Read idege AYỊSAYA 56 Bible Online

AYỊSAYA 56 - idege bible

AYỊSAYA 56

¹Anụ yụbwọ chị abwẹla ọnyịịla gogo kpa ụ-ụwa kanụ juwa họ ang ọnyịịla mẹ. Chajị ọ ka tata ka ọchịda nyam ka pwụ eji lọmwaaa, ọ-gba kpehe nyam chị ehe.

²Ahị ọwawa ka juwa ha ọngịnyị ehe ọhẹ-lọhẹ ọlẹ kọ yụbwọ chọọ gogo. Ọngọlẹ kọ ka kpa ehile nya Ẹnụtụrụ Ọhịnyọ Lụkụrwọ kọ bịrọọ ka aalẹ, m ka wahị ha angịlẹ wuu kị chịlaa ebwo hi ang inyibyi.

³Ọngga ọnyị myị ọnyị kọ myị ye Amkpaa lẹ, ọngọọwa a me irya kọ ya Amkpaa tị chịm ebwo hi angịnyị nyam ka. Lee ọngọlẹ kị ru ụgba kọ ri ọlẹng ka a yẹkẹẹ, “Am lẹ, m tị ri okoji ọnwọnwụ-nwọnwụ dẹẹ ene lẹ ka.”

⁴Ẹla ọlẹ ká Amkpaa ya chajị nya angị ri alẹng ka ri yẹkẹẹ, “Angị ri alẹng ka ịlẹ kị kpahị ju Ẹnụtụrụ Ọhịnyọ Lụkụrwọ nyam kị chụ ang ịlẹ kị kpụm ịpyọ, kị tị yụbwọ chị iro ọnwanwa nyam gogo,

⁵Ịwa m ka hu ang ọ-kpa kpịtịya o-gbe oyi myị oyi bala ẹnyị haa ẹpwụ ube ịgọgọ bala ugulọ nyam ọlẹ kọ hagụ anyị alẹng bala anyang ọmama. Chajị ẹnyị ọlẹ kam ka hu haa ka ri o-gbe oyi myị oyi ọlẹ kọ ka jẹẹ yịlẹ kpá myị ẹnẹnẹhẹ kaka.”

⁶Angga ilepwoja ịkịla ịlẹ kị kpa ịlaa ka yẹjula angịnyị nya Amkpaa kị ka myị ẹrụ họọ bala ị ka ri anchẹ nyamwụ. Angịlẹ wuu kị kpahị ju Ẹnụtụrụ Ọhịnyọ Lụkụrwọ kị bịrọọ chọọ ịrị ka. Bala angịlẹ kị yụbwọ chị iro ọnwanwa nyam gogo.

⁷Angịịwa m ka kpa kele ka uhye nya ọgbọd nya ịSayọn ọlẹ kọ ri ọgbọdọ ịgọgọ nyam. M ka họ kị ka myị la ọkẹkẹnị ẹ-ẹpwang nya abwọ ọrịrị nyam. M ka ye iya ọkịla ju ila bala iya ịkịlaakịla lụmẹ-lụmẹ ịlẹ kị kpa warịwẹ uhye nya ogidi okiliya nyam nya abwọ ọrịrị nya angịnyị wuu.

⁸Jaabwọ ká Ọngọlahị Amkpaa ya a lẹẹ lẹ, ọngọlẹ kọọwa tụ ala Isirẹlụ angịnyị ịlẹ kị wu kpa rụ bwu ọgbẹwụ, m ka tụ angịkịla guru ẹ-ẹga nyaa datị-datị hi angịlẹ kị tụguru kpa ene-ene lẹ.

⁹Amkpaa ya ẹla ta alepwoja ịkịla yẹkẹẹ, Anụ kẹwẹ mẹ anụ iyo ịnyịịngịrị ịlẹpwamẹ bala ịlẹpwụ nya ipyinu, anụ kẹwẹ kanụ wu iyo ịkịla mile mẹ.

¹⁰Angịgbeji nya ala Isirẹlụ kpụ idu, ịwa wuu á jẹ ang ka. Ịwa wuu ri ibwu i-ku ịnụ. Ị lọngịrị kaa warụ myị ka. Ụka myị ụka ị juwa nune juwa la ụlaa. Angị nune la alaa-alaa alegbeju igbeji nya angịnyị nyam a ri lẹ. Ị kpụ idu chwiichwii kpa dọmwụ jẹ ịngịngịhyẹ ka. Ị ri ibwu i-ku ịnụ ịlẹ kị kaa warụ myị ka. Une ọnọnọ ụka wuu a haa lẹlẹ.

¹¹Ị lala ibwu ịlẹ kị ri orim, ịlẹ ká ang oriri á kaa waa ẹpwụ myị kaka. Ị ri angịgbeji ị jẹ etu nya ẹla myịmyị ka. Ọng myị ọng nyaa rụ ka ụgbẹyị nya ụbwọ ịlọmwụ ẹga kị ka ri apyobwuna ha ịlaa. Ọọwa lẹ, ị juwa wụrụ awụlẹ lẹlẹ.

¹²Anụ kẹwẹ kahị ra ere ọnyọọngịrị kahị nwa wu ẹpwụ ọgwọgụ. Chajị ijuju ka myịmyị la jaabwọ ká alẹ la ọlẹ kọ ka dọmwụ lụmẹ mwụ aba ba.