Read idege AYỊSAYA 50 Bible Online

AYỊSAYA 50 - idege bible

AYỊSAYA 50

¹Jaabwọ ká Amkpaa ya a lẹẹ lẹ: Ále ụpwụ nya ibeenu nya ịnanụ ọpwapwa ọlẹ kanụ ya am nyị pwọọ ọlẹ kọ kpụ kam kwoo rụ à tị́ ji? Lee oowo m̄ tị́ kpa uri kam yanụ ra ka nwụ ọngọ ọọwa uri? Lee anụ tị́ me kam wunu ra kam kaa nwụ uri lala anyịhị? Ehe. Ang inyibyi ịhọhọ nyanụ a wunu ra a du ka kwoo rụ lẹ.

²Ányị à tị́ du ụka kam warị ká ọngọngọhẹ á juwa ka-à? Ányị à tị́ du kam be ẹkọ nyọka chịnụ da ká ọngọngọhẹ-ẹ́ myị wẹm ka-à? Lee m tị myị kaa lọngịrị ka chịnụ da myị kaka? Yẹ mẹ, ó-ri kam kpụ ịkata ọlam-ọlam ọlẹ, ihu ịtụka kaa nwụ kịrẹ-kịrẹ ịị yẹ ugbileji. Ọọwa lẹ, iyenyi ịlẹpwụ nyaa à kaa gbu màma lẹlẹ.

³M̀ lọngịrị ka họ ká egbamwụ iluhye-ọgba ka la obiri laa chowu kpịlẹẹ lala awụrụ nya ida ọbaba ụka ká ọngịnyị á gbu.

⁴Agụgụ Amkpaa ya ẹlẹlẹ nya angị jẹ ang lụmẹ ham chajị kam ka họ ká angịlẹ ká ịnyịrọ chaa pyẹpyẹ ka la gogo. Ọ kaa chịm ahị-une lụtụrụ ẹnụ myị ẹnụ wuu họ m kaa kụ kee nyọka wo ẹla ọlẹ kọ ka mẹjẹm lala anyị ilube-ụpwụ.

⁵Amkpaa wụrụ ụrụ nyam da dodo kam ka wo ẹla myị̀myị. Ḿ la egbeju-ọngịrị ka. M̀ tị tịrẹkpẹ kẹkpẹ ka.

⁶M̀ ji ẹkpẹ da ha alenyiri ịlẹ kị juwa nyim. M̀ ji abaa nyam da ha angịlẹ kị juwa gbilem ịchwọ. “M̀ ya ahị nyam kpịbaa hyaa ụka kị juwa kpam họ ba o-juwa chị ide hum ẹ-ẹpwahị hi oyoyi ka.”

⁷Chajị Ọngọlahị Ohe Oluhye ka dam ụbwọ chajị nya ọọwa lẹ, ọkịlẹtụ á kpụm enyi lee lam jigi-jigi ka. Chajị nya ọọwa lẹ, m̀ chị eje ẹ-ẹpwụ nyam nyọka ju ugbodu ẹ-ẹpwụ nyaa, m̀ tị myịmyị hẹ ka oyoyi á ka jum ka.

⁸Ohe Oluhye ọng ya eje rụm ji chwẹẹ lẹ. Oowo à tị́ ka chị ẹjẹ kpá mwẹla tam wẹẹ? Ó-ri ká ọngọhẹ á juwa ịnyị lẹ, ọ kẹwẹ kahị kele ka ịkọọtị la mẹ. Ó-ri kọ ye ẹlẹlẹhẹ onyobyi ka ya rụm lẹ, kọ ya mẹ.

⁹Yẹ mẹ, Agụgụ Ohe Ọngọlahị dam ụbwọ la eje yẹm dada lẹ. lẹ oowo à tị́ ka lọngịrị ya eje nyị wum myị wẹẹ? Yẹ mẹẹ, angịlẹ wuu kị wẹẹ chị ala bam ka hogo kpegu lala apwụ. Ịlẹ kà ryaa ịịlẹ pẹtẹ.

¹⁰Oowo ẹ-ẹpwarịrị nyanụ a tị́ juhi nya Amkpaa bala o-ju ihi nya omyi nya ọnchẹ nyamwụ, kọ tị juwa jẹdịyẹ ẹ-ẹpwụ nya ukpowụ kọ yẹ ahịgboo ọhẹ-lọhẹ kaa, ma ịnọ ká ọngọọwa tị hu ọkịlẹtụ ha Ẹnyị nya Amkpaa dahị hiloo kọ tị kpụ nịrọ Ohe Oluhye?

¹¹Anụ-ụ yẹ mẹ, anụ angịlẹ tụ ịlọnụ ju. Anụ tịtọ kanụ ka họ ahịgboo nya ịlọnụ ọlẹ kanụ juwa jẹdịyẹ ẹ-ẹpwarịrị nya achụ nya ila ị-da bwụrụ-bwụrụ-bwụrụ ọlẹ ūanụ dahịhile ahịgboo nyanụ kọọwa kpanụ ụgbẹyị. Ma ang ọlẹ kanụ tị ka ye bwu ụbwọ nyam am a lẹẹ lẹ: Anụ ka nọnọ ẹ-ẹpwụ nya ang ọjụjụ ọtụka.