Read idege AYỊSAYA 36 Bible Online

AYỊSAYA 36 - idege bible

AYỊSAYA 36

¹Ẹ-ẹpwụ nya ẹka iwo kụrụ ine nyọlẹ ka iHesekaya ri adịrahụ, ịSẹnakeribyi adịrahụ ọtụka nya ala Asiriya wẹ kaka dẹwụ ta epweji nya ala iJuda ịlẹ kị me egwalọ yẹ dada wuu, kụrwaa chẹẹchẹẹ.

²Ọọwa, adịrahụ ọtụka nya ala Asiriya a du olegbeju nya angịdẹwụ bwu ịLakichi liru nya angịdẹwụ yahị da iHesekaya kele ka iJerusalẹm lẹlẹ. Olegbeju ọọwa kpaa kaka chịkụ ụ-ụgbẹyị ọ-ba ube nya ihi nya angị kaa ju ang ịkụrụ-kụrụ ido ba. Ụwa ji ba àya olekpeleji ọlẹ ká enyi o-bwu Ẹmwụ-enyi Oluhye kaa mwụ ka.

³Ọọwa, alegbeju angị ịta nya ala iJuda ịlẹ ka ẹnyị nyaa ri Eliyakim olegbeju nya ẹpwa nya adịrahụ kọ ri ọnyị nya iHilikaya bala ịChẹbụna kọ ri akịraa ọlẹpwa nya adịrahụ bala iJowa ọnyị nya Asafụ kọ kaa kpẹhị rịrị apwụ nya igomenti a kpehe kele kaka taa lẹlẹ.

⁴Ọọwa, olegbeju nya angịdẹwụ nya Asiriya ọhẹ à byaa yẹkẹẹ, “Adịrahụ ọtụka ya ahị nyị tọ iHesekaya wo wẹẹ, ịyẹ kpá ọ tị́ dahịhile du kọ ju ugbodu ịnyị-ị̄ị̀?

⁵Ọ me ká ẹla ọlọnụ-ọnụ a ri ẹwụ ọjẹjẹ bala ọngịrị ọlala nyọka kpa dẹwụ-ụ́? Lee oowo ọ tị kpụ nịrọ nyọka dọọ ụbwọ mwẹla ta ala Asiriya myị-ị̀ wẹẹ?

⁶Ijipiti ọ wẹẹ dahịhile ka le? Ọ ka yẹ kpáa, Ijipiti lala ugo nya etungkohyo ọlẹ ká ọngịnyị juwa kpa chị eji nya ọgọdọ. Ọ tị ka bene gu ọngọọwa ụ-ụbwọ. Adịrahụ nya ala Ijipiti ọlẹ kanụ wẹẹ kpụnịrọ-ọ́ ju ọ-dahịhile kpong-kpong koo.

⁷“Ọ́ tị ri kanụ byim ya ịwa nyị kpụnịrọ Amkpaa Ohe Oluhye nyịwa, aada bala ogidi ikiliya nya Ohe Oluhye ọọwa iHesekaya-à bene hụrụ lẹẹ, ọ byi ala iJuda bala ala iJerusalẹm lẹẹ ya ẹga nya ogidi ọla iJerusalẹm kem nyaa ka gbịgba lẹ ka-á?

⁸Anụ kẹwẹ kanụ chawụlẹ ọnụ bala ayịbam adịrahụ nya ala Asiriya mẹ, ó-ri kanụ ka ye angị kụ anyịrẹ lala angị ụnọ imiiye (2,000) ẹ-ẹpwụ nya angịdẹwụ nyanụ aalẹ, ọ ka ya anyịrẹ hanụ chaa ọnụ wuu!

⁹Ala Ijipiti-í danụ da ụbwọ lanyịrẹ bala ang ịrụnyẹ nyaa wẹwẹ, ánụ ka jụ ọnụ nya ẹlẹlẹhẹ họ ọngọdẹwụ ọlẹ kọ dọmwụ la dẹwụ-dẹwụ gu wuu ẹ-ẹpwụ nya ala Asiriya ka.

¹⁰Ánụ jẹ ka aalẹ, áhị wẹ kaka be ọpyị nyanụ ẹpwa ododu la o-wo bwu ẹga nya Amkpaa ene ka lẹ ka. Ọwa lịlọmwụ à byim am nyị wẹ kaka ta ẹpwụma nyanụ ayịreji lẹ!”

¹¹Ọọwa, Eliyakim bala ịChẹbụna bala iJowa-à byi olegbeju o-bwu Asiriya ọwẹ yẹkẹẹ, “Chuchuu ya ẹla tahị loja nya Arameyiki mẹ ayịbahị. Ahị woo yẹẹyẹẹ. Ā kpa iHiburu ya ẹla tahị kaka, ó-ri ịnyị ka angị kụ u-uhye nya ugulọ ka wo ẹla ọlẹ kanụ wẹẹ ya.”

¹²Olegbeju ọọwa tị waa yẹkẹẹ, “Anụ me irya kanụ bala ayịbanụ adịrahụ kem ayịbam a dum ẹrụ tọ-ọ́? Angịwẹ wuu m̄ wẹẹ ya ẹla ta ịnyịnyị lẹ. Ịwa wuu tụụnụ juwa ka go eyi nya ịlọnụ ri bala ọ hu eetịrị nya ịlọnụ nwaa ahyaahị.”

¹³Ọọwa, ọ dayị kọkọ ya ẹla gboo la iHiburu yẹkẹẹ, “Anụ wo ẹla ọlẹ ká adịrahụ ọtụka nya ala Asiriya wẹẹ ya tanụ mẹ!

¹⁴Ọ yẹkẹẹ, ‘Anụ myị ká iHesekaya a pịrịnụ ju koo. Ọ́ lọngịrị ka gbanụ kpehe bwu ẹpwụtụbwọ nyam myị ka.’

¹⁵Anụ myị kọ danụ lụgbaa nyọka dahịhile Amkpaa, kanụ ka juwa ya nyi ka gbịwa kpehe koo. Adịrahụ nya Asiriya nyị́ ka kụrụ epweji nyanụ ka lẹ ko.

¹⁶Anụ ke ụrụ la iHesekaya kaka. Anụ kpehe warị kanụ họ okpunyi ta adịrahụ ọtụka mẹ aalẹ, ọng myị ọng nyanụ ka la ịlọmwụ ka juwa ri egbe nya alakọnụ bala ikiledu nyamwụ bala ọ-ka juwa nwa enyi bwu ẹmwụ-enyi nya ịlọmwụ lokpunyi

¹⁷gbee pwụ ụka ká adịrahụ ọtụka ka wẹ kaka goonu kpa rụ ka kụ ọ-ọpyi ọkịla ọlẹ kọ lala ọpyị nyanụ anụ ayịdang. Ẹga ọọwa ri ọpyị ọlẹ ká ịkaa bala alakọnụ bala olivu bala inwa bala ang oriri datị-datị dịda.

¹⁸Ānụ myị ká ịHesekaya-ā juwa danụ lụgbaa ya Amkpaa nyị ka gbịwa kpehe koo! Anụ yẹ kpá ká ojiga nya alụma ọhẹ chị alọpyị ọọwa da bwu ẹpwụtụbwọ nya adịrahụ ọtụka nya ala Asiriya myị ẹnẹnẹhẹ lẹ-ẹ́?

¹⁹Ijiga nya ala ala ịHamatị bala ịnya ala Apadị tị́ jị ale alẹ? Ịnya ala ịSẹfavayim anyị bẹẹ? Ọhẹ-lọhẹ nyaa chị ala ịSameriya da bwu ụbwọ nyam myị anụ yẹ-ẹ̀ wẹẹ?

²⁰Oyina lẹpwụ nya ijiga ịwẹ à tị́ chị ọpyị nyaa da bwu ẹpwụtụbwọ nyam myị ẹnẹhẹ lẹ, kọ du ká Amkpaa ka gba iJerusalẹm kpehe hi ụbwọ nyam mẹ?”

²¹Ma, angịnyị wuu tụ ọnụ nyaa pịrị la o-ya ẹlẹlẹhẹ ka, chajị iHesekaya Adịrahụ daa ehile ya ẹlẹlẹhẹ ka.

²²Ụka ọọwa, Eliyakim olegbeju nya ẹpwa nya adịrahụ kọ ri ọnyị nya iHilikaya bala ịChẹbụna kọ ri akịraa ọlẹpwa nya adịrahụ bala iJowa ọnyị nya Asafụ kọ kaa kpẹhị rịrị apwụ nya igomenti a gu ịwụrụ nyaa ene ẹ-ẹpwụ nya ọkịlẹtụ ọ-kpụ enyi lẹlẹ. Ịwa angị ịta ịwẹ kele ka ẹga nya iHesekaya adịrahụ lịwụrụ nyaa ịwẹ lẹ, ị tịrọnụ joo ẹla myị ẹla ọlẹ ká olegbeju nya angịdẹwụ o-bwu Asiriya ya wuu lẹlẹ.