Read idege AYỊSAYA 55 Bible Online

AYỊSAYA 55 - idege bible

AYỊSAYA 55

¹Amkpaa yẹkẹẹ, Anụ angịlẹ ká imyi-enyi nwụ wuu ā kẹwẹ mẹ! Enyi lẹẹ lẹ-ẹ̄! Anụ angịlẹ kanụ la okpoko ka la ka ā kẹwẹ mẹ, anụ kẹwẹ kaka ra ang oriri kanụ ri mẹ. Anụ kẹwẹ kaka ra ere bala enyi-ẹmẹ nya ẹna lorwaahị mẹ.

²Ányị tị du kanụ juwa bịrị okpoko ju ang ịlẹ kị ka kpụnụ ka? Anụ juwa nwụ ịlọnụ lụkụrwọ nya ang ịlẹ kị kaa wunu ẹpwụ ka. Anụ ke ụrụ lam wẹẹ kanụ ri ang ọnyịịla. Ọọwa, ānụ ka ye ang oriri ọlẹ kọ hagụ wuu lẹ.

³Anụ ke ụrụ, kanụ kẹwẹ wẹ ẹga nyam. Anụ ke ụrụ, chajị ká odehe nyanụ ka há hanụ. Aalẹ, m̀ ka nwa iro ọpyịyọọ tanụ, kam ka họ ọnụ ọmyịmyị nyam ịlẹga nya iDevidi wuu jịra ẹ-ẹga nyanụ.

⁴M̀ hwoo olegbeju bala adịrahụ ọkpẹhị rịrị ụma datị-datị, ọwa-à ri olibeenu nyam ẹ-ẹga nyaa lẹ.

⁵Anụ ka be wụrụ ẹpwụma ịlẹ kanụ jẹjẹ ene ka, ị tị ka ju ihi nya ẹkọ nyanụ lụnyẹ-lụnyẹ warị. Ị ka họ ịnyị chajị am à ri Amkpaa Ohe Oluhye nyanụ Ọngọ Ọlịgọgọ nya ala Isirẹlụ lẹ. M̀ ka ya ihi bala ụmụmẹ hanụ.

⁶Anụ yẹ irya da wẹ ẹga nya Amkpaa mẹ, anụ ka woo ọyị myị wẹẹ, anụ raabwọ họọ mẹ, ọ ji ọnaabwọ wẹẹ.

⁷Angị họ ang onyobyi ā tụ hi ụgbẹyị onyobyi nyaa deeji, kị pẹhi irya ịtịpyọ nyaa ịnyịnyị mẹ. Ị jahị kpata nyà wẹ ẹga nya Amkpaa mẹ, ọ ka yẹ ahyẹẹrwẹrwẹ nyaa. Ee, ị wẹ ẹga nya Ohe Oluhye nyahị mẹ, ọ ka hịnyọhi haa.

⁸Amkpaa yẹkẹẹ, “Irya nyam-ḿ lala irya nyanụ ka, ụgbẹyị nyanụ-ụ́ tị ri ịnyam ka.

⁹Jaabwọ ká uhye-ọgba la uhye gidogbo gụ odehe ịnyịnyị ụgbẹyị nyam à la uhye gụ ụgbẹyị nyanụ lẹ. Ịnyịnyị-ịnyịnyị irya nyam a la uhye gụ irya nyanụ lẹ.

¹⁰“Enyi bala ekpawẹ iwule-wule á do, ị́ị̀ tịrẹkpẹ ka uhye-ọgba kaka, ị̄ị̀ họ ká ịpyị ka la hyẹ̀hyẹ̀, du ká ang-ẹrụ kaa nwa. Ọọwa, ajẹ nya ang-ẹrụ à kaa ji nyọka ya tọ, ang oriri à kaa ji nya oriri ịnyịnyị lẹ.

¹¹Ịwẹ-ịwẹ ẹla ọlẹ kam kaa ya à la lẹ. Ọ́ ka nyà tịrẹkpẹ chịm ọgụ ịịwẹ, la ọ-họ ang ọlẹ kam doo ẹrụ kaka họ ka lẹ ka. Ọ ka họ ang myị ang ọlẹ wuu kam doo kpehe nyọka họ.

¹²“Anụ ka la ịlọnụ, anụ-ụ̀ kpehe rụ bwu ịBabilọn lọkẹkẹnị, juwa jẹ nyà lokpunyi. Ịgbọdọ bala ikiti ịlẹ kịị wẹ ị-ịlahị nyanụ ka dọmwụ nya eje omwumwu ịlẹ kpamm, ekeji ka du abwọ lọkẹkẹnị.

¹³Okoji ịsayịpịrẹsị ka ye iwe nya ejwo-owuru ku, ọkọkọ nya ejwo, ekeji ịmatụlụ à ka bwu lẹ. Ekeji ịwẹ ka ri ang-ẹjẹẹ ọ-kpa ihi wẹ ẹnyị nya Amkpaa, ang-ẹjẹẹ ọlẹ kọ ka godayị rịrị gbe oyi myị oyi.”