Read idege AYỊSAYA 49 Bible Online

AYỊSAYA 49 - idege bible

AYỊSAYA 49

¹Anụ alọnụ-enyi, anụ ke ụrụ lam, anụ wo me, anụ alẹpwụma ịlẹ kị ji hwẹẹ, Ene-ene kịị mam lẹ, Amkpaa chụm, ọ wụrụm bwu ẹpwụ-ẹpwụ nya ịnam nyọka ri ọchẹ nyamwụ.

²Ọ họ ká ọnụ nyam liri weri-weri lala ẹma, ọ chẹwụ kem ẹ-ẹpwụtụbwọ nya ịlọmwụ, ọ họ m̄ lala ịcha o-ru ẹhị ọlẹ kọ ya ju a-agburuku nyamwụ.

³Ọ byim yẹkẹẹ, Isirẹlụ ee, ahụ à ri ọnchẹ nyam lẹ. Angịnyị ka gwogbo ham ọọ-lajị nyang.

⁴M̀ tị yẹkẹẹ, Ụkụrwọ ọlẹ kam nwụ ịlọm họ lọngịrị kpá kwahụ ka ri ọ-nwụ amẹ ju igbi a-ata, m̀ kpa ọngịrị nyam họ ụkụrwọ kpa abwọ nwụ ododu. M̀ tị ya ang wuu ju Amkpaa ẹ-ẹpwụtụbwọ kọ ka ya ẹla chẹkpẹ jum lẹ, ọwa-à ka nwụm uri nya ụkụrwọ nyam lẹ.

⁵Amkpaa chụm chụ nya ọnchẹ nyamwụ ene-ene kịị mam nyọka kpa angịnyị nyamwụ nyà tịrẹkpẹ chọọ ọgụ, nyọka kpaa ịwa ala Isirẹlụ i-nyi epepe tụ ẹga-ẹga da nyà wẹ ẹga nya ịlọmwụ. Amkpaa ya ihi bam, ọwa Ohe Oluhye à tị ri ọngịrị nyam lẹ.

⁶Amkpaa byim yẹkẹẹ, “Ọnchẹ nyam ọlẹ ká ri wẹ nyọka kpá anyị nya iJekọbụ nyà tịrẹkpẹ, ịwa ala Isirẹlụ ịlẹ kam chịda ri ang ohuke wẹẹ. M̀ ka họ ká ka ri ahịgboo ha alẹpwụma datị-datị, chajị ká angịnyị la la ọchịda nyam ju ka ọbaba nya odehe.”

⁷Amkpaa Ọngọchịda ọlẹ kọ ri Ọngọ Ọlịgọgọ nya ala Isirẹlụ wẹẹ byi ọngọlẹ ká alẹpwụma pwa da ka ọka, kị nyẹẹkpẹ dọọ tịpyọ-tịpyọ kọọwa-à tị ri ọnchẹ nya alegbeju ịlọngịrị yẹkẹẹ, Ịdịrịhụ-ụ́ yẹ, ị ka wuleji jung ihi, ị ka hịnọnọ da ọbayịlẹ hang, chajị am Amkpaa ọlẹ kam kaa họ ọnụ ọmyịmyị nyam jịra chụ ọnchẹ nyam lẹ.

⁸Amkpaa byi angịnyị nyamwụ yẹkẹẹ, “Ụka-á họ nyọka wẹ abwọ ọrịrị nyanụ, m̀ ka wẹẹnụ. Ụka kanụ be ẹkọ bịlẹ ụbwọ ọdada, m̀ ka chịnụ da. M̀ ka gbenu bala ọchẹwụ keenu kam ka huunu nya ang-ẹjẹẹ nya iro ọlẹ kam ka nwụ ta ẹpwụma ịkịla. M̀ ka yanụ kụ egeji nyanụ myịmyị ẹ-ẹga ịlẹ wuu kị kpụ egwawụ kpụ wẹ lẹẹlẹẹ.

⁹M̀ ka byi alagba yẹkẹẹ, ‘Anụ la ịlọnụ mẹ!’ M̀ byi alẹpwụ nya ukpowu yẹkẹẹ, ‘Anụ kpehe wẹ ẹpwụ nya ahịgboo mẹ.’ Ị ka lala ịkpịlọ ịlẹ kị juwa ga ri tụ ụgbẹyị da, ị ka ye amẹ ri i-ikiti ịlẹ kị dọmwụ lala kwangga.

¹⁰Imyi-í ka nwaa nwụ ka, imyi-enyi-í ka nwaa ka ịnyịnyị. Ẹnụ bala ọchịpwuu olugbileji-í ka nwaa ka, ọngọ jujwo nyaa-à ka kpaa jilahị lẹ, ọ ka kpaa kaka pwụ ẹga kị ka ye enyi nwa.”

¹¹“M̀ ka pwọ ịgbọdọ cheji kị ka ri ụgbẹyị ọpẹẹpẹẹ. M̀ ka chụ ịpyị mịla ẹga ikpori-kpori wuu kị ka la gede.

¹²Angịnyị nyam ka nyà bwu ẹga ọlụrụ-lụrụ. Angịhyẹ ka nyà bwu ẹtẹ, angịkịla ka bwu ọmwẹnụ-obyi bala bwu oye nya iSiniim[10].”

¹³Uhye-ọgba ā mwu eje, ká odehe ā chị ọkẹkẹnị mẹ oo! Ịgbọdọ ā tịtị mwu eje ịnyịnyị Amkpaa ka kpụ angịnyị nyamwụ ẹjẹ lẹ, ọ ka yẹ ahyẹẹrwẹrwa nya angịnyị nyamwụ ịlẹ kị ji ẹpwụ nya akama lẹ.

¹⁴Ala iJerusalẹm[11] tị yẹkẹẹ, “Amkpaa nyẹẹkpẹ dahị lẹ! Ọ deeri hiihi lẹ.”

¹⁵Ọọwa, Amkpaa-à wẹ yẹkẹẹ, “Anụ ya ká ịnọnyị onyeewe kà jẹ-ẹ̀ deeri hi ọnyị nyamwụ, kpụ ọ ka la ọháha ẹ-ẹga nya ọnyị nya ịlọmwụ ka-á? Ó-riri ká ịnịna-á ka jẹ-ẹ̀ deeri nya ọnyị nyamwụ wẹwẹ, am-ḿ ka deeri hiinu ka.

¹⁶Ahụ epweji nya iJerusalẹm ee, m̀ da ẹnyị nyang ẹ-ẹpwụtụbwọ nyam lẹ, m̀ ka kpịtịya nyang ụka wuu.”

¹⁷Angị ka ma epweji nyang nwụ wẹẹ ka wẹ ahyaahị lẹ. Angị tang ayịreji ka hẹbịlẹ rụ.

¹⁸Yọyị dagaga ju ká yẹ ang ịlẹ kị wẹẹ họ mẹ! Angịnyị nyang wẹẹ tuguru, ị dọmwụ lalẹẹ nyà wẹ ẹpwa lẹ. M̀ kpa ẹnyị nyam Amkpaa kam juwa hịhị ya nya ịlẹhị-ịlẹhị ya ị ka haanụ nwurwo-nwurwo lala ịjang idoomyi. Anụ ka yaa da nya ang ịnyangga jaabwọ ká ahụ onyeewe kaa họ.

¹⁹“Epweji nyang tayịreji kpá kpụ egwawụ-egwawụ ene, ọ tị lụmẹ nwa ọkụkụ nya angịnyị nyang ịlẹ kị wẹẹ ka nyà kaka, angịlẹ kị tang ayịreji ka rụ hwẹẹ hing.

²⁰Anyị ịlẹ ká ma ụka ká ri ọnyọhị ọ-ọpyị ọkịla ka bying ẹnẹhẹ yẹkẹẹ, ‘Ọpyị ọlẹ byẹhị lụmẹ, ọ́ nwahị kaka, ya ọpyị ọkịla ọ-gụ ọlẹ gụ hahị kahị kụ ẹpwa mẹ.’

²¹Ụka ọọwa, à ka juwa tọ ịlọng wo ọ-ọkịlẹtụ yẹkẹẹ, ‘Oowo à tị́ ma anyị ịlẹ wuu ham-m̀? Ịnọ anyị nyam tị́ gbu wuu lẹẹ, m̄ da ụbwọm lete-lete lẹ. Ang kị kpam kaka ri ọnyọhị ọ-ọpyị ọkịla lẹẹ lẹ, oowo à tị́ ma anyị ịlẹ, kpaa nwà kpụ kị pwụ ịịlẹ lẹẹ mẹ?’ ”

²²Ọngọlahị Amkpaa byi angịnyị nyamwụ yẹkẹẹ, “M̀ ka kpa ụbwọ-ụbwọ ya ẹla ta alụma datị-datị, ị ka kpa anyị alẹng nyanụ nyà kaka junu ụ-ụbwọ, ị ka go anyị anyang nyanụ chikete kpụ nyà warị.

²³Ịdịrịhụ alẹng ka kpanụ lala adanụ, ịdịrịhụ anyang ka kpanụ lala ịnanụ, ị ja hirikpẹẹ juwa junu ihi. Anụ ka jẹ ụka ọọwa kam à ri Amkpaa, angịlẹ kị dahịhilem wuu, oyoyi-í ka juwa haa kaka.”

²⁴Oowo tị́ ka nu ang-ẹwụ ịlẹ ká ọgẹwụ go bwu ụbwọ nyamwụ myị́-ị? Ị ka jụ ọlagba ọlụbwọ nya ogirima gba kpehe myị-ị̄ị́?

²⁵Amkpaa yẹkẹẹ, “Ịnọọ, m̀ ka họ ịnyị. Ị ka nu alagba ịlẹ ká angịdẹwụ wu kpaa ụ-ụwa, ị ka nu ang-ẹwụ ịlẹ ká angị la ọngịrị go kpa rụ. M̀ ka ma uya ta ọngọngọhẹ kọ mwẹla tanụ, m̀ ka chị anyị nyanụ da.

²⁶M̀ ka họ ka angị tụụnụ pyịpyị ka nwụ awụlẹ, ịwọ nya ịlaa ọlẹ kị ka chị ka yaa ya lala ere. Ụka ọọwa, angịnyị wuu ka jẹ kam à ri Amkpaa ọngọchịnụ da ọlẹ kọ gbanụ kpehe, ọngọtụka nya ala Isirẹlụ.”