Read idege AYỊSAYA 44 Bible Online

AYỊSAYA 44 - idege bible

AYỊSAYA 44

¹Amkpaa Ohe Oluhye yẹkẹẹ, “Ke ụrụ lam wẹẹ, ahụ Isirẹlụ ọnchẹ nyam, anụ angịnyị ịlẹ kam chụchụ, anụ anyị ịtụma nya iJekọbụ.

²Am a ri Amkpaa ọlẹ kọ họng lẹ. Bwu ụka ọlẹ ka juwa ẹ-ẹpwụ nya ịnang, m̀ kaa dang ụbwọ. IJekọbụ ọnchẹ nyam ee, ā juhi ka, anụ angịnyị ịlẹ kam chụ.

³“M̀ juwa ka ya enyi ha ọpyị ọlẹ ká imyi-enyi nwụ, m̀ ka họ ká enyi ka da ọ̀bá bwu ọpyị ọchọrụ. M̀ ka hu olegu nyam kụ ẹpwụ nya anyị nyanụ, ahị ọwawa nyam juwa u-uhye nya anyị ịtụma nyanụ.

⁴Anyị nyanụ ka pyẹ lala amẹ ịlẹpwụ nya enyi ọlụwa, ị ka nwa lala abegu ịlụtọ.

⁵“Angịhyẹ ka juwa yẹkẹẹ, ‘Ahị ri nya Amkpaa.’ Angịkịla ka ya ịlaa jula ala Isirẹlụ, bala ọ-da ẹnyị nyam ba ịlaa ụ-ụbwọ bala ọ-wa ịlaa nya ala Isirẹlụ.”

⁶Amkpaa Adịrahụ nya ala Isirẹlụ ọngọ chọọ da, kọ ri Amkpaa Agụgụ yẹkẹẹ, “Am a ri ọmwụ ọdada bala ọbaba, ọlẹ kọ ri Ohe Oluhye kẹnẹ-kẹnẹ lẹ. Ohe Oluhye ọkịla ọhẹ-ẹ́ ji dalam kaka.

⁷Oowo tị́ lala am myị-ị̀? Ọngọọwa ā ya dodehe mẹ. Bwu oyoyi nya alene oowo à tị́ kaa yẹ ọmwụ nya ang ịlẹ kị ka họ ị-ịlahị bwu ọmwụ ọdada ka ju ka ọbaba nya odehe myị-ị? Ọngọọwa-ā warị ka ya jehi mẹ.

⁸Anụ juhi ka, anụ tị chị uko ka. M̀ tị́ ya jenu bwu ọmwụ ọdada gbalẹ-gbalẹ ene nya ang ịlẹ kị juwa ka họ. Anụ ayịdang tị ri ibeenu nyam, Ohe Oluhye ọhẹ ji ẹgẹhẹ kam wo jẹ ka-á? Eheehe, Ẹjwọ ọkịla ọhẹ ọkịla-á ji dalam kaka.”

⁹Angịlẹ wuu kị kaa họ ekpeku ri angịnyị ihideeji, ijiga ịlẹ kị laa nya ang nya ịlẹhị-ị̀ wẹẹ ri ododu. Angị kpụ eteji ha ijiga ịwẹ kpụ idu chwiichwii, ị́ jẹ ịngịngịhyẹ ka, oyoyi à ri nyaa lẹ.

¹⁰Ọ hụ chịng, kọ ukpeku nyọka kpụ eteji ha tị́ ju apyobwuna nya ịyẹ?

¹¹Oyoyi ka ju angịlẹ wuu kị wẹẹ kpụ eteji ha ekpekụ ịwẹ, angị hyà ekpeku ịwẹ wuu, angịnyị ehe ị ri lẹ. Ịwa wuu a kpehe warị nya eje ọlala mẹ, uhi ọtụka-ọtụka ka jwaa ju, oyoyi ọtụka ka jwaa ịnyịnyị lawụlẹ-awụlẹ.

¹²Ọlụdụwa hu eku nya oje dụrụ ila, kpa ọjị́ ọ-hya ụwa mịlọọ. Ọ kpa ọngịrị nyamwụ wuu hyà oje ọwẹ jaabwọ kọ họọ, imyi ọlẹpwụ juwa kpọọ nwụ, imyi-enyi nwọọ bwu oye ọkịla, lịnyịrọ chọọ pyẹpyẹ gu ụkụrwọ ọwẹ.

¹³Okebenta me okoji ori, kpa ịpẹnchụrụ jwoo ẹjẹẹ. mọọ hịlẹ-hịlẹ lẹma ọ-kpa ma ekeji, kọọ labwụma nya ọngịnyị, há ụhị kpá nwurwo-nwurwo, ị tị ya rịrị u-ube nya ojiga.

¹⁴Ọhẹka, ọ kele ka chị okoji nya isida lee ooku lee ịsayịpịrẹsị bwu ipyinu lee ọlẹ kọ chị rịrị ha ịlọmwụ ọlẹ ká enyi juwa do ju.

¹⁵Ọngịnyị hu ẹgẹhẹ nya okoji, ọ ya ju ila, ọ ya ẹga ọkịla nyamwụ kọ ukpeku. Ọ ka hu ẹgẹhẹ nyamwụ tụ ila ju ha ịlọmwụ wo myị lee ọ-kpa họ ịkaa ọlẹ kọ ka ri. Ọ ya ụpa ọkịla nya okoji ọwẹ kọ ukpeku, juwa kụ eteji họọ lẹlẹ.

¹⁶Ọọ be ụpa nya okoji ọwẹ ju ila, kpa iyo nyamwụ ka hya i-ila ọwẹ ya ri wu ẹpwụ kpọngkpọng. Ọọ wo ila, lịnyịrọ chọọ ịla gbigbiigbi lẹ, ọ yẹkẹẹ, “Ẹhẹẹ. Ẹẹla à lẹẹ wẹẹ ka-á? Ịnyịrọ họm gbigbiigbi lẹ.”

¹⁷Ọ́ hu eku ohihi nya okoji ọọwa, ọ ya kọ ukpeku nya ojiga nyamwụ, ọ hiri kpẹẹ kpụ eteji họọ, juwa raabwọ họọ yẹkẹẹ, “Ahụ à ri ojiga nyam lẹ, chịm da mẹ.”

¹⁸Ụma nya angịnyị ịlịịwẹ chị ẹjị chwiichwii ị́ jẹ ang ọlẹ kị wẹẹ họ ka, ahị nyaa tụ pịrị, ị́ jẹ yọyị ka, irya nyaa tuku ẹla nya ịlẹhị, ị́ jẹ ọdawụlẹ nya ẹlẹlẹhẹ ka.

¹⁹Ọngọ kọ ekpeku-ú kụ irya chịng kpá chẹẹ ka. Ịnọ ọ ka ya ẹla ta ịlọmwụ yẹkẹẹ, “M̀ ya eku ọhẹ nya okoji ọlẹ tụ ila ju, họ ịkaa nyam a-awụrụ-ila nyamwụ bala ọ-ya iyo hya u-uhye nyamwụ ri. Ee lẹ, ányị ohihi nyamwụ à tị ka jẹ-ẹ ri ojiga, kpụ kam ka hirikpẹẹ ya arụụ kụ eji ha okoji ọlam-ọlam ọlẹ mẹ?”

²⁰Uchi nyamwụ lụmẹ gbee lala ịnyaa ka chị ụjẹ-ọpyị nwa. Irya nyamwụ kpọọ hwahị, ọ́ ka jẹ-ẹ̀ da ịlọmwụ ụbwọ ka. Ọ́ dọmwụ jẹ tọ ịlọmwụ wo-ò wẹ yẹkẹẹ, “Anụ ya ká ukpeku ọlụbwọ nyam ọlẹ-ẹ́ ri ang ọnọọkịla lẹẹ ka-á? Ohe ọlam-ọlam ka jẹ-ẹ̀ la ịlẹ-ẹ́?” ka.

²¹Amkpaa yẹkẹẹ, “Isirẹlụ ee, aa kpịtịya nya ang ịlẹ mẹ, kpịtịya nyori à ri ọnchẹ nyam mẹ. M̀ họng ká ka ri ọnchẹ nyam, ḿ ka jẹ-ẹ deeri hing kpa ẹnẹnẹhẹ kaka.

²²M̀ tụ ang inyibyi nyang tuu hụrụ lala egbamwụ. M yịlẹ ịhọbịrị nyang hụrụ jaabwọ ká amwụ kaa go ba. Anụ nyà tịrẹkpẹ chịm ọgụ mẹ, chajị m̀ gbanụ kpehe lẹ.”

²³Uhye-ọgba ā mwu eje mẹ! Anụ ẹga ikpori-kpori nya odehe ā dakọ gboo mẹ, anụ ịgbọdọ tụ ekeji ilipyinu wuu, anụ mwu eje mẹ ịnyịnyị mẹ, chajị Amkpaa gba anyị ịtụma nya iJekọbụ kpehe lẹ, ee, ọ chị ụmụmẹ nyamwụ ehe bwula ọ-chị Isirẹlụ da lẹ.

²⁴Amkpaa ọngọ gbanụ kpehe yẹkẹẹ, “Am à yang ju ịnang ẹ-ẹpwụ lẹ. Am a ri Amkpaa ọlẹ kọ họ ang wuu lẹ. Am a pyẹ uhye-ọgba maa dụwẹ papịla lẹ, Am lịlọm à pyẹ ọpyị maa lẹ.

²⁵M̀ kpa alegino hu utungguru, m̀ da ọmwụ ọyẹyẹ nya alọmwụ ịnịịkịla-á họ jịra ka, m̀ ta ẹla ọjẹjẹ nya angị jẹ ang iri, yaa ka ri ang uchi.

²⁶M̀ họ ẹla ịlẹ ká anchẹ nyam-ḿ ya kaa họ jịra, ẹla ọnyị myị ọnyị ká alẹrụ nyam-ḿ ya, m̀ kaa haa jịra. M̀ byi ala iJerusalẹm ya angịnyị ka nyà tịrẹkpẹ ka kụ ụwa wẹẹ! M̀ byi alepweji ịla iJuda ya ị ka ma epweji nyaa nwụ wẹẹ. Epweji ị-kpụ egwawụ-egwawụ ịwẹ, m̀ ka tịraa ẹkpẹ kaka la jaabwọ kị la ene.

²⁷M̀ byi ihu ọtụka yẹkẹẹ, ‘Nwụ kịra-kịra mẹ.’ Ị nwụ i-ijata-ijata.

²⁸M̀ ya ẹla rụ ịSayịrọsị yẹkẹẹ, ‘Ọwa-à ka kpẹhị rịrị angịnyị nyam lẹ, ọ ka họ ang myị ang ọlẹ kam byoo, ọ ka ya nyị ma iJerusalẹm nwụ mẹ, kịị nyị ya itiwe nya Ube nya Amkpaa yeji mẹ.’ ”