Read idege AYỊSAYA 43 Bible Online

AYỊSAYA 43 - idege bible

AYỊSAYA 43

¹Isirẹlụ ee, Amkpaa ọlẹ kọ họng yẹkẹẹ, “Ā ju uhi ka, m̀ chịng da lẹ. M̀ wụrụng gung ẹnyị, à ri ịnyam lẹ.

²Ụka ká juwa chịpwụrụ bwu ụjẹ-ẹmwụ m̀ ka juwa tang. Á chịpwụrụ bwu ihu nya akama, á ka byi enyi ka. Á chịpwụrụ bwu ẹpwụ nya ila, ila-á ka bang ka, ila nya ịmayẹ-ẹ́ ka rụng ka.

³Am à ri Amkpaa Ohe Oluhye nyang lẹ, am Ọngọ Ọlịgọgọ nya ala Isirẹlụ kam chịng da ịnyị. M̀ hu Ijipiti da ekeji-ọyị hang, m̀ hu ala Itiyopyiya bala ala ịSẹba ha ku ọmwakpa nyang.

⁴Ajị nyọlẹ ká kọm ẹhị kam ya ihi ọlala hang à du kam ya ẹpwụma ịkịla ha ku ọmwakpa nyang lẹ, ọọwa-à du kam kaa go angịkịla ga ha igu ọkọkọ nyang lẹ.

⁵Ā ju uhi ka, chajị m̀ juwa tang. “M̀ ka kpa angịnyị nyang nyà tịrẹkpẹ wẹ ẹpwa bwu ọmwẹnụ-ụtụrụ lalaala kaka ju ka ọmwẹnụ-obyi ẹga kị ji.

⁶M̀ ka byi alẹtẹ kị ka pẹ hyaa nyà bala aledii kị ka waa kpa ụ-ụwa kaka. M̀ ka ya kị ka tụ hi anyị alẹng bala anyị anyang nyam nyà bwu ịkịka nya odehe ọnyị myị ọnyị.

⁷Ịwa wuu à ri angịnyị nyam am Ohe Oluhye, kam họ nyọka kpa ihi warị wam lẹ. Am à haa lịlọm lẹ.”

⁸Ohe Oluhye yẹkẹẹ, “Anụ gba angịnyị nyam kpehe warị mẹ, ị ju ahị ju, ị́ tị kpa yọyị ka, ị ju arụ ju, ị tị kpụ ịla tịyẹ-tịyẹ.

⁹Alẹpwụma datị-datị ā wẹ ịlahị nya eje mẹ. Ojiga nyaa oyina-à tị́ yẹ ọmwụ neeji chajị nya ang ịlẹ kị wẹẹ họ lẹẹlẹẹ? Oowo nyaa-à tị́ jẹ ẹla olijuju? Ị kpa alibeenu nyaa warị, chajị kahị jẹ nyori ẹla nyaa la kpakpa, ká angịkịla-ā wo kị jẹ ịnyịlẹhị mẹ.

¹⁰“Anụ ala Isirẹlụ ẹẹ, anụ à ri alibeenu nyam lẹ, anụ m̄ chụ nyọka ri ọnchẹ nyam lẹ. M̀ họ ịnyị kanụ ka jẹm bala ọ-myị lam, kanụ ka jẹ nyori am kẹnẹ-kẹnẹ à ri Ohe Oluhye lẹ. Ohe ọhẹ-ẹ́ ji dalam kaka, Ọhẹ-ẹ́ ji ene nyam ka, ọhẹ-ẹ́ tị ka ji ẹ-ẹkpẹ nyam kaka ịnyịnyị.

¹¹“Am ụbwọm kẹnẹ-kẹnẹ à ri Amkpaa lẹ, ọngọchịda ọhẹ-ẹ́ ji dala am kaka.

¹²M̀ tị́ ya neeji ene nyori m̀ ka chịnụ da, m̀ tị chịnụ ịnyịlẹhị. Ojiga nya alụmẹ ọhẹ-ẹ́ họ ịịwẹ jẹ lẹka, anụ ayịdang ri ibeenu nyori am à ri Ohe Oluhye lẹ.

¹³Am à ri Ohe Oluhye lẹ, am à tị ri ịnyị gbe oyi myị oyi lẹlẹ. Oowo tị́ ka jẹ-ẹ̀ be bwu ụbwọ nyam myị. Ang kam họ ene lẹ, ọngọngọhẹ-ẹ́ ka jẹ-ẹ̀ pyọọ kaka.”

¹⁴“Amkpaa ọngọ chịnụ da, Ọngọ Ọlịgọgọ nya ala Isirẹlụ yẹkẹẹ, “Ajị nyọka chịnụ da lẹ, m̀ ka du alẹwụ yahị da ala ịBabịlọn, tụrụ ogirigba ịlụwa wuu, iwuru nyaa ka yẹ la ida ọbaba.

¹⁵Am à ri Amkpaa Ọngọ Ọlịgọgọ nyanụ lẹ. Am à họnụ anụ ala Isirẹlụ, ri adịrahụ nyanụ lẹ.”

¹⁶Amkpaa yẹkẹẹ, “Am à ri Amkpaa ọ-da ụgbẹyị chị ihu ọtụka eku lẹ, da ụgbẹyị bwu ẹpwụ nya enyi ịtụka.

¹⁷M̀ du alẹwụ ju lang ịrụnyẹ bala anyịrẹ nyaa angịdẹwụ ịtụka chọọ. Ị wẹ tutuutu kaka byi enyi hyẹkẹm, ị́ ka jẹ-ẹ̀ kpehe myị ẹnẹnẹhẹ kaka, ị myị̀ pwẹm lala ila nya otinika!”

¹⁸“Anụ deeri nya ala inyogo mẹ, ānụ kụ irya ju ang ịlẹ kị họ kam kpá gbalẹ-gbalẹ lẹ kaka.

¹⁹Anụ ya ẹhị nọ gbe ang onyeewe ọlẹ kam wẹẹ ka họ mẹ. M̀ dọmwụ nyamwụ-ụ̀ wẹ lẹ, ánụ yọọ lẹka-á? M̀ wẹẹ da ụgbẹyị bwu ugbileji, da ọ̀bá nya enyi bwu ẹga ịkwangga.

²⁰Iyo ịlẹpwamẹ ri iyo ịlẹpwamẹ ka jum ihi, ikirom bala ịgbangkịrọ jim obe, nyọlẹ kam họ ká enyi da ọ̀bá u-ugbileji, juwa mwụ ká angịnyị ịlẹ kam chụ ka ye nwa.

²¹Ịwa-à ri angịlẹ kam họ la ịlọm nyọka ya ogbo nyam pyẹ lẹ.”

²²“Anụ ala Isirẹlụ angịnyị nyam ee, ánụ tị myị gbịgba ham ka, ẹla nyam chịnụ aga pwẹẹpwẹẹ.

²³Ánụ kpa ịkpịlọ warị kaka kịla iya ị-rụ ila ham ka, ánụ jum ihi bwula ọ-kịla iya ham ka. Ḿ tị ya olo nịrọọnụ nyẹẹnyẹẹ nyọka kpa ọhaha wam lee ịtangare o-ju ịla ham ka.

²⁴Ánụ ra ịtangare ichoru kwọkwọ wam lee ọ-ya eyo nya iyo ikiliya nyanụ ham ka. Ọkọkọ nya ọọwa lẹ, anụ juwa kpa olo nya ịhọbịrị nyanụ tụ rịrịm, olo nya abyị nyanụ-ụ́ myị m̄ dọhụ rwẹẹ kaka.

²⁵Am à tị ri ọngọ kaa hịnyọhi ịhọbịrị nyanụ lẹ. M̀ họ ịnyị chajị nya ọngọlẹ kam ayịdang ri, m̀ tụ hi ang inyibyi nyanụ ga hanụ lẹ.”

²⁶“Anụ kẹwẹ kahị ka ube oleje wẹẹ. Anụ la ẹla lẹ anụ tịrọnụ-ụ̀ wẹ, kahị jẹ oku oriri nyanụ mẹ.

²⁷Adanụ ogogo nya ọgbanyẹ ho ang onyobyi, alegbeju nyanụ wuu bịrị ehile nyam ịnyịnyị.

²⁸Ịnyị à du kam chị oyoyi ju angịkiliya ilube ịgọgọ, ya iwe da kị ka ta Isirẹlụ ayịreji, kị ka ju angịnyị nyam ẹpẹ lẹ.”