Read idege AYỊSAYA 48 Bible Online

AYỊSAYA 48 - idege bible

AYỊSAYA 48

¹Anụ alugbiyegu nya iJekọbụ ee, anụ ke ụrụ kanụ wo ẹla ọlẹ mẹ, anụ angịlẹ ká ẹnyị nyanụ ri ala Isirẹlụ, kanụ ri anyị ịtụma nya iJuda: Anụ nwa iro lẹnyị nya Amkpaa, juwa byi ịlọnụ kanụ juwa gbịgba ha Ohe Oluhye nya ala Isirẹlụ, ẹẹla nya ịlẹhị anụ tị-ị̀ wẹẹ ya kpong-kpong ka.

²Anụ tị wụrụ ịlọnụ anyị ịlọpyị nya epweji ọlịgọgọ, angị kpụnịrọ Ohe Oluhye nya ala Isirẹlụ ọlẹ ká ẹnyị nyamwụ ri Amkpaa Agụgụ.

³Amkpaa byi ala Isirẹlụ yẹkẹẹ, “Lụka ọlụrụ-lụrụ kam kẹkpẹ, m̀ ya ang ịlẹ kị juwa ka họ ị-ịlahị dodehe, ahyaahị lọmwaa, m̀ họ ká ang ịịwa họ jịra ịnyịlẹhị.

⁴M̀ jẹ jaabwọ kanụ la egbeju-ọngịrị, lala oje ọlẹ kọ jẹ-ẹ̀ ke ka. Itochi nyanụ-ụ́ che nẹẹ ka lala oje ọnyọmịla.

⁵Ịnyị à du kam ya ẹla olijuju jenu neeji lẹ, ene ká ang ịịwa ka họ lẹ, m̀ yaa dodehe lẹ. M̀ họ ịnyị, ó-ri ịnyị ka anụ ka yẹkẹẹ, ‘Ẹhẹẹ, ekpeku nyahị à họ ang ịwẹ lẹ!’ ekpeku nya ekeji bala ịnya oje à ya ang ịwẹ nyị họ mẹ lẹ.”

⁶“Anụ wo jaabwọ kam ya neeji ene, anụ tị yẹ jaabwọ ká ang ịịwa họ jịra wẹ lẹ, anụ ka jẹ-ẹ̀ pwa nyori nyị lịnyị kaka wẹẹ-ẹ́? Ugbẹnyị wẹẹ, m̀ tị ka ya ala inyeewe jenu lẹ, ḿ hi ẹla ịịwa iwa ya jenu ẹnẹnẹhẹ ene lẹka.

⁷Ọlẹẹlẹẹ, m̄ wẹẹ kpa ang ịịwa họ wẹẹ lẹ, ị́ họ ene nya alẹ kpụ anụ ka wo oja nyaa lẹka. Ị́ họ ene nya alẹ, ịnọ anụ ka yẹkẹẹ, ‘Ahị jaa ene-ene lẹ.’

⁸Ánụ wo ẹla ọọwa ka kpịla ọjẹjẹ kpong-kpong ka, ánụ ya ụrụ nyanụ kọọkọ ka lichi-lichi, chajị m̀ jẹẹnụ yẹẹyẹẹ nya angị pịrị ọngịnyị ha, angị la egbeju-ọngịrị anụ ri bwu eji-eji lẹ.”

⁹“Ajị nya ẹnyị nya ịlọm lẹ, m̀ wu agbama nyam kpa. Ajị ká angịnyị ka gwogbo ham lẹ, m̀ wu ịlọm kpa, chajị kam ka tanụ ayịreji ka.

¹⁰M̀ manụ yẹ ẹ-ẹpwụ nya ila lẹ, ẹ-ẹpwụ nya ila ọlam-ọlam jaabwọ kị kaa hya okpoko onyoowuru tị ka, ẹ-ẹpwụ nya ila nya akama ọyẹyẹ ịnyị.

¹¹Ajị nya ịlọm kpangga-à du kam họ ịnyị lẹ, ḿ ka myị ịị ya ẹpẹpẹ ju ẹnyị nyam ka, ḿ tị ka myị ọngọngọhẹ bá ogbo nyam bá la tam ka.”

¹²Amkpaa yẹkẹẹ, “Anụ ala Isirẹlụ ee, anụ ke ụrụ lam mẹ, anụ anyị nya iJekọbụ, kanụ ri angịlẹ kam wụrụ. Am a ri Ohe Oluhye ọmwụ ọdada lẹ, am à ri ocheji lẹ.

¹³Am ayịdang à kpa ụbwọ ya itiwe nya odehe yeji lẹ, lụbwọ-ụbwọ nyam m̄ pyẹ uhye-ọgba maa rịrị apịlọyị lẹ. M̀ ya uhye-ọgba bala odehe ā ji mẹ lẹ, ị kpehe gẹgịlẹ i-ijata-ijata lẹlẹ.”

¹⁴“Anụ wuu, anụ tuguru wuu kanụ ke ụrụ mẹ. Ukpeku oyina-à tị́ jẹ yẹ ọmwụ neeji nyori ọngọlẹ ká Amkpaa chụ nyị ka mwẹla ta ịBabịlọn, nyọka họ ang ọlẹ ká Amkpaa tịtọ?

¹⁵Am ayịdang kpangga-à ya ẹla tọọ wụrwọọ lẹ, am a kpọọ warị lẹ, m̀ tị ka kpọọ họ ụkụrwọ ọọwa cheju.”

¹⁶“Anụ tụ jum chwẹẹ kanụ wo ẹla ọlẹ kam wẹẹ ya mẹ. Bwu ọmwụ-ọmwụ ọdada, ḿ ya ẹla nyam ọhẹ-lọhẹ ị-ịbaa ka. Ụka ká ẹla ọọwa-á ka họ jịra, am ayịdang kaa juwa.” Ọngọlahị Amkpaa dum ẹrụ bwula ọngịrị nya olegu nyamwụ.

¹⁷Amkpaa ọngọ gbanụ kpehe kọ ri Ọngọ Ọlịgọgọ nya ala Isirẹlụ yẹkẹẹ, “Am a ri Amkpaa Ohe Oluhye nyanụ ọngọ kaa mẹ ang jẹẹnụ chajị nya ọháha nyanụ, kọ juwa kpanụ ụgbẹyị ọnyịịla ọlẹ kanụ ka bwu lẹ.”

¹⁸“Ang pyii kanụ ka ke ụrụ la ehile nyam, ịnọ ahị ọwawa nyanụ ka juwa mwụ lala ọ̀bá enyi, anụ ka la ọkụrụ-kụrụ jaabwọ ká agbụ ogugu nya enyi kaa pyẹ yaa ju ka ọnụụka nya ihu.

¹⁹Ịnọ, anyị nyanụ ka ju iru lala ugburuja, anyị ịtụma nyanụ ka ju iru lala egbanjwọ ilogo. Ịnọ ḿ ka myị ịị tanụ ayịreji kaka.”

²⁰Anụ gba kpehe rụ hi ịBabịlọn mẹ, anụ rụnyẹ rụ hi ala ịBabịlọn mẹ. Anụ kpa oja ọwẹ pyẹ liwuru nya ọkẹkẹnị ọdada, ká oja ọwẹ ā pwụ ẹga myị ẹga nya odehe wuu, kanụ yẹkẹẹ, “Amkpaa gba Isirẹlụ ọnchẹ nyamwụ kpehe lẹ!”

²¹Ụka ká Amkpaa juwa kpa angịnyị nyamwụ chịpwụrụ bwu ugbileji ọchọrụ lẹ, imyi-enyi-í nwaa ka. Ọ họ ká enyi kpehe bwu ẹpwụ nya ẹjwọ haa. Ọ gu ẹjwọ ene kpoo lenyi mwụ kpehe bwu ẹpwụ nyamwụ.

²²“Okpunyi-í ji ha angị họ ang onyobyi ka.” Ịnyị Amkpaa-à ya lẹ.