Read idege AYỊSAYA 41 Bible Online

AYỊSAYA 41 - idege bible

AYỊSAYA 41

¹Ohe Oluhye yẹkẹẹ, “Anụ alọpyị ịlẹga ọlụrụ ee, anụ ke ụrụ lokem ham wẹẹ. Anụ wẹ nyọka leje ọlẹ kanụ kpa, kahị tọ awụlẹ u-ube nya eje nyọka jẹ ọngọ ri oku mẹ.

²“Oowo tị́ kpa adịrahụ ọnyọọngịrị warị bwu ọmwẹnụ-ụtụrụ ene-è? Du kọ juwa kụrụ angịnyị ẹga myị ẹga kọ jẹ bwu? Oowo dala Amkpaa-à tị́ họ kụrụ iru nya ẹpwụma? Ọ du kọkụrụ ịdịrịhụ chẹẹchẹẹ, juwa kpa oge-oge nyamwụ kpaa ọnụ ri eji, kpa ịcha-ịcha nyamwụ daa igbachịwụ hụrụ.

³Ọ kwaa hwẹẹ la ịngịngịhyẹ chọọ ochuchuu ka, ọ yụnyẹ ká chaa lala ịnyaa jẹ ụgbẹyị ọwẹ ẹnẹhẹ lẹ.

⁴Oowo tị́ ju ang ịlịịwẹ họ myị-ị̀? Oowo tị́ chị eji jaabwọ ká ego nya ọngọngọọng ka la? Am Amkpaa ịnyị! M̀ juwa ji bwu ọmwụ ọdada, m̀ tị ka juwa ụka ohyẹẹkpẹ ịnyịnyị.

⁵“Alọpyị ịlẹga ọhwẹẹ yẹ ang ịlẹ kam họ, ị ju uhi hụ́ kpákpaakpa, ị dụgba wule awụlẹ warị.

⁶Alịbańg ju awụlẹ ọhụ, byi awụlẹ nyị cheri mẹ.

⁷Okebenta ju ọlụdụwa nya okpoko ịgọm ọhụ, ọngọ me ukpeku ju ọngọ gwoo iloo bawụlẹ ọhụ. Ọ juwa byi ọlụdụwa yẹkẹẹ, ‘À chakpa jẹ hya ukpeku ọlẹ lụmẹ.’ Ọọwa, i gwoo iloo, hwoo rịrị ẹ-ẹga ochii, chajị kọ ka jẹ-ẹ̀ rị mileji bwu ụwa kaka lẹlẹ.

⁸“Anụ ala Isirẹlụ anchẹ nyam ee, anụ anyị nya iJekọbụ ịlẹ kam chụ nya angịnyị nyam, anụ à ri anyị ịtụma nya Ebiraham oligu nyam lẹ.

⁹M̀ kpanụ nyà bwu ọbaba nya odehe wuu, bwu ịkịka ịlụrụ gụ wuu m̄ wụrụụnụ bwu lẹ. M̀ wụrụụnụ byinụ yẹkẹẹ, ‘Anụ a ri anchẹ nyam lẹ.’ M̀ chụnụ, ḿ nyẹẹkpẹ danụ ka.

¹⁰Anụ ju uhi ka, m̀ juwa tanụ. Am à ri Ohe Oluhye nyanụ lẹ, ọkịlẹtụ ā kpụnụ enyi ka. M̀ ka junu ọngịrị, bala ọ-ka danụ ụbwọ, m̀ ka chẹwụ keenu lụbwọ ọngịrị nyam.

¹¹“Angịlẹ kị hwahwa jahị danụ wuu, oyoyi tịtị ka jwaa. Angị kaa mwẹla tanụ wuu, ka ta ayịreji.

¹²Ị ka ta ayịreji hi odehe ọlẹ, ánụ pịlahị nyaa wẹwẹ wẹẹ, ánụ ka yaa kaka. Aluji nyanụ wuu ka yẹ ri ang ododu.

¹³Am à ri Amkpaa Ohe Oluhye nyanụ lẹ, m̀ yụbwọ chịnụ giri-giri juwa byinu yẹkẹẹ, ‘Anụ ju uhi ka, m̀ ka danụ ụbwọ.’ ”

¹⁴Ịnyịlẹhị lẹ, ahụ Isirẹlụ la dẹwụ-dẹwụ, lala ukpunjuju, ā tị ju uhi kaka. M̀ ka dang ụbwọ. Am Ohe Oluhye Ọlịgọgọ nya ala Isirẹlụ à ri Ọngọlẹ kọọ chịng da lẹ.

¹⁵M̀ ka họ ká ka lala ọnyọdịyọ ọlẹ kọ liri weri-weri. À ka gyò ịgbọdọ, daa abwọ yịgẹ-yịgẹ, à ka gyo ikiti kpụ ọrụ pwụrẹ-pwụrẹ lala ewoo nya ang.

¹⁶À ka hịraa, ká igbachịwụ ka daa hụrụ, ugbọchịrị ka daa, gyaa kpa rụ. Ụka ọọwa, anụ tị ka chị ọkẹkẹnị nyori Amkpaa ri Ohe Oluhye nyanụ, anụ ka gwogbo ha Ohe Oluhye Ọlịgọgọ nya ala Isirẹlụ.

¹⁷“Alẹbyahị bala angị ji ẹpwụ nya ọbaba-á tịtọ nya enyi ọnwanwa, kị ye ka, ká ụkpụrọkọ-ọ́ chaa ọhụ kịra-kịra, m̀ ka wẹ abwọ ọrịrị nyaa. Am Ohe oluhye nya ala Isirẹlụ-ụ́ nyẹẹkpẹ daa kpong-kpong ka.

¹⁸M̀ ka họ ká ihu ka da ọ̀bá bwu ịgbọdọ ịkwangga, ụgbụ nya enyi ka mwụ bwu ọkpọọ. M̀ ka yẹ ugbileji la ẹmwụ-enyi, ọpyị ọchọrụ ka yẹ ri ụ́gbụ́ nya enyi.

¹⁹M̀ ka họ ekeji nya isida ka bwu u-ugbileji, ekeji nya akesiya bala ịmatụlụ tụ olivu ka bwu ụ-ụwa, ekeji ịpayịn ka myị̀ ipyinu u-ugbileji ọkwangga, ekeji ijunipa bala ịsayịpịrẹsị ka bwu ẹ-ẹga nya awụlẹ.

²⁰Angịnyị wuu ka kpẹhị nya ịlaa yẹ ụkụrwọ ẹbyẹbyị, ị ka jẹ ká am Amkpaa-à họ ang ịwẹ. Ị ka jẹ ká Ohe Oluhye Ọlịgọgọ nya ala Isirẹlụ à họ ẹlẹwẹ.”

²¹Amkpaa Adịrahụ nya ala Isirẹlụ yẹkẹẹ, “Anụ ijiga nya alẹpwụma datị-datị ee, anụ kẹwẹ kaka tịrọnụ nya ang ịlẹ kanụ-ụ̀ jụ họ, kanụ gba kụm ẹ-ẹpwụ nya eje ọlala mẹ.

²²Anụ kẹwẹ kaka ya ẹla olijuju jehi, kahị jẹ ang ịlẹ kị juwa ka họ. Anụ gbe ego nya ang iligbalẹ wẹẹ, kahị me irya ju etu nyaa.

²³Ya jehi ang ịlẹ kị ka họ ijuju, kahị ka jẹ nyori anụ ri ijiga nya ịlẹhị. Anụ họ ịngịhyẹ chẹẹ kahị yẹ mẹ, ó-ri ang ọnyịịla lee ọtịpyọ wẹwẹ, chajị ká ahị ā họhị bwuu mẹ.

²⁴Anụ ri ịngịngịhyẹ ka, ụkụrwọ ododu anụ-ụ̀ họ lẹ, angị juwa dịrẹnụ tà atịra lala anụ-anụ.

²⁵“M̀ chụ olegbeju ọhẹ ẹ-ẹtẹ, ọ wẹẹ wẹ bwu ọmwẹnụ-ụtụrụ, ọ ka ju ẹnyị nyam ihi, ọ ka kụrụ ịdịrịhụ chẹẹchẹẹ lala ịnyaa kpa ata ba ịwa, bala jaabwọ ká ọngọ me ọta kaa chị ume ata.

²⁶Oowo lẹpwụ nyanụ à tị́ yẹ ọmwụ nya ẹla ọlịịwẹ neeji, kahị ka ya lẹẹ yẹkẹẹ, ‘Ọ chakpa yọyị myị̀myị’? Ọngọngọhẹ nyanụ-ị́ ya ẹla rụ ẹlẹwẹ ẹnẹhẹ lẹka, ọngọngọhẹ-ẹ́ wọ ẹla ọlịnyị bwu ọnụ nyanụ ka!

²⁷Am Amkpaa-à jene-jene ya je ala iJerusalẹm yẹkẹẹ, ‘Ẹhẹẹ, ụbwọ ọdada pwụ eji lẹ!’ lẹ. Am à ya ẹrụ ọnyịịla ọwẹ pyẹ je ala ịSayọn wuu lẹ.

²⁸M̀ kpẹhị pileji wuu, ọngọ la ẹla ọmẹjẹ ka ya-á ji ka, ịtọ ịlẹ kam tọtọ wuu lẹ, ọngọ ka waa wẹ-ẹ́ ji ka.

²⁹Ijiga ịwẹ wuu ri ang ododu, ị́ ka jẹ-ẹ̀ họ ịngịngịhyẹ myị ka, ekpeku nyaa wuu lala ehwo nya ang.”