Read idege AYỊSAYA 54 Bible Online

AYỊSAYA 54 - idege bible

AYỊSAYA 54

¹“IJerusalẹm ee, mwu eje mẹ, à la kpá lala ọnyang ọtụma ọlẹ kọ ma ọnyị ẹnẹnẹhẹ lẹka! Tị mwu eje, ká diwuru gboo mẹ, á hya ụma ẹnẹhẹ lẹka, à tị ka ma anyị ju iru gụ ọnyang ọkịla ọhẹ-lọhẹ kọ rwọ ọrụ lẹ.” Ịnyị Amkpaa a ya lẹ.

²Pyẹ ẹpwa nyang ẹpwụ maaa, ká ju ịnawụ nyang ẹpwụ mẹ. Gbile iri nya ẹpwang nyang kị la ediyo, ká ya ekeji iweji ju eji giri-giri ịnyịnyị mẹ.

³Oyi nya ẹpwa nyang juwa ka pyẹ gu onwu gu ọba, anyị ịtụma nyang ka nu alẹpwụma ịkịla ọpyị, ị ka ya ịpyị ị-kpụ egwawụ-egwawụ wuu kụ ẹpwa.

⁴Ā juhi ka, oyoyi-í á ka jung myịmyị gụ ọwẹ kaka. Ā chị uko nya oyoyi ka, ẹpẹpẹ-ẹ́ ka jung gụ ọwẹ kaka. À juwa ka deeri nya oyi ọlẹ kọ jung lụka nya enjwo nyang, á tụtụm ka kpịtịya nya o-nwee nya ahụ-ogu oriri nyang kaka.

⁵Ọngọ họng-ng họ à ri ọrụng lẹ, ẹnyị nyamwụ ri Amkpaa Agụgụ. Ọngọ Ọlịgọgọ nya ala Isirẹlụ a ri ọngọ gbang kpehe lẹ. Ọwa-à ri Ohe Oluhye nya odehe ọlẹ wuu lẹ.

⁶Isirẹlụ ee, Amkpaa wụrụng tịrẹkpẹ lala ahụ onjwo ká ọrụmwụ pwọọ nyẹẹkpẹ dọọ kọ juwa yẹ akama me imahị. Lẹ, Ohe Oluhye juwa bying yẹkẹẹ,

⁷“Lụka okpii ọhẹ, m̀ nyẹẹkpẹ dang, bwula ọháha ọlẹ kam la lẹ, m̀ ka yeng tịrẹkpẹ lẹ.

⁸Lụka ká agbama nyam wụ gbụrụ-gbụrụ jahị dang, m̀ yahị chị ọka hing. Bwula ọháha ọpyịyọọ nyam lẹ, m̀ ka yẹ ahyẹẹrwẹrwa nyang.” Ịnyị Amkpaa ọngọ gbang kpehe a ya lẹ.

⁹“Jaabwọ kam nwa iro lụka nya iNuwa nyori ḿ ka do enyi ta odehe ayịreji myịmyị kaka, ịnyịnyị-ịnyịnyị m̄ wẹẹ nwa iro nyori ḿ ka wụ ẹjẹ tang gụ ọwẹ kaka lẹ. Ḿ ka yẹng akama myịmyị kaka.

¹⁰Ịgbọdọ-ọ́ọ̀ tụrụ-tụrụ bwụjẹ-bwụjẹ, ká ikiti-í myị yịra-yịra wẹwẹ, ọháha o-gbu enyi-ka nyam-ḿ ọlẹga nyam á ka myị ẹnẹnẹhẹ kaka, iro nya okpunyi ọlẹkam nwa tanụ-ụ́ ka tụ biri kaka.” Ịnyị Amkpaa ọlẹ kọ la ọháha ẹ-ẹga nyanụ à ya lẹ.

¹¹Amkpaa yẹkẹẹ, Ahụ iJerusalẹm ee, ahụ epweji ọ-yẹ akama ye olewe ka ọwẹ ee, m̀ ka kpa ajwọ ịnyịịla-ịnyịịla họ itiwe onyeewe nyang, m̀ ka kpa ajwọ ịnyịịla-ịnyịịla ma egwalọ nyang nwụ.

¹²M̀ ka kpa ogbe-ogbe me ebe ịnyịịngịrị nyang, m̀ ka kpa ajwọ ịnyịịla ị-hụ́ myịrị-myịrị họ ogirigba nyang, ugulọ ọdagaga jung ka ri ajwọ ịnyịịla-ịnyịịla wuu.

¹³Am lịlọm à ka mẹ ang jẹ angịnyị nyang lẹ, ị kị pyẹ pyọọọ ẹ-ẹpwụ nya okpunyi.

¹⁴À ka godayị giri-giri bwula ẹla ọ-họ kpakpa, á ka chị uko nya angịhyẹ ọ-ka yẹng ba ka. À ka hụ lokpunyi, á ka ju uhi nya ịngịngịhyẹ kaka.

¹⁵Ó-ri ká ọngọngọhẹ-ẹ́ mwẹla tang aalẹ, aam à doo ẹrụ ọọwa ka. Ọngọngọhẹ kọ junu jwẹẹ aalẹ, ebe ba ọngọọwa lẹ.

¹⁶“Am à họ ọlụdụwa ọlẹ kọọ du ila ju kpa họ ang-abwọ nya ẹwụ lẹ. Am à họ ọngọdẹwụ ọlẹ kọọ kpa ang-abwọ ịịwa ta ang ayịreji lẹ.

¹⁷Ang-abwọ nya ẹwụ ọnyị myị ọnyị kị họ nyọka kpa jahị dang á ka jụng họ ịngịngịhyẹ ka. Ẹla myị ẹla kị ya bang kịrọrọ wuu, à ka hyaa hi ịlọng cheri-cheri. Apyobwuna ịlẹ ká anchẹ nyam Amkpaa la à wẹ lẹlẹ. Am Amkpaa kam wẹẹ ya ẹlẹwẹ à kaa ya ọkụrụ-kụrụ haa lẹ.”