Read idege AYỊSAYA 46 Bible Online

AYỊSAYA 46 - idege bible

AYỊSAYA 46

¹“Ojiga ịBẹlụ hirikpẹẹ, ojiga iNebo yahị cheji lẹ, ịnọ ịwa-à tị́ ri ijiga ịtụka nya ala ịBabịlọn, ugbẹnyị lẹ, ị jwaa olo rịrị ibyiyó u-uhye lẹ, olo ọnyẹẹnyẹẹ ká iyo ịlẹ ká ịnyịrọ chị pyẹpyẹ juwa kpa.

²Ijiga nyaa ịịwa tụ iyo ịlẹ kị kpa olo nya che egbeju kpọkọọ, ị́ lọngịrị ka chị awụlẹ da myị ka. Ị gyaa lawụlẹ-awụlẹ kpa rụ ka agba.”

³Anụ ala Isirẹlụ, anụ ke ụrụ lam kanụ wo, anụ angị ihihi nya anyị ịtụma nya iJekọbụ. M̀ kpanụ ụ-ụbwọ ịịlẹ hweee bwu ụka-ụka kị manụ.

⁴Am a ri Ohe Oluhye nyanụ lẹ, m̀ ka kpẹhị rịrịịnụ gbee kanụ ka ri angịgbahị bwu inyi inyiiwuru. Am a họnụ lẹ, m̀ ka kpanụ. M̀ ka gbenu bala ọ-chịnụ da.

⁵“Oowo anụ tị́ ka chụ pwokum kpong-kpong wẹ-ẹ̀, lee ọ-ka chụ mem ká ọngọọwa ka tam meme kam bala ọwa la ookpokpo-ò?

⁶Angịhyẹ pyẹ ịkpambwọ nyaa maa, gba okpoko ịgọm kpehe bwu ụwa bwọọọ. Ị gba okpoko onyoowuru, moo ju ang. Ị kele ka diro ọlụdụwa nyọka ya hyà ukpeku. Ọọwa, ị hirikpẹẹ juwa kpụ eteji họọ lẹlẹ.

⁷Ị hwoo nọ ụmwụchwọ nyaa juwa kpa rụ, ụka kị yọọ rịrị ẹ-ẹga kọ ka ji lẹ, ụwa ọọ rịrị lẹlẹ. Ọ́ jẹ-ẹ̀ pyị giri hi ẹga ọlẹ kị yọọ rịrị kaka. Ọngịnyị á raabwọ rị họọ, ọ́ ka jẹ-ẹ̀ wẹ ka, ọ́ tị ka jẹ-ẹ̀ chọọ da bwu ẹpwụ nya akama ka.

⁸Ānụ deeri nya ang ịlẹ kam họ kokoo, ānụ angị họ ang onyobyi, anụ-ụ̀ kpọọ ọ-ọkịlẹtụ mẹ.

⁹Anụ kpịtịya nya ang ịlẹ kam họ lụka onyogo lalẹẹ gbalẹ-gbalẹ mẹ. Am a ri Ohe Oluhye lẹ, Ohe Ọluhye ọkịla ọhẹ-ẹ́ ji dalam kaka. Ọngọngọhẹ-ẹ́ ji kọ lala am kaka.

¹⁰Bwu ọmwụ-ọmwụ ọdada, m̀ ya dodehe ang ịlẹ kị ka họ lụka ohyẹẹkpẹ. Bwu ụka-ụka nya alene, m̀ ya dodehe ang ịlẹ kị họhọ lẹka. M̀ ya dodehe nyori obyi omeme nyam ka godayị giri-giri, m̀ ka họ ang myị ang ọlẹ kam la i-irya nyọka họhọ.

¹¹M̀ wẹẹ wụrụ ọlẹng ọhẹ bwu ọmwẹnụ-ụtụrụ ọlẹ kọ ka la kpịra-kpịra lala ụpa. Ọ juwa bwu ọpyị ọlụrụ warị kọ ka họ irya nyam jịra. Ẹla myị ẹla ọlẹ kam ya wuu lẹ, m̀ ka haa jịra ịnyịnyị.”

¹²“Anụ ke ụrụ lam mẹ, anụ angị la egbeju-ọngịrị, anụ me irya kpá ká ọkụrụ-kụrụ ọlẹ kanụ ka la hi lụrụ wẹẹ.

¹³Ọ́ ka tata kpá pyịnyẹng ka, m̀ juwa tụ ẹnụtụrụ ọlẹ kanụ ka la ọkụrụ-kụrụ warị ahyaahị. Ḿ ka họ atịma ju ọchịda nyam ọ-kpa warị kaka. M̀ ka chị iJerusalẹm da, chajị ká Isirẹlụ ka la ihi ụ-ụwa.”