Read idege AYỊSAYA 47 Bible Online

AYỊSAYA 47 - idege bible

AYỊSAYA 47

¹Amkpaa yẹkẹẹ, “ỊBabịlọn ee, hireji bwu ẹchị-adịrahụ nyang, ká warị kaka hụ ị-ịpyị. À kpụ ẹhị bala ọ-há ụhị kpá lala ọnjwo ịyang ẹnẹhẹ lẹ, epweji ọlẹ kịị kụrụ myị ka. Ọngọngọhẹ-ẹ́ tị ka wụrụng ọlụhị kaka.

²Hị igo da, ká go ambakpa! Nwụla apwụ o-ke ahị nyang hi ịlọng, pwọ awụrụ nyang, ká go itobyi nyang ka uhye hi ata, ká bwu ẹpwụ nya ọ̀bá kpoye kịnyaa.

³Angịnyị ka yẹ o-ji lọhị-lọhị nyang, oyi ọtụka ka jung gede-gede. M̀ ka họng kwiwa ugbẹnyị lẹ, ọngọngọhẹ-ẹ́ ka be myị kaka.”

⁴Ọngọgbahị kpehe ọlẹ ká ẹnyị nyamwụ ri Amkpaa Agụgụ à ri Ọngọ Ọlịgọgọ nya ala Isirẹlụ lẹ.

⁵“Amkpaa byi ịBabịlọn yẹkẹẹ, Hụhụ lọnụ-ujiji kem ẹ-ẹpwụ nya ukpowu mẹ. Ọngọngọhẹ-ẹ́ ka wụrụng adịrahụ ọnyang nya alẹpwụma datị-datị kaka.

⁶M̀ ju agbama ta angịnyị nyam ụka ọhẹ lẹ, m̀ haa kpá lala ịwa nyaa ri angịnyị nyam ka. M̀ hwaa jung ụ-ụbwọ ụka ọkẹkpẹ, ụka ọọwa, á jujwo nyaa chẹẹ ka. Angịlẹ kị dọmwụ ri angịgbahị riri, à taa ụbwọ ba olo ọnyẹẹnyẹẹ.

⁷À me kpá ká ka ri adịrahụ ọnyang pyịyọọ, du ka me irya ju ang ịwẹ ka wẹẹ họ lee o-me irya jaabwọ ká ijuju nyamwụ ka ri ka.

⁸“Ahụ ọngọlẹ ká ịpyọ̀kọ nya ịnyịrọ kem à hang, aa ke ụrụ ká wo mẹ, à hụhụ chwọọ juwa pịrị ịlọng ju ọwa nyị hụ lokpunyi, juwa byi ịlọng ọwa nyaa gụgụ wuu lẹlẹ, ọngọngọhẹ nyị ji dala ọwa kaka. À me ọwa nyị́ ka ri ahụ-ogu kpá ẹnẹnẹhẹ kaka, anyị nyọwa nyị́ tị ka gbu kpá kaka.

⁹Ma ang imimiiye ịwẹ tị ka wẹ chịng ọgụ lọmwaa, ị ka họ ẹnụ alẹ-alẹ: à ka gbu anyị gbu, à ka ri ahụ-ogu ri. Ọngịrị nya ụhwa bala ịnwa ọmwụmwụ nyang ka ta ayịreji.

¹⁰“À me kpá ká yẹta rịrị e-eji giri-giri ẹ-ẹpwụ nya ang onyobyi nyang, du ká juwa byi ịlọng ọngọngọhẹ nyị́ yẹ ọwa ka. Ẹla ọjẹjẹ nyang bala ang ọ-jẹ lụmẹ nyang kpang hwahị, du ká yụbwọ kpụ ọkịlẹtụ byi ịlọng yẹkẹẹ, ‘Am a ri Ohe Oluhye lẹ, ọngọkịla ọhẹ-ẹ́ juwa kọ lala am myị kaka.’

¹¹Akama onyobyi tị juwa ka chabwọ mịlang, ịnwa ọmwụmwụ nyang-ńg ka yọọ ịhụ rụ hing myị ka. Uhila nya akama wẹẹ ka hyo mịlang, iya ọkịlaakịla-á ka tọọ kịnyaa myị ka. Akama ọọwa ka bwung agaga, ọ ka lang lala ụlaa.

¹²Kịnyaa lịnwa ọmwụmwụ bala ogbo ọchịchị nyang odu mẹ, ang kaa họ bwu enjwo-enjwo nyang tị́. Ọhẹka ị ka dang ụbwọ myị lee ọ-ka kpa ju angịnyị uhi-uhi myị.

¹³Irya ojuju nya angịnyị nyang kem chịng ịnyịrọ pyẹpyẹ. Angịnyị nyang ị-jẹ ang chajị nya ẹnụ bala ọya ā wẹ kaka dang ụbwọ mẹ-ẹ̀, ịwa angị jẹ ang chajị nya ịdịchụ, kị jẹ ebwebweebwo nya ẹgbamwụ kịị ya jeng ọyọyọọya ang ịlẹ kị juwa ka họ tang.

¹⁴“Ịwa wuu ka lala arụbẹ ila ka rwaa wuu. Ị́ dọmwụ ka chị ịlaa da bwu ẹpwụ nya ila myị ka. Ụụma nya nya ila ọlẹ ká ọngịnyị kaa hụhụ wo koo, ila ọ-chị pwuu ọtụka-ọtụka ịnyị.

¹⁵Angịwẹ wuu kanụ ba họ ụkụrwọ lawụlẹ, kịị jung irya bwu ụka-ụka nya okolobya nyang, ọngọngọọng nyaa ka pẹ hing jẹ ọgụ nya ịlọmwụ, ọngọngọhẹ nyaa-á ka hi nyọka dang ụbwọ ka.”