Read idege AYỊSAYA 40 Bible Online

AYỊSAYA 40 - idege bible

AYỊSAYA 40

¹Ohe Oluhye nyahị yẹkẹẹ, “Anụ kpụ angịnyị nyam ẹjẹ, anụ kpaa ẹjẹ!

²Anụ ya ẹla lọkọ ọkpẹnẹ ta ala iJerusalẹm, kanụ byaa mẹ ị yẹ akama nwẹhị lẹ, ị hịnyọhi ang inyibyi nyaa lẹ, Amkpaa yaa akama mwụba-mwụba chajị nya ịhọbịrị nyaa lẹ.”

³Ọmyị ọhẹ juwa dakọ gboo yẹkẹẹ, “Anụ nwụla ụgbẹyị nọ gbe Amkpaa u-ugbileji! Anụ pwọ ụgbẹyị ọpẹẹpẹẹ ọkpụrụrụ ha Ohe Oluhye nyahị u-ugbileji!

⁴Anụ ju ọkpọọ ọnyị myị ọnyị wuu, kanụ pwọ ọgbọdọ ọnyị myị ọnyị wuu cheji, ká ẹga ịkụcha-kụ̀cha wuu ā la pẹẹpẹẹ. Ká ẹga ikpori-kpòri-kpori ā la hịlẹ-hịlẹ.

⁵Ọọwa, ụmụmẹ nya Amkpaaa-à ka chehe, ká angịnyị ehe wuu ka yọọ lẹlẹ. Amkpaa lịlọmwụ myị ọnụ nya ẹlẹwẹ lẹ.”

⁶Omyi ọhẹ byim am nyị dakọ gboo mẹ! Ọọwa, m̄ tọọ wo yẹkẹẹ, “Akọ nya ẹla-ịyẹ m̄ tị́ ka da-à wẹ ene-è?” “Ya pyẹ gboo ya angịnyị wuu lala amẹ, ị há ụhị nya ọhọ-olida lala òdòdó nya ekeji.

⁷Amẹ-ẹ̀ gbu wombooo, àpwụ̀ nya ekeji-ì yẹpilooo, ụka ká Amkpaa họ ká ọhụ-ụ́ daa pileleele. Angịnyị-ị́ị̀ ri ehe gụ amẹ abwọhẹ koo, ẹla nya Ohe Oluhye nyahị tị da godayị pyịyọọ.

⁸Ịnyịlẹhị ịnyị, amẹ-ẹ̀ gbu wombooo, àpwụ̀ nya ekeji-ì yẹpilooo, ẹla nya Ohe Oluhye nyahị tị ka godayị pyịyọọ.”

⁹Ahụ iJerusalẹm ọ-kpa oja ọnyịịla warị ee, wule ka ọgbọdọ ọ-la uhye, ká ya ẹrụ ọnyịịla ọwẹ pyẹ gbooo je ịSayọn. Hu omyi nyang hwaaa, ā ju uhi kaka. Ya je epweji ịla iJuda mẹ, “Ohe Oluhye nyaa wẹẹ wẹ lẹ!”

¹⁰Ịnyịlẹhị ịnyị, Ọngọlahị Amkpaa lọngịrị, nyọka ri adịrahụ lụbwọ-ọngịrị nyamwụ. Ọ juwa wẹ luri ọnwụnwụ, kọ ka nwụ̀ angịnyị nyamwụ uri.

¹¹Ọ ka kpa ịkpịlọ nyamwụ yẹẹyẹẹ lala ọngọgbikpịlọ, ọ ka tụ anyị-ịkpịlọ guru, gyaa kpa a-abwọ nyamwụ, juwa kpa ịkpịlọ ịnanyị jẹ dụmwọ-dụmwọ.

¹²Oowo tị́ ka jẹ-ẹ̀ kpa ẹpwụtụbwọ nyamwụ me enyi olihu ẹpwụ myị-ị̀? Oowo tị́ ka jẹ-ẹ̀ me uhye-ọgba ori lụbwọ-ụbwọ myị? Ọngọhẹ hu ọpyị nya odehe ọlẹ ju egirimọọgọ moo yẹ ẹnẹhẹ lẹ-ẹ́? Ọngọngọhẹ-ẹ́ hu ịgbọdọ hwaa jẹ ilo ọlala nyaa ẹnẹhẹ lẹka, ọngọngọhẹ-ẹ́ jẹ ilo nya ikiti ka?

¹³Ọowo tị́ ka chị Amkpaa abwọ nya ang ọlẹ kọ ka họ? Oowo tị́ ka jwoo irya lee ọ-mẹ ẹla jọọ?

¹⁴Amkpaa byi ọngọhẹ ya nyị mẹ ẹla jọwa ẹnẹhẹ lẹ-ẹ́? Oowo tị́ mẹ ẹla opwoku ọhọhọ jọọ? Oowo tị́ mẹ ang jọọ, juwa mẹ ụgbẹyị ọlẹ kịị kpa họ ang jọọ?

¹⁵Ẹpwụma ilodehe wuu-ú ri ịngịngịhyẹ a-ahị nya Amkpaa ka, ị lala ụtẹ ọ-chị tee nya enyi, ịpyị ịhwẹ̀ẹ ịlẹ ká enyi dagaga ju lọọ huke-hukẹ lala ọrụ nya ọpyị.

¹⁶Ekeji ilipyinu nya iLibanọn wuu-ú nwà ọ-tụ ila nya iya ọlẹ kị ka kịla ha Ohe Oluhye ka. Iyo ịlụwa wuu-ú nwà iya ọ-rụ ila ọ-kịla họọ ka.

¹⁷Ẹpwụma wuu-ú ri ịngịngịhẹ ẹ-ẹga nyamwụ kpong-kpong ka. Ị́ dọmwụ kpụ ẹhị ẹ-ẹga nyamwụ lala ehwo nya ang ka.

¹⁸Oowo ị tị́ ka chụ Ohe Oluhye me kpá-à wẹẹ? Anyị ị tị́ ka chabwọ nyamwụ-ụ̀?

¹⁹Ị ka jẹ-ẹ̀ chwọọ me ukpeku ọlẹ ká ọlụdụwa hya, kpụ okpoko ịgọm kụrwọọ, kpa okpoko onyoowuru họọ ịnyangga gbịlẹ-gbịlẹ-ẹ́?

²⁰Ọngọlẹ kọ pwụ ụbwọ nya okpoko onyoowuru lee okpoko ịgọm ka, kaa hu okoji ọlẹ kọ ka ru ịmwụrụkpẹ ka kpa kịla ọlịbang ọ-jẹ ang yẹẹyẹẹ, nyọka ka ya kọ ukpeku ọlẹ kọ ka rị mileji ka.

²¹Anụ wo jẹ ka-á? Ị́ janụ oja gbalẹ-gbalẹ jaabwọ ká odehe bwu dọmwụ ka-á?

²²Ohe Oluhye ọlẹ kọ hụ ẹ-ẹchị-adịrahụ nyamwụ u-uhye nya odehe, ká angịnyị ehe byọọ ẹhị lala ịhụlọ à họọ lẹ. Ọ pyẹ uhye-ọgba maa lala apwụ, jaabwọ kịị ya ẹpwang nya ọdụ dakụrụ eji.

²³Ọọ pwọ ịdịrịhụ ịtụka ọmwụ cheji, yaa kpata kaka ri angịnyị ododu.

²⁴Ị lala apwụ bala amẹ, ị́ bwubwu hu kẹẹ hi eji lẹka, Amkpaa tị daa ọhụ pileleele du kị kpụ ịbwọ, ugbọchịrị kaa daa hụrụ lala ewoo nya ang.

²⁵Ohe Oluhye ọlịgọgọ juwa tọ wo yẹkẹẹ, Oowo anụ tị́ ka chụm kaka me-è? Oowo kpakpaakpa-à tị́ lala am lẹẹ-ẹ̀?

²⁶Anụ hu ẹhị hwaa wẹẹ ka uhye-ọgba wẹẹ! Oowo tị́ họ ịdịchụ ịwẹ wuu, juwa gbaa kpehe ebwebweebwo lala angịdẹwụ, juwa gu ọnyọnyọọnyị ẹnyị? Ọngịrị nyamwụ lụmẹ, ọhẹ-lọhẹ nyaa-áà gwọọ byi ka.

²⁷Ala Isirẹlụ anyị nya iJekọbụ ee, ịyẹ tị́ du kanụ juwa chị eru nyori Amkpaa-á jẹ akama nyanụ ka, lee ọ-họnụ ri kịrọrọ ọwẹ nyị ri ẹlẹlẹhẹ nyamwụ ka-à?

²⁸Ánụ jẹ ka-á? Ánụ wo jẹ ka-á? Amkpaa-à ri Ohe Oluhye o-gbe oyi myị oyi lẹ. Ọwa-à họ odehe ọlẹ wuu lẹ. Ịnyịrọ-ọ́ọ̀ chọọ pyẹpyẹ ka, ọọ kpụ ịbwọ ka, ọngọngọhẹ-ẹ́ jẹ ẹla olirya nyamwụ kpeji ka.

²⁹Ọọ ya ọngịrị ha angị la dẹwụ-dẹwụ, ọọ ya ọngịrị ha angịlẹ ká ịnyịrọ chị pyẹpyẹ.

³⁰Alụjụ ri alụjụ, ịnyịrọ kaa chaa pyẹpyẹ, anjwo ịlịwọ jugu-jugu kaa chị ẹpẹtẹkẹẹ myị.

³¹Angị godayị gbe ụbwọ ọdada bwu ẹga nya Amkpaa ka ye ọngịrị onyeewe. Ị ka hụ lachwọ ịnyịịngịrị la idu, ị ka rụnyẹ, ịnyịrọ-ọ́ tị ka chaa pyẹpyẹ ka, ị ka jẹdịyẹ, ị́ tị ka kpụ ịbwọ ka.