Read idege AYỊSAYA 53 Bible Online

AYỊSAYA 53 - idege bible

AYỊSAYA 53

¹Oowo à tị́ myị ju ẹla nyahị ọlẹ kahị ya dodehe lẹẹ ene? Oowo tị́ yẹ nyori Amkpaa lụbwọ ẹ-ẹpwụ nya ẹlẹwẹ-ẹ̀?

²Ọnchẹ nya Amkpaa nwa ị-ịlahị nyamwụ lala okoji ọlẹ kọ bwu kpehe ọ-ọpyị ọkwangga. Ọ́ la ihi lee ọ-há ụhị abwọhẹ kpụ ahị ka ri bọọ ka. Abwụma nyamwụ-ụ́ chị ẹhị gbọgbọ kpụ ahị ka babọọnya nyamwụ ka.

³Angịnyị tọọ ịmyị-ọnụ, nyẹẹkpẹ dọọ, ọ ji ẹpwụ nya akama bala ọjụjụ, angịnyị ya ahị chị ọka hyoo, angịnyị wuu tọọ ịmyị-ọnụ, áhị tị́ hwoo nya ịngịngịhyẹ ka ịnyịnyị.

⁴Ọ ye olo nya akama ọlẹ kọ ri ịnyahị kpa, ọjụjụ nyahị ọ ye kpa lẹ, ahị tị hwoo nyori akama ịlẹ kọ yẹ ri akama ká Ohe Oluhye yọọ chajị nya ịhọbịrị nya ịlọmwụ.

⁵Ajị nya ịhọbịrị nyahị ị tị chọọ abẹ lẹ, ị rwoo chwọọchwọọ chajị nya ang inyibyi ịlẹ kahị họ. Ajị nyọlẹ kọ ye akama ọlẹ kọ ri nyahị yẹ du kahị ye uda ọhọhọ.

⁶Ahị wuu lala ịkpịlọ ịlẹ kị hwahị byi, ọngọngọọng nyahị jẹ ọgụ nya ịlọmwụ. Amkpaa tị hu akama ọyẹyẹ nịrọọ, akama ọlẹ ịnọ kọ pwoku kahị ka yẹ.

⁷Ị tọọ pyịpyị, họọ ang aboji-aboji, ọ́ tị họ pyịm ka. Ị gbilo kpịla-kpịla kele lala ọnyị-ọkpịlọ ọlẹ kị juwa ka nwụ, lala ọkpịlọ ọlẹ kị juwa ka pwọ egbii, ọ́ tị họ pyịm ka.

⁸Ị woo pyẹẹ, ya eje woo kịrọrọ, kpọọ rụ nyọka nwọọ nwụ, ọngọngọhẹ-ẹ́ me irya ju ẹbyị ọlẹ kọ wẹẹ họọ ka. Ị nwọọ ajị nya ang onyobyi ọhọhọ nya angịnyị nyahị.

⁹Ị ju iworu nyamwụ ẹ-ẹga nya angịnyị inyibyi, ị jwoo eji i-iworu nya alụdụ, ọwa ayịdang á tị họ ang onyobyi ọhẹ-lọhẹ họ lee o-me ọnọọkịla ọhẹ-lọhẹ me kpá ẹnẹnẹhẹ lẹka.

¹⁰Kpọkpọọkpọ ọ tị ri irya nya Amkpaa kị ka ru ọnchẹ nyamwụ chwọọchwọọ, họọ ang ọjụjụ. Igu nyamwụ ri iya ọkịlaakịla ọ-kpa ọhịnyọhi nya ịhọbịrị warị. Lẹẹlẹ, ọ ka ri ehe tata ka yẹ iru nya anyị ịtụma nyamwụ, irya nya Amkpaa ka kịlahị ẹ-ẹpwụtụbwọ nyamwụ.

¹¹Ụka ká akama ọyẹyẹ nyamwụ-ụ́ myị kpa, ọ ka myịmyị-ị̀ chị ọkẹkẹnị wẹẹ. Ọ ka jẹ nyori ajị akama ịlẹ kọ yẹ lẹ, ị ka wa angịnyị lụmẹ-lụmẹ nya alabwẹla ọnyịịla. Ọ ka kpa olo nya ịhọbịrị nyaa wuu.

¹²Lẹẹ lẹ, m̀ ka ya iwe-ahụrụ olihi-ihi ọtụka họọ, ẹpwarịrị nya angịtụka bala angị lọngịrị, chajị nyọlẹ kọ hu ọhịhị nyamwụ ha kị wọọ jula angịnyị inyibyi. Ọ ye ịhọbịrị nya iru nya angịnyị lụmẹ kpa, bala ọ-raabwọ bịlẹ Ohe Oluhye kọ ka hịnyọhiihi.