Read idege AYỊSAYA 42 Bible Online

AYỊSAYA 42 - idege bible

AYỊSAYA 42

¹Amkpaa yẹkẹẹ, “Ọnchẹ nyam à lẹẹ lẹ, m̀ jwoo ọngịrị. Ọwa-à ri ọngọlẹ kam chụ lẹ, ẹla nyamwụ hám. M̀ ya Olegu nyam kụ tọọ, ọ ka la ẹpwụma ọnyị myị ọnyị eje ọkpẹẹkpẹẹ.

²Ọ́ ka kpụ ịkata lee ọ-dakọ koo, ọ́ ka hu omyi nọ u-uhye juwa da ọna tụ opeje-opeje da ka.

³Ùgò nya etungkohyo-ó keke ene, ọ́ ka mwọọ eku ka, ọ́ ka mịrị ila ọlẹ kọ juwa wuru myịnẹ-myịnẹ ka. Bwula ọkpẹẹkpẹẹ nyamwụ ọ ka họ kị ka yẹ ọngọngọhẹ ba ka.

⁴Ọ́ ka chata ri lee ọ-la ọkịlẹtụ ọ-kpụ enyi ka gbee kọ ka họ ká eje ọ-chị kpakpa ka ji odehe wuu. Alẹpwụma ịlụrụ-lụrụ juwa yẹhị nọ gbe ọmẹjẹ nyamwụ.”

⁵Ohe Oluhye Amkpaa họ uhye-ọgba, pyọọ maaa, ọ họ odehe bala ang myị ang ịlẹpwụ nyamwụ. Ọ ya ịhụ ọdada ha angịnyị ilodehe wuu. Ọọwa, ọ byi ọnchẹ nyamwụ yẹkẹẹ,

⁶“M̀ chụng nyọka họ ká ang ọ-họ kpakpa ka ji odehe, m̀ ya ọngịrị jung lẹ. M̀ chụng, dung ẹrụ kam ka nwa iro ta alẹpwụma datị-datị wuu bwulang, ká ka ri ahịgboo ha alẹpwụma datị-datị wuu.

⁷À ka wụrụ ahị nya alidu, bala ọ-ka gba alagba kpehe, ká ka gba angịlẹ kị jwaa agba ẹ-ẹpwụ nya ụjẹ kpehe.

⁸“Am à ri Amkpaa lẹ, ẹnyị nyam à wẹ lẹ. Ḿ ka myị ịị ya ụmụmẹ nyam ha ọngọkịla ka, lee ọ-ya ogbo nyam gwo ha ekpeku ka.

⁹Ang ịlẹ kam ya neeji ene-ene họ jịra lẹ. Ang inyeewe m̄ wẹẹ ya jenu ugbẹnyị lẹ, m̀ jam yaa jenu ene kị ka họ jịra.”

¹⁰“Anụ mwu eje onyeewe ha Amkpaa, odehe wuu ā mwu eje gwogbo họọ. Anụ alẹdịyẹ ịlẹpwụ nya ihu ịtụka, anụ gwogbo họọ! Anụ ang ịhịhị ịlẹpwụ nya ihu ịtụka, anụ gwogbo họọ! Ịpyị ịlụrụ tụụnụ anụ angị kụ ụ-ụwa, anụ gwogbo họọ!

¹¹Ugbileji bala epweji ịlụwa wuu, anụ gwogbo ha Ohe Oluhye! Anụ ala ịKẹdaa, anụ gwogbo họọ! Alepweji nya iSela-ā mwu eje nya ọkẹkẹnị, ị dako gboo bwu achinege nya ịgbọdọ!

¹²Alọpyị ịlụrụ ā gwogbo ha Amkpaa, kị mwu eje gwogbo họọ!

¹³Amkpaa ka kpehe nya ẹwụ lala ọgẹwụ, ọ ka chị ọnjịrọ nya ẹwụ. Ọ ka ya eko nya ẹwụ mileji, ọ ka kụrụ aluji nyamwụ chẹẹchẹẹ.”

¹⁴Ohe Oluhye yẹkẹẹ, “M̀ hu ujiji lụka tata lẹ, am Amkpaa wu ịlọm kpa. Ugbẹnyị lẹ, m̀ ka dakọ lala ọnyang ọ-hya ụma, ọlẹ kọ juwa chị kikiiki.

¹⁵M̀ ka ta ịgbọdọ bala ikiti ayịreji, ekeji bala amẹ wuu ka nwọnwụ bwụgẹ-bwụgẹ. M̀ ka yẹ ihu wuu la ọpyị ọchọrụ, ká ẹmwụ-enyi ọnyị myị ọnyị ka chị ọhụ kịra-kịra.

¹⁶“M̀ ka kpa alidu ụgbẹyị bwu ẹga kị chịpwụrụ bwu ẹnẹnẹhẹ ene lẹka, kpaa bwu ẹga ọlẹ kọ ka ryaa onyeewe. M̀ ka yẹ ukpowu la ahịgboo haa, họ ká ẹga ịkụcha-kụcha ka la pẹẹpẹẹ. M̀ myị ọnụ nyọka họ ang ịwẹ lẹ! M̀ ka haa jịra la o-nyẹẹkpẹ daa ka.

¹⁷Angịlẹ kị tị dahịhile ekpeku, juwa hwaa nya ihye nyaa aalẹ, oyoyi ka ri nya angịịwa.”

¹⁸Amkpaa yẹkẹẹ, “Anụ kpụ ịla kpụ, kpụ idu kpụ, anụ tị ke ụrụ kanụ wo mẹ, anụ tị kpẹhị chịng kanụ yẹ mẹ.

¹⁹Oowo tị́ kpụ idu kpụ dala ọnchẹ nyam-m̀? Oowo tị́ kpụ ịla kpụ dala ọlẹrụ nyam-m̀? Oowo tị́ kpụ idu wu ọngọlẹ kam chụ ọyị-ị̀? Ọngọhẹ kpụ idu ụma nya ịnya ọnchẹ nyam wẹẹ-ẹ́?

²⁰Anụ yọyị yẹ nwẹhị lẹ, anụ tị pwa ọ-kpa họ ụkụrwọ. Anụ ju arụ ka kpa wo ẹla, anụ tị pwa owowo.”

²¹Amkpaa kaa họ ang opwoku ụka wuu, ajị nya ọọwa lẹ, ọ hu ehile bala ọmẹjẹ nyamwụ gidogbo, ká angịnyị ka ju ihi nyaa.

²²Tị yẹ mẹ, ị wa angịnyị nyamwụ ang wụ, jwaa agba ẹ-ẹpwụ nya ajẹ, jwaa agba ịbaa-ịbaa. Ị haa agbụrụ, ị́ ye ọngọ ka chaa da ka. Ị waa ang wụ, ọngọ ka da o-taá ya: “Anụ tịrị ang nyaa ẹkpẹ haa” á ji ka.

²³Oowo lẹpwụ nyanụ à tị́ ka ke ụrụ-ụ̀ wẹ, kọ ka kpa ẹhị chịng chajị nya ijuju?

²⁴Oowo tị́ ya ẹga da kị wụ ala Isirẹlụ ang wụ? Amkpaa ọlẹ kpangga kị họ ọhọbịrị ba ịnyị! Ị́ myị ba ọmẹjẹ nyamwụ jẹ bala o-ju ihi nya ehile ịlẹ kọ daa ka.

²⁵Ịnyị à du kọ hiri agbama nyamwụ eji wẹ uhye nyaa, taa ayịreji ẹ-ẹwụ lẹ. Agbama nyamwụ wuru dagaga jwaa, ọ́ tị ri enyi ọ-jụ eji nyaa ka. Ị rụ ila lẹgẹgẹhẹ hi ka, ọọwa-á tị mẹ ẹla jaa ka.