Read idege AYỊSAYA 35 Bible Online

AYỊSAYA 35 - idege bible

AYỊSAYA 35

¹Ụgbileji wuu ka dọmwụ chị ọkẹkẹnị ẹnụtụrụ ọọwa. Ọpyị ọ chọrụ ka bwu apwụ pwọọ.

²Ee, ọ ka bwu ápwụ lụmẹ-lụmẹ, ọ ka mwu eje bala ọ-chị ọkẹkẹnị. Ọpyị ọchọrụ ka bwu ámẹ jwọọjwọọ jaabwọ ká edamẹ ịlọgbọdọ nya iLibanọn bala ịnya ọpyị o-ju eyo ọla ịKamẹlụ bala ịCharọn la. Ị ka yẹ ụmụmẹ nya Amkpaa, jaabwọ ká ọngịrị nya Ohe Oluhye nyahị la.

³Oja ọlẹ ya ọngịrị há angịlẹ ka abwọ chaa pyẹpyẹ bala oya ọhụ ojuju ha angịlẹ ka arụụ nyaa la dẹwụ-dẹwụ.

⁴Byi angịlẹ kị juhi yẹkẹẹ, “Anụ la ọngịrị anụ juhi ká chajị Amkpaa nyanụ juwa warị kọ ká ta aluji nyanụ ayịreji. Ọ juwa wẹ kaa chịnụ da.”

⁵Ụka kọ warị, ọ ka wụrụ ahị nya alidu bala ọ wụrụ arụ nya angị-kpila.

⁶Ikuku ka gbajị lala ẹrwa, ángịlẹ wuu kị jẹ ya ẹla-ka ka mwu eje gboo. Emwenyi ka hu u-ugbileji, ogo ka juwa ọ-ọpyị ọchọrụ.

⁷Ọpyị ọ chọhụ kịra-kịra ka yẹ la ụjẹ-enyị bala ụgbụ nya enyi, ọ ka chị imenyi ọ nwụnwụ ọ-lụwa. Ekpamẹ bala etungkohyo bala amẹ ichowu ka jú jwọọjwọọ ẹ-ẹga ọlẹ ka ikirom ilugbileji nọ ẹpwa ene-ene.

⁸Ị ka da ụgbẹyị nya alụma bwu ẹga ọlẹ kọri ugbileji ene-ene. I ka wụrọọ ụgbẹyị ọtụka nya ịgọgọ ọlala. Angịnyị ị la ọkịlẹtụ inyibi a-ka bwu ụwa ka. Ụgbẹyị ọọwa ka rinya angịịlẹ wuu kịhọ abwẹla pwọku amkpaa. Aluchi a-ka bwu ụwa ka

⁹egabẹ a ka kpịbaa ụ-ụwa ka, ịnyịngịhyẹ ọ luhihi ọkịla a tịka juwa ka. Angịlẹ kị chịda kẹnẹ kẹnẹ a ka bwu ụwa lẹ

¹⁰angịlẹ ka ọngọlahị a ra linya ka nya tịrẹkpẹ wẹ iJerusalẹm, juwa mwu eje nya ọkẹkẹnị ọ-gboy myoyị. Ọjụjụ bala ịda ọbaba áka ji ka. ọkẹkẹnị bala ụya ọyaya ka yaa kụrụ wuu.