Read idege AYỊSAYA 34 Bible Online

AYỊSAYA 34 - idege bible

AYỊSAYA 34

¹Tụ jum chwẹẹ kanụ ke ụrụ, anụ ala epwụma ilodehe. Odehe bala ang ịlẹpwụ nyamwụ anụ wọ la ẹla nyam.

²Ọngọlahị ju agbama ta alẹpwụma wuu. Ị kẹjẹ awrụ nyamwụ ji ahị da angị da ẹwụ wuu. Ọ ka taa wuu ayịreji ọ ka kpa angịlẹ kị ka nwaa warị.

³Ị́ ka ju ogu nyaa eji ka, ị ka tụụbwọ hi ogu nyaa chụwa odehe, orwu onyịnyị nya ọ mama nyaa ka myị ẹga myị ẹga.

⁴Uhye-ọgba wuu ka yẹ ju awụlẹ, ị ka wọọ lala ọba, ọ ka byi gbanggbang. Ịdịchụ ka chabwọ bwu egbamwụ jaabwọ ka ápwụ ị nwọnwụ bala egbe nya ekeji káá wo bwu uhye nya ekeji.

⁵Ụka ká ẹma nya ẹwụ nyam a họ ụkụrwọ nyamwụ kpa ụ-ụhye ọgba aalẹ a ya ẹhị ba mẹẹ, ọ ka chị abwọ mịla ala Ịdọm Ẹpwụma ọlẹ kam ta ayịreji hịlẹ hịlẹ

⁶Oge nya ẹwụ nya Amkpaa kpụ chwẹẹchwẹẹ la ịwo. Eyo kụrwọọ wuu lala ọri ị kpa nwụ anyị nya ịkpịlọ bala eembiri bala imilodo ikiliya. Ee, Amkpaa ka kiliya ọtụka ụwa epweji ọtụka nyala ịBọjra ọlẹ kọ kpụdụ. ọ ka nwụ iru nya angịnyị lụmẹ-lụmẹ ụwa Edọm.

⁷Angịlẹ kị la ogogo gu-gu wuu ka gbu, angịgbahị tụ ịkolobya ịnyịnyị. Ịpyị ka myị chwẹ chwẹ la ịwọ, eji wuu ka ri eyo-eyo.

⁸Chajị ẹnụtụrụ ọọwa ri ẹnụtụrụ nya ọhọkwiwa nya Amkpaa, ọri Ẹka ọlẹ ka ala Ẹdọm ka nwụ uri tịrẹkpẹ nya angịịlẹ wuu kị ho ala Isirẹlụ.

⁹Ogo ịla Ẹdọm wuu ka mị la ajẹ nyá ila, ọ wuru-wuru, ilá ká wuru ịpyị wuu.

¹⁰Akama ọlẹ kám ka yẹ ala Ẹdọm á ká myịka, ị mwụ nya ila ọ wuru-wuru nyamwụ ka nyi pyịyọọ gboyị-myoyi. Ọpyị nyaa ka da uhuhwo bwu oyi ọhẹ ka oyi ọkịla, ọngọngọhẹ á ká kụ ụwa ẹnẹhẹ kaka.

¹¹Epwii bala ipyeekpo bala àpà ka nọ ẹpwa ụ-ụwa. Ohe Oluhye ka họ ọpyị nya Ẹdọm ka da luhwo-luhwo jaabwọ kọ la ene kịị họ odehe.

¹²Ị ka wụrwọọ Ọpyị nya Ang Ododu. Ịdịrịhụ bala alegbeju nyaa wuu myị yịra-yịra.

¹³Ame ka bwu wuu ẹẹpwa nya ịdịrịhụ nyaa, ịkpẹẹ ka bwu iiga ịkpịbaa nyaa. Ịchị-ịwanụ bala ekpilo ịchịnụ ịtụka ka nẹpwa ụ-ụwa eegwawụ nyaa.

¹⁴Iyo ịla ugbileji bala ikirom ka nẹpwa laulẹ uuwa. Ala odu wuu ịka juwa jida. Igbee ka da akọ wụrụ awụlẹ ụ-ụwa eegwawụ. Ang inyibyi ịlẹ kị káá wulọ lodu ka warị kaa mwụ ịnyọ ụ-ụwa.

¹⁵Epwii ka nọ awụ nyaa ụ-ụwa kị ka da eji. Ọ ka chị anyị ọ ka pyẹ achwọ kụrwáá. Epwu ka wari ọnyị myị ọnyị nyaa ka wu awụlẹ ba.

¹⁶Pịlahị ẹ-ẹpwụ nya ụpwụ nya Amkpaa ka yẹ ang ịlẹ kọ ka họ. Ọhẹ-lọhẹ nya ang ịhịhị ịlẹ kọ họ-ọ́ ka chị byi ka. Ọnyị myị ọnyị nyaa ka la ọọnịna ọ-tọọjẹ. Amkpaa-à da ehile ọwẹ lẹ. Olegu nyamwụ tị ka kpa ẹlẹwẹ kaka họ jịra.

¹⁷Amkpaa me eji ori lẹ ọ gọọ wuu ha iyo ịịwa lẹ. Ika nẹpwa ụ-ụwa pyọọ gboy-myoyi.