Read idege AYỊSAYA 52 Bible Online

AYỊSAYA 52 - idege bible

AYỊSAYA 52

¹IJerusalẹm ee, chahị mẹ, chahị, ká gba ọngịrị nyang kpehe mẹ, iJerusalẹm, epweji ọlịgọgọ ee, go ịwụrụ ilihi-ihi nyang kụrụ mẹ. Angga ị-jẹ Ohe-ka ịwẹ-ẹ́ ka jụ warị kaka họng pyee gụ ọwẹ ẹnẹnẹhẹ kaka.

²IJerusalẹm ọlagba ee, wụ ịlọng ịpyị hụrụ, ká hụ ẹ-ẹchị-adịrahụ nyang mẹ. Ala ịSayọn alagba ee, anụ yi agba ịlẹ kị wunu kpa-à wẹ hi ịlọnụ mẹ!

³Ọngọlahị Amkpaa yẹkẹẹ, “Ị goonu ra nya anyịhị la ọ-ya ideri-ịchaakpa gunu e-egbeju ka, ịnyịnyị anụ ka la ịlọnụ lorwaahị lẹ.

⁴Ene nya ọgbanyẹ, angịnyị nyam kele kaka kụ Ijipiti lirya nya ịlaa, ụka ohyẹẹkpẹ lẹ, ala Asiriya-à yaa ụhị timajẹ lẹlẹ.

⁵Ọlanyị à tị́ lẹẹ ugbẹnyị mẹ? Alẹpwụma ọkịla[12] wẹ kaka go angịnyị nyam kpa rụ nya alagba nyaa myịmyị timajẹ. Ọọwa, alegbeju nyaa-à juwa chị ọgọm, hu ẹpẹpẹ ju ẹnyị nyam ụka wuu lẹlẹ.

⁶Ị-ịlahị, angịnyị nyam ka jẹm, ụka ọọwa, ị ka jẹ ká am à ri Ohe Oluhye ọlẹ kam ẹla taa-à wẹ.”

⁷Ọ chakpa kpụ ịpyọ nyọka yẹ alẹrụ ị-kpa oja ọnyịịla kị juwa wẹ bwu uhye nya ịgbọdọ, ị kpa oja ọnyịịla nya okpunyi, ị kpa oja ọnyịịla nya ọchịda, juwa byi ịSayọn yẹkẹẹ, “Ohe Oluhye nyanụ ri adịrahụ!”

⁸Angịgbe epweji lalẹẹ dakọ, ị juwa dakọ nya ọkẹkẹnị lawụlẹ! Ị kpa ẹhị nya ịlaa yẹ jaabwọ ká Amkpaa juwa nyà tịrẹkpẹ chị ịSayọn ọgụ.

⁹Anụ egwawụ nya iJerusalẹm ee, anụ kpehe juwa dakọ nya ọkẹkẹnị mẹ oo! Amkpaa chị epweji nya iJerusalẹm da lẹ, ọ kpụ angịnyị nyamwụ ẹjẹ lẹ.

¹⁰Amkpaa ka chị ọngịrị ọlịgọgọ nyamwụ ehe a-ahị nya alẹpwụma ilodehe wuu, alẹga myị ẹga nya odehe wuu ka yẹ ọngịrị ọlẹ ká Ohe Oluhye nyahị kpa chịhị da.

¹¹Anụ yegiri kanụ rụ, anụ kpehe bwu ịBabịlọn mẹ! Anụ yụbwọ gu ang i-ju ibyi ka, anụ angị kpa ang-abwọ ilube nya Amkpaa, anụ kpa ịlọnụ charị-charị, kanụ rụ bwu ụwa mẹ.

¹²Ugbẹnyị lẹ, ánụ ka rụ lagaga ka, ánụ tị ka rụnyẹ nyọka kpa ịlọnụ be abwọhẹ ka. Amkpaa Ohe Oluhye nya ala Isirẹlụ ka kpanụ jilahị. Ọ ka tụụnụ da kpẹhị rịrịịnụ bwu ẹkpẹ ịnyịnyị.

¹³Amkpaa yẹkẹẹ, “Ọnchẹ nyam ka kịlahị ẹ-ẹpwụ nya ụkụrwọ nyamwụ, ị ka hwoo hwaa, jwoo ihi ọtụka-ọtụka.

¹⁴Ejiri wu iru nya angịnyị ụka kị yọọ, ị họọ ang, bịrọọ ahị chịkẹ-chịkẹ gbee kọ mẹ ọngịnyị ehe kaka.

¹⁵Ọ ka la iru nya ẹpwụma lụmẹ-lụmẹ ahịbwuu, ịdịrịhụ ka godayị yụbwọ ba ọnụ ọọ-lajị nyamwụ, chajị ẹla ọlẹ kị ya jaa ene ka, ọwa ị ka yẹ lẹ, ang ọlẹ ká ụrụ nyaa wowo ene ka, ọwa ị ka jẹ lẹ.”