Read idege AYỊSAYA 51 Bible Online

AYỊSAYA 51 - idege bible

AYỊSAYA 51

¹Jaabwọ ká Amkpaa ya a lẹẹ lẹ: “Anụ ke ụrụ lam mẹ, anụ angịlẹ kanụ juwa rụnyẹ ku abwẹla ọnyịịla. Anụ angịlẹ kanụ wẹẹ tịtọ nya Amkpaa Ohe Oluhye. Anụ dahịhile Amkpaa ọlẹ kọ lala ẹjwọ ẹga kanụ bwu. Ẹga nyamwụ anụ bwu mịlẹ-mịlẹ lẹ.

²Anụ kpịtịya nya Ebiraham adanụ ogogo bala iSera angịlẹ kị manụ. Ụka kam wụrụ Ebiraham nyọka ri ọngịnyị nyam lẹ, ọ́ ma ọnyị ọhẹ-lọhẹ lẹka, ma m̀ tị wahị kụrwọọ, họ kọ ma iru nya anyị lụmẹ-lụmẹ. M̀ họ ká anyị ịtụma nyamwụ ju iru há ka gbeng.

³Amkpaa juwa ka kpụ́ ala iJerusalẹm ẹjẹ. Ọ ka kpụ́ angịlẹ wuu kị kụ egwawụ nya iJerusalẹm ẹjẹ. Ọ ka họ ka egwawụ ịwẹ há myịmyị lala Ẹrụ nya Idẹn, ee, lala Idẹn ẹrụ ọlẹ ká Amkpaa wu. Ị ka juwa chị ọkẹkẹnị ụ-ụwa. Ị ka mwu eje bala o-ji Amkpaa obe.

⁴Anụ angịnyị nyam, anụ ke ụrụ lam mẹ, kanụ ya ụrụ nọ ham yẹẹyẹẹ, anụ alepwoja nyam. M̀ juwa mẹ ang jẹ alụma wuu. Ọmẹjẹ nyam ọọwa ka họ kọ ka la gede-gede ha alụma wuu nyori ị ka họ awụlẹ ri kaka.

⁵M̀ juwa wẹ ahyaahị lagaga. M̀ juwa ka chịnụ da nya ji chwẹẹ dọmwụ hi ehe lẹ. M̀ ka ri Adịrahụ nya alụma ịkịla wuu. Angịlẹ kị kụ ẹga lụrụ-lụrụ ka yẹhị rịrị gbem kam ka wẹ. Ị yẹhị rịrị kam ka warị kaka chaa da.

⁶Anụ yọyị ka uhye bala eji wẹẹ. Uhye-ọgba wuu ka myị táaa lala ịmwụ. Ịpyị ka chị pwẹẹpwẹẹ lala apwụ onyogo. Angịlẹ kị kụ ẹpwụ nyamwụ ka gbu lala ịjị. Ma ka chaa da pyịyọọ. Ọngịrị ọlẹ kam ka kpa kụrụ haa juwa pyịyọọ.”

⁷Anụ ke ụrụ lam mẹ, anụ angịlẹ kanụ jẹ abwẹla ọnyịịla, anụ angịlẹ ká ehile nyam juwa ẹ-ẹpwụ ọkịlẹtụ nyanụ. Anụ juhi nya ang inyibyi ịlẹ ka angịnyị ka ya rụụnụ bala abyị ọkpụnụ kpụ kaka. Ọkịlẹtụ ā tị kpụnụ enyi chajị nya ido ododo nyaa kaka.

⁸Chajị ị juwa ka ta ayịreji jaabwọ ká ị̀lẹ kaa ri apwụ̀. Ekpunjuju juwa ka ri ugbinyịrọ nyaa lala apwụ ọlẹ kị kpa egbiyi nya ịmwụ họ. Ma abwẹla ọnyịịla nya ọchịda nyam tị ka juwa kịlahị gbe oyi myị oyi wuu.

⁹Amkpaa ee, wuleji ká dahị ụbwọ mẹ, kpa ọngịrị nyang chịhị da mẹ. Wuleji lọngịrị nyang jaabwọ ká họ lụka nya alene. Ahụ à tị́ chị iRehabụ ugbiriyo ọlẹpwụ enyi eku kpiki-kpiki, ahụ à ya ang gwoo dụrwọọ pyịị lẹẹ lẹ.

¹⁰Ahụ a ri ọngọlẹ ka chị Ihu eku lọọ nwụ kịrẹ-kịrẹ, ká Ihu ọtụka ọwẹ kọ la kpori-kpori myị lẹ. À họ ká ụgbẹyị da bwu ẹpwụ nya enyi ọọwa. À họ ka angịnyị nyang ịlẹ ká gba kpehe chịpwụrụ bwu ụwa kpoye rụ.

¹¹Angịlẹ ká Amkpaa gba kpehe wuu juwa ka nyà tịrẹkpẹ lẹ, ị ka nyà warị wẹ ịSayọn la ọkẹkẹnị. Ị ka juwa mwu eje juwa da iwuru nya ọkẹkẹnị. Ị ka juwa chị ọkẹkẹnị pyịyọọ gbe oyi myị oyi. Ụka ọọwa, ẹla ọ-tọ olujwo bala ang ọjụjụ ka rụnyẹ rụ hwẹẹ hyaa pyịyọọ gbe oyi myị oyi.

¹²Amkpaa yẹkẹẹ, “Am à ri ọngọ kaa jung ọhụ lẹ. Lẹ ịyẹ a tị juwa hu akama hang kpụ ká ka juhi nya ọngịnyị ehe kọ kaa gbu myị ka mwẹẹkpẹ juhi nyamwụ mẹ. Ọnyị nya ọngịnyị kọ lala amẹ.”

¹³Ọọwa lẹ, anụ mwẹẹkpẹ deeri hi Amkpaa ọngọ họnụ lẹka, ọngọlẹ kọ hu egbamwụ pyaa maa yaa pịlẹ u-uhye-ọgba. Ọwa-à dọmwụ uji nya ọpyị lẹ. Ọọwa lẹ, anụ juwa kịlahị la o-juhi nya agbama nya angị tanụ ayịreji lẹka-á? Lẹẹlẹẹ wẹẹ alẹ agbama nya angị tụụnụ pyeji a tị́ ji?

¹⁴Anyịhị ịlẹ kị wu bwu ọgbẹwụ ká ọkịlẹtụ wẹẹ kpaa enyi juwa gba kpehe la ịlaa ahyaahị, ị ka gbu ka, ị́ tị juwa rụ ka ẹpwụ nya ejegu ka. Ang oriri á tị dọmwụ ka kwaa amwụ ka.

¹⁵Chajị am a ri Amkpaa Ohe Oluhye nyanụ ọlẹ kam chị ihu ebwo imiiye kpọọ ọọwa agbụ ogugu nyamwụ a juwa warụ lẹ. Ẹnyị nyam a ri Amkpaa Agụgụ lẹ.

¹⁶M̀ hu ẹla nyam jung ọ-ọnụ lẹ, m̀ chẹwụ keng la ụrụrụ nya ẹpwụtụbwọ nyam lẹ. Am pyẹ egbamwụ maa yaa pịlẹ u-uhye-ọgba. M dọmwụji nya ọpyị ọlẹ kọ ri odehe ọlẹ wuu lẹ, m byi iJerusalẹm yẹkẹẹ, “Anụ à ri angịnyị nyam lẹ.”

¹⁷IJerusalẹm ee, chahị-une ká wuleji hụhụ! Anụ nwa okilo nya agbama nya Amkpaa tata, ọlẹ kọ chị hanụ nwa tata lẹ. Anụ nwa gbee kanụ ya gu gboogboogboo tụ ụgbẹyị-ụgbẹyị da.

¹⁸IJerusalẹm la iru nya angịnyị ịnọ, myị ịnọ myị ẹga rịrị kpọrịkọọ. Ma ọ́ tị ye ọngọngọhẹ ka kpọọ ụgbẹyị ka. Dọmwụ kpá tụ ẹpwarịrị nya anyị alẹng ịlẹ kị ma ụ-ụwa epweji nya iJerusalẹm. Ọngọngọhẹ á juwa ka yụbwọ chọọ ka, Dọmwụ myịmyị tụ anyị alẹng ịlẹ kpakpa nwa gbee kị wule ka ri adam-ọlẹng e-epweji nya iJerusalẹm, ọngọhẹ a juwa ka ri ọngọ ka kpọọ ji ịlahị ka.

¹⁹Akama ịtụka imiiye ịlẹ kị chabwọ mịlanụ a lẹẹ lẹ, uhi nya ang o-ye ri ka bala ẹwụ ọdada ọlẹ kị ta ang nyanụ ayịreji wuu la ẹma nya ẹwụ ká ẹla ọọwa a tị tọ ọngọhẹ olujwo ka lẹ, ọọwa a tị ka kpụng ẹjẹ mẹ?

²⁰Anyị nyanụ họ dẹwụ kpụ ịbwọ chụwa ọ-ọchapiyẹ bala ọchapịta nya ụgbẹyị ọnyị myị ọnyị wuu. Ịịwẹ a ka yaa chụwa mwụ kụna-kụna lala ịnụ-ẹnụ ịlẹ ụgbọwụ kaa wu lẹlẹ. Ang odudu ri agbama nya Amkpaa bala alibyi oyaya nya Ohe Oluhye a waa ọyị kpa myaa pwẹẹpwẹẹ wẹẹ lẹ.

²¹Chajị nya ọọwa lẹ, anụ ke ụrụ lam kanụ wo mẹ, anụ ala iJerusalẹm, anụ angịlẹ kanụ yẹ akama, anụ angịlẹ kanụ nwa ya ma e-ere anụ tị nwa ka.

²²Amkpaa Ohe Oluhye ọngọ kaa ma uya hanụ yẹkẹẹ, “Ẹkpẹ nya ere nya akama ọlẹ kam ya hanụ lagbama du kanụ kaa jẹdịyẹ yata gbaagbaagbaa lẹẹ, m̀ ye kpa rụ hiinu lẹ. Ánụ tụtụm ka nwa ere nya agbama nyam kaka, ọ myị lẹ.

²³Ọlẹẹlẹẹ, m ka hu okilo nya akama ọọwa ju angịlẹ kị ka yẹnụ akama ụ-ụbwọ. Angịlẹ kị kaa byinu yẹkẹẹ, anụ hị nọnọ kahị jẹdịyẹ bwu uhye nyanụ. Ọlẹ kị họ kẹkpẹ nyanụ chịrị lala ịpyị-ịpyị ayịdang wuu lala ụka kanụ a ri ụgbẹyị nya opeje-ẹpwa haa ọlẹ kị ka juwa jẹdịyẹ bwu lẹ.”