Read idege AYỊSAYA 45 Bible Online

AYỊSAYA 45 - idege bible

AYỊSAYA 45

¹Amkpaa chụ ịSayịrọsị nyọka ri adịrahụ, kọ ka dẹwụ kụrụ alẹpwụma datị-datị, nyọka nu ịdịrịhụ ọngịrị nyaa deeji. Amkpaa ka wụrụ ogirigba nya epweji ịtụka họọ, ị́ ka tukwoo kaka.

²Amkpaa ya ẹla ta ịSayịrọsị yẹkẹẹ, “Am ayịdang ka ji ịlahị nyang kaka bwuru ịgbọdọ pẹẹpẹẹ, bịrị ekpileku nya oje ọnyọmịla bala ọ-chị igbilo iloje-oje nyaa eku.

³M̀ ka tụ ụdụ ịlẹ kị ya kpịbaa kpịrẹ-kpịrẹ rịrịng chajị ká ka jẹ kam a ri Amkpaa, Ohe Oluhye nya ala Isirẹlụ ọlẹ kọ be ẹkọ wụrụng lẹnyị ọlẹ ká ri.

⁴Ajị nya Isirẹlụ ọnchẹ nyam ọlẹ kam chụ à du kam wụrụng nyọka họ ụkụrwọ ọlẹ-ẹ̀ wẹ lẹ, m̄ ya ihi ọtụka-ọtụka hang lẹ, ịnọ ahụ ayịdang á jẹm jẹ ka.

⁵“Am a ri Amkpaa ụbwọm lẹ. Ijiga wuu-ú ri ịngịngịhyẹ ka. M ka ya ọngịrị hang, ịnọ á jẹm jẹ ka.

⁶M̀ họ ang ịlẹ ká ọng myị ọng ka jẹ bwu ọbaba nya odehe ọhẹ ka ju ka ọbaba ọkịla nyori ojiga ọhẹ-lọhẹ-ẹ́ ri Ohe Oluhye ka. Am ụbwọm a ri Amkpaa lẹ. Ijiga wuu á ri ịngịngịhyẹ ka.

⁷Am à họ ahịgboo bala ukpowu lẹ, m̀ kaa họ ahị ọwawa kaa ji, akama ọyẹyẹ tị kaa ji ịnyịnyị. Am Amkpaa-à kaa họ ang ịlẹ wuu lẹ.

⁸Uhye-ọgba ka do abwẹla ọnyịịla lala enyi, odehe ka pyẹ ọnụ da nyọka ye myị, ká ọchịda bala abwẹla ọnyịịla ka bwu kpehe. Am Amkpaa ka họ ká ang ịwẹ ka lịnyị.”

⁹Ọngọ rụ arụ ta ọngọ họọ-ọ aalẹ, ọ gbu hụrụ lẹ! Ọta ká jẹ-ẹ̀ bá ẹla ta ọngọ moo-ò me-é? Ọ kaa tọ ọngọ moo-ò me wo yẹkẹẹ, “Ịịyẹ ā tị wẹẹ me ene-èé?” Ọta kaa byi ọngọ moo-ò mẹ yẹkẹẹ, “Ụkụrwọ nya ụbwọ nyang chakpa tịpyọ lụmẹ-ẹ́!”

¹⁰Ọngọngọhẹ kaa byi adamwụ yẹkẹẹ, “Adam ee, ịyẹ tị́ du ká mam-m̀?” Lee o-byi ịnamwụ, anyị tị́ du ká mam ịịlẹ-ẹ̀ẹ́?

¹¹Amkpaa Ọngọ Ọlịgọgọ nya ala Isirẹlụ ọngọ họ ala Isirẹlụ yẹkẹẹ, “Ọngịrị oyina anụ tị́ la nyọka tọm ịtọ chajị nya anjwo nyam lee ọ-ka mẹjẹm ang ọlẹ kọ chịla kam ka họ-ọ̀?

¹²Am a tị́ họ odehe ọlẹ wuu, bala ọ-họ angịnyị ehe nyọka kụ am̀. Am à kpa ụbwọ nya họ u-uhye-ọgba lẹ. Am lịlọm à wu ẹnụ bala ọya bala ịdịchụ kpa-à wẹ lẹ.

¹³Am à chụ ịSayịrọsị nyọka họ ang ọlẹ kam tọ lẹ. M̀ ka kpọọ ụgbẹyị nya ang ọlẹ kọ ka họ. Ọ ka ma iJerusalẹm epweji nyam nwụ, bala ọ-ka tụụbwọ hi angịnyị nyam ịlagba kị ka lịlaa. Ọngọngọhẹ-ẹ́ ka bọọ olo lee ọ-nwọọ uri ene ka.” Amkpaa Agụgụ à ya ẹla-à wẹ lẹ.

¹⁴Amkpaa byi angịnyị nyamwụ yẹkẹẹ, “Ụdụ nya ala Ijipiti bala ịnya ala Itiyopyiya ka yẹ ri ịnyanụ, ala ịSẹba ị-la uhye gbọnggbọng ịwẹ ka yẹ ri anyịhị nyanụ. Ị ka dịrẹnụ lala alagba, wẹ kaka hirikpẹẹ ya arụụ kụ eji ị-ịlahị nyanụ, kị ka juwa ya dodehe yẹkẹẹ, ‘Ohe Oluhye juwa tanụ, ọwa ụbwọọmwụ a ri Ohe Oluhye lẹ, ọngọngọhẹ á ri Ohe Oluhye dalọwa kaka.’”

¹⁵Ịnyịlẹhị ịnyị, ahụ Ohe Oluhye nya ala Isirẹlụ ri ọngọlẹ kaa chị angịnyị nyang da, à kaa kpụ ịlọng ịbaa.

¹⁶Oyoyi ọtụka ka ju angị kaa họ ekpeku, ị ka rụ loyi mọmbọọọ.

¹⁷Ma, Amkpaa tị ka chị ala Isirẹlụ da. Ị ka la ọkụrụ-kụrụ pyịyọọ, oyoyi-í ka jwaa gụ ọwẹ kpong-kpong ẹnẹnẹhẹ kaka.

¹⁸Amkpaa-à họ uhye-ọgba lẹ, ọwa-à ri Ohe Oluhye ọlẹ kọ odehe jaabwọ kọ la lẹ. Ọ ya odehe yeji giri-giri. Ọ́ họọ dam luhwo-luhwo ka, ọ họọ ká angịnyị ka kụ am̀. Ọwa lịlọmwụ yẹkẹẹ, “Am à ri Amkpaa lẹ, ọngọkịla ọhẹ-ẹ́ ji dalam kaka.

¹⁹Ḿ kaa ya ẹla nyam ị-ịbaa-ịbaa ka, lee ọ-chayị nya irya nyam nwini-nwini ka. Ḿ tị byinu anụ anyị ịtụma nya iJekọbụ ya anụ pịlahị nyam tụ ababayịreji da mẹ ka. Am a ri Amkpaa lẹ, m̀ kaa ya ẹla nya ịlẹhị, juwa ya dodehe gede-gede ang ọlẹ kọ chịla.”

²⁰Amkpaa yẹkẹẹ, “Anụ alẹpwụma datị-datị, anụ tụ warị kaka jịra ẹ-ẹga nyam mẹ, anụ angị be igu-ọnụ bwam-bwale. Anụ chakpa chị uchi, anụ angịlẹ wuu kanụ wẹẹ kpa ekpeku tụ ịlọnụ da, juwa kpụ eteji ha ijiga ịlẹ kị ka chịnụ da myị ka.

²¹Anụ kpehe warị kaka tịrọnụ nya ẹla nyanụ mẹ, anụ hu ẹkpẹ nya ẹla ọlẹ kanụ ka ya mẹ. Ọọwo à tị́ yẹ ọmwụ nalọ ya ang ịlẹ nyị juwa ka họ? Aam Amkpaa ọlẹ kam chị angịnyị nyam da à ya dodehe ka-á? Ohe Oluhye ọkịla ọhẹ-ẹ́ juwa dalam kaka. Am a rị Ohe Oluhye ọlabwẹla ọnyịịla bala ọngọchịda lẹ. Ọngọkịla ọhẹ-ẹ́ ji ẹgẹhẹ dalam kaka.”

²²“Anụ alodehe wuu, anụ jahị kpáta wẹ ẹga nyam kanụ la ọchịda mẹ. Am ụbwọm a ri Ohe Oluhye lẹlẹ. Ọngọkịla ọhẹ-ẹ́ ji kaka.

²³M̀ ya ọnụ ọmyịmyị nyam deeji ene lẹ, M̀ ịngịngịhyẹ-ẹ́ ka jẹ-ẹ̀ pyọọ kaka. M̀ ya ẹlẹwẹ nya ịlẹhị-ịlẹhị nyori, Ọng myị ọng wuu ka wẹẹ kaka ya arụụ kụ eji ham, kị ka nwa iro dodehe nyọka bam jẹ.”

²⁴“Angịnyị wuu ka ya ẹla rụm ya, ẹga nyam ọkụrụ-kụrụ bala ọngịrị nyaa bwu lẹ. Angịlẹ wuu ká am Amkpaa-á waa ẹjẹ aalẹ, ị ka wẹ ẹga nyam, oyoyi tị ka ri nyaa.

²⁵M̀ ka gba anyị ịtụma nya ala Isirẹlụ wuu kpehe, ị ka gwogbo ham.”