka ọ tị kụ ẹpwa ụwa epwohe ma ọ ka họ iJerusalẹm ka rị ẹpwa nyamwụ ẹga ọlẹ ká ẹla ọkpẹẹkpẹẹ bala abwẹla ọnyịịla ka ji.

⁶Ọ ka ri itiwe ọkpọng-kpọng nyanụ, anụ ka myị lụdụ ọkpụkpụ nya ọchịda ọlala bala ẹla ojẹjẹ tụ ang ọjẹjẹ. Ọ-ka ju uhi nya Amkpaa-à ri ang-ụdụ ọtụka ọgụgụ lẹ.

⁷Ma ọlẹẹlẹẹ anụ angị ku ọmwakpa anụ bida onyuujujwo chajị nya ahị ọdahịle nyanụ ọlẹ kọ ri ododu mẹẹ chajị ala Asiriya pwa ọbịlẹ-bịlẹ nyọka la okpunyii lẹ.

⁸Ụgbẹyị nyanụ wuu da hwoo lẹ ọngọngọhẹ a bwu ụwa kaka. Ala Asiriya bịrị ọnụ ọmyịmyị nya okpunyii nya lẹ ẹlẹlẹhẹ á rị aa ẹla chajị nya ọnụ ọmyịmyị ọlẹ kị myị ka angịnyị ri ibeenu nyaa kaka. I juhi nya ọngọnọhẹ kaka.

⁹Ọpyị nya ala Isirelụ wuu juwa ẹ-ẹpwụ nya ayịreji lẹ. Ụ-ụteji nya ịCharọn yẹ ri ugbileji lẹ. Ị wang wú wụụ ụwa ịBachan bala Ọgbọdọ nya ịKamẹlụ.

¹⁰Ma Amkpaa yẹkẹẹ, “Ọwa nyị ka godayị kọkọ nyọka mẹ ọngịrị bala ụmụmẹ ọlala nyọwa jẹ.”

¹¹Anụ ala Asiriya-á ka ye apyobwuna ọhẹ-lọhẹ bwu aga ọmama nyanụ ka. Ọhụ ọdada nyanụ ka yẹ la ịla ọ-ka nwụnụ.

¹²Anụ wuu ka rụ ịla gbanggbang. Ọ ka la jaabwọ kị chị ejwo cheji kị kaa taa ju ka ẹpwụ nya ila.

¹³Anụ ke ụrụ kanụ wo ang ịlẹ kam họ, anụ ẹpwụma ịlụrụ bala anụ angịlẹ kanụ ju chwẹẹ, anụ myị ya am la ụmụmẹ mẹ.

¹⁴Alọhọbịrị ịla iJerusalẹm jụwa hụ kpa-kpa-kpa la uhi ojuju. Ị juwa yẹkẹẹ, “Oowo la ẹpwụ nyahị atị ka jẹ-ẹ̀ be bwu ẹ-ẹpwụ nya ịla nya ayireji ọtata nyamwụ.”

¹⁵Angịle kị ka ku igẹlẹ myị ri angịlẹ kịla kpẹẹkpẹẹ bala ọ họ abwẹla ọnyịla, angịnyị ịlẹ kị káá ri apyebwuna ododu ka, lee ọ káá ye ang ọchị ikiri ju ka angịlẹ kị káá pwa ọ ke ụrụ la angịlẹ kị juwa me obi nya angịnyị ọnwụnwụ, bala angịlẹ kị káá tụ ahị nyaa pịrị hi angịlẹ kị juwa me obyi nyang onyobyi.

¹⁶Angịịwa a ka nọ ẹpwa u-uhye-ọgba lẹ. Ẹjwọ nya ọ-ọgbọdọ ka chị ewu kaa ọlẹ kị ka chịda. Ị ka kpa ang oriri kịlaa ị ka la enyi mwụba mwụba.

¹⁷Ẹhị nyanụ ka ye adịrahụ ẹ-ẹpwụ nya ụhị nyamwụ, anụ ka yẹ ọpyị ọ ka dụwa gbee pyipyipyi ka dabyi.

¹⁸Anụ ka kpịtịya nya ụka ọlẹ ka uhi káá junu, ka alegbeju nyala Aseriya kaa godayị odehe nya ugulọ nyanụ juwa wa ebe iluhye bala ọ juwa ku irya jabwo ka-angabwọ ịlẹ kị ka nwụla bwu epweji nyanụ ịlẹ kị kpụ ka lụmẹ kaa ba.

¹⁹Ma ahyahị ịwa wuu ka rụ, angị la uhi-uhi bala angị bịrịang ịlẹ kị káá ya oja ọ lẹbyẹbyị ịwẹ ka byi gbang gbang.

²⁰Ọkọkọ nyọwalẹ anụ ka yẹ epweji nya ịSayọn lala ịja ọlẹ kị káá gbịgba bala ọ yụya. IJerusalẹm ka ri epweji okpunyi ẹga ka alụwa á ká chuko nyang ulohihi ka.

²¹Amkpaa ri Agụgụ ọtụka nyahị. Ọ ka lala ihu o-ju ẹpwụ ọlẹ kọ kaa chị ewuke angịnyị ká oluji-í ka kpoye myị ka.

²²Chajị Amkpaa ri ọngọleje nyahị lẹ, ọwa a ri ọngọ ya ehile hahị lẹ ọ wa ati ri Adịrahụ nyahị lẹ. Ọ ka kpa ẹhị rịrịịhị bala ọ-chịhịda.

²³Aluji ju ụmwụ nyaa kaa pịlẹ-ang ịga ọluhihi. Angịnyị nya Amkpaa ka go ang nya ụdụ nyaa gịlawụlẹ. Ang ịịwa dọmwụ ka hi pwu ala okuku, ịkala ịnyị-laa.

²⁴Ụka ọọwa, ọngọngọhẹ ọ-ọpyị nya Isirẹlụ á tụtụm ka ya yẹkẹẹ, “Ẹdụrụ jụma alẹ” kaka, chajị Amkpaa ka hịnyọhi ịhọbịrị nyaa haa.