Read idege AYỊSAYA 5 Bible Online

AYỊSAYA 5 - idege bible

AYỊSAYA 5

¹Anụ wo eje ọlẹ kam wẹẹ ka mwu mẹ. Eje chajị nya oligu nyam bala ẹrụ nyamwụ à lẹẹ lẹ— oligu nyam wu ẹrụ nya alakọnụ ịkịka nya ikiti ọlẹ kọ há ang lụmẹ.

²Ọ wu ẹrụ ọwẹ yẹẹyẹẹ, go ajwọ chịịrụ hyoo. Ọ ya alakọnụ ịlahịchịng tọ ụ-ụwa, nwụ ọ̀dà kị ka hụ kpẹhị rịrị ẹrụ ọwẹ. Ọ be aya kịlọlọ ẹga kị ka pyị enyi nya alakọnụ. Ọ hụhụ yẹhị rịrị gbe ụka ká egbe ịwẹ ka ga. Egbe ịtịpyọ kem ị tị nwụ lẹ.

³Ọọwa, oligu nyam à yẹkẹẹ, “Ala iJerusalẹm bala ala iJuda ee, anụ tị́ yẹ ụkụrwọ ọlẹ kam họ ju ẹrụ nyam-m̀ wẹ lẹ, anụ ya jem wẹẹ.

⁴Ịyẹ à tị́ juwa kọ baba kam ka họ ẹ-ẹrụ ọlẹ ene kọ ka nwụ egbe yẹẹyẹẹ? M̀ yẹhị nọ gbe alakọnụ ịlahịchịng, ịtịpyọ m̄ tị yẹ ụ-ụwa lẹ.

⁵Ang ọlẹ kam ka họ ẹ-ẹrụ nyam lẹẹlẹẹ ri. m̀ ka tụrụ iku ọdagaga jwoo ọwẹ ká iyo ịlẹpwamẹ ka kele kaka tọọ ayịreji.

⁶M̀ ka bahyoo ká amẹ ka myị jwoo. Ḿ ka ma alakọnụ ịlụwa abwọ kaka, ḿ ka mọọ wu kaka ịnyịnyị. M̀ ka ba ká ejwo owuru bala ejwo ịkịla ka bwu ụ-ụwa. M̀ ka da egbamwụ ehile kị ka kpa enyi warị kaka.”

⁷Ala Isirẹlụ bala ala iJuda lala ẹrụ nya alakọnụ nya Amkpaa Agụgụ. Ọ yẹhị rịrị kị ka la ọhịhị ọkpẹẹkpẹẹ, ị tị dachichi juwa nwụ angịnyị. Ọ yẹhị nọ kị ka họ ang ọnyịịla, ị tị juwa tụ angịnyị pyịpyị.

⁸Inyiribyi kpụnụ lẹ, anụ gogo-ò wẹ, anụ wẹẹ mịla ẹpwa ra chawụlẹ gbudu-gbudu, juwa tụ ịpyị nya ẹrụ dalawụlẹ ra gbee ká ẹga-á ka hi ha angịkịla kaka. Ụka ọọwa, anụ ụbwọọnụ à ka kụ ọ-ọpyị ọlẹ lẹlẹ.

⁹M̀ wo myị̀myịịmyị ká Amkpaa Agụgụ nwa iro yẹkẹẹ, “Ẹla nya ịlẹhị ịnyị, iru nya ẹpwang ịtụka-ịtụka ịwẹ wuu ka kpụ egwawụ-egwawụ.

¹⁰Ẹrụ nya alakọnụ eku iwo ịlẹ kị wu ugba nya ere ookpokpo kem ị tị ka ye bwu ụwa lẹ. Ị ya okolo ohu da iwo ineku (180) nya ajẹ nya ang-ẹrụ hụ, okolo iwo kụrụ ineku kem ị ka ye wụ lẹ.”

¹¹Inyiribyi kpụnụ lẹ, anụ angị chahị lụtụrụ juwa dọmwụ nya ere ọnwanwa, juwa hụhụ nwa ere gbee da ka epwodu jijiiji gbee kanụ ka nwa ere kpụ ere.

¹²Ọ-ọhụhụ nyanụ anụ kaa kpa ogum̀ bala ẹnwụ bala ịchẹchẹ bala ere ọnwanwa, ánụ tị myị ju Amkpaa ihi lee ọ-yẹ ụkụrwọ ọlẹ kọ wẹẹ họ kpong-kpong ka.

¹³Lẹẹlẹ, ị ka goonu kpa rụ hi ọpyị nyanụ, chajị ánụ jẹm ya ihi ham ka. Alegbeju nyanụ ka gbu igu nya imyi, alụma ka gbu imyi-enyi.

¹⁴Imyi nwụ ejegu jahị daa, ọpyị pyẹ ọnụ maaa da gbaa, ọ ka ye angị la ihi-ihi tụ alụma nya ala iJerusalẹm mile, tụ alogu nya alere ịlụwa wuu.

¹⁵Oyoyi ka ju ọng myị ọng ụ-ụwa, angịlẹ kịị hi ọbọọchẹ wuu ị ka kpaa weji.

¹⁶Ma, Amkpaa Agụgụ tị mẹ ụmụmẹ nyamwụ jẹ bwula ang ịnyịịla ịlẹ kọọ họ. Ọ tị mẹ ịgọgọ ọlala nyamwụ jẹ bwula eje nya abwẹla ọnyịịla ịlẹ kọ ka la angịnyị nyamwụ.

¹⁷Ụka ọọwa, ịkpịlọ la imilodo ka juwa ri amẹ ilekpo-lekpo kpá tụ imbiri e-egwawụ nya epweji ịwẹ kị ta ayịreji. Ịna bala iyichi ka juwa ri ang ọ-ọpyị o-ju eyo ọwẹ ká alụdụ ịtụka la ene-ene.

¹⁸Anụ gbu hụrụ lẹ, anụ angị kpa ang onyobyi ọhọhọ ga tụ ịlọnụ da. Ọnọọkịla omeme nyanụ myị ang onyobyi yi ori hiinu kaka.

¹⁹Angịlẹ kị byi ịlaa kị kpa Ohe Oluhye họ juwa yẹkẹẹ, “Anụ ba ká Amkpaa a họ jaabwọ kọ ya ọwa nyị ka họ páaa kahị yẹ mẹ. Ká Ọngọ Ọlịgọgọ nya ala Isirẹlụ a chị agaga ju ụkụrwọ ọlẹ kọ me obyi nyọka họhọ, kahị jẹ jẹ ang ọlẹ kọ juwa ẹ-ẹpwa nya irya nyamwụ mẹ!”

²⁰Anụ gbu hụrụ lẹ! Anụ angịlẹ kanụ wụrụ ang onyobyi ọnyịịla, ang ọnyịịla onyobyi. Anụ angị hu ukpowu nyẹ ahịgboo, hu ahịgboo nyẹ ukpowu, anụ angị hu ang ọ-la ujujwo nyẹ ang ọ-la ịpyọ, hu ang ọ-la ịpyọ nyẹ olujujwo.

²¹Inyiribyi ā kpụnụ anụ angịlẹ kanụ byi ịlọnụ kaanụ à jẹ ẹla a-ahị nya ịlọnụ, kị myịmyị me irya kịịwa ri alịjẹẹhị gụ angịnyị wuu.

²²Inyiribyi juwa ha angịlẹ kị ri angị họ ogu ẹ-ẹga nya ere ọnwanwa, angị chẹjẹ kpá kaa hu ere ọnyọọngịrị ọhẹ kpịla la ọkịla.

²³Angị kaa ye okpoko o-ju ikiri ri kpa bịrị eje nya ọngọ ri oku nya ẹla, tị mwẹẹkpẹ chị ọlabwẹla onyobyi da, ya ọlabwẹla ọnyịịla ju agba!

²⁴Jaabwọ ká ewoo nya ambakpa kaa wo pịla-pịla ị-ịlahị nya ẹlẹlẹ-ila, jaabwọ ká amẹ ịnwọnwụ kaa rụ ila kpụ pịlẹtẹẹẹ ju ka eji, ịnyịnyị atẹ nyanụ a ka mama, wọwọ ị-ịpyị, apwụ ijuju nyanụ ka nwọnwụ, ka wo pilo-pilo hụrụ lala ọrụ-ịpyị. Chajị ị pwa ehile nya Amkpaa Agụgụ, Ohe Oluhye Ọlịgọgọ nya ala Isirẹlụ.

²⁵Chajị nya ọọwa a du ká ikẹjẹ-awụrụ nya Amkpaa wuru lala ila tụ iru nya angịnyị pyịpyị lẹ. Ọ nịra ụbwọ nyamwụ kpaa lẹ, ọ waa abwọ lẹlẹ. Ịgbọdọ ju uhi juwa hụ́ kpákpakpa. Egu nya egbinyịrọ nyaa chị páta-pata tụ ipeje-ipeje da lala ang i-go chịịrụ ka ọtẹwụụ agbayị ịlẹpwarịrị nya epweji. Chajị nya ala ịlịịwẹ wuu a du ká agbama nya Amkpaa á chị ụrụ tịrẹkpẹ kaka, du ká ụbwọ nya nịra kpaaa ịnyịnyị kpọkpọọkpọ a wẹ lẹlẹ.

²⁶Amkpaa juwa ka họ ang o-ju ẹjẹẹ hwoo hwaa ka uhye ha alepowja ịkịla ịlẹ kị ji ẹga ọlụrụ hwẹẹ. Ọ ka chị uhulẹ ọhụ be ẹkọ wụrwaa bwu ọbaba nya odehe ọhẹ kele ka ọkịla. Ahyaahị lẹ, aluji à ka pwụ eji warị la agaga ịịwẹ mwaa lẹlẹ.

²⁷Ịnyịrọ á chị ọngọhẹ nyaa pyẹpyẹ lụnyẹ ọrụrụ lee ọ-chị keji ka, ọngọngọhẹ nyaa á juwa ká ịnyịrọ họọ kpokpokpo la une ọrụrụ lee une ọnọnọ ka. Ugba ọchọhị nyaa-á dọmwụ yi hi ọhị nyaa ka. Ori nya ugbẹtẹ ọ-da dodo nyaa-á chị ka.

²⁸Ịcha nyaa liri háka gbeng. Eda nyaa wuu gbụrụ ke laa chụ uda wule wuu lẹ, nwụlanọ nyọka dada lẹ. Achụ nya anyịrẹ nyaa lịngịrị lala ajwọ. Oje ọkịlọlọ ọ-kpa rụnyẹ e-eji nya omoto nyaa kaa pyị kịlọ-kịlọ lala igbachịwụ ọlẹ kị wụrụ ugbọchịrị.

²⁹Angịdẹwụ ị-dẹwụ nya chị ụkwa lala egabẹ anyang a warụ ụka kị nwụ iyo juwa kpa rụ ka ẹga ọlẹ ká ọngọngọhẹ-ẹ́ ka jẹ-ẹ̀ kwaa iwe myị kaka.

³⁰Ẹnụtụrụ ọọwa, ị ka warụ ju ala Isirẹlụ lomyi gboo jaabwọ ká Ihu ọtụka kaa gu ágbụ. Ụka ká ọngịnyị á chẹhị kele ka yẹ ọpyị ọwẹ lẹ, ukpowu bala akama nya ang ọjụjụ kem mẹ ịnyị. Ahịgboo ka yẹ ri ukpowu ẹ-ẹpwụ nya egbamwụ ọchụka ọwẹ.