Read idege AYỊSAYA 57 Bible Online

AYỊSAYA 57 - idege bible

AYỊSAYA 57

¹Ọngịnyị ọlẹ kọ ri ọlabwẹla ọnyịịla gbu, ọ́ tị gu ọngọngọhẹ ọ-ọkịlẹtụ lee o-ri ọngọngọhẹ ẹla ka. Ị wu angịlẹ kị hu ịlaa ha ri angịnyị nya Ohe kpa rụ, ọ́ ri ọngọngọhẹ ẹla ka. Tụbwọ ka lẹ, aalẹ Ohe Oluhye hu ọlabwẹla ọnyịịla kpa rụ hi akama.

²Angịlẹ kị jẹdịyẹ ẹ-ẹpwụ nya abwẹla ọnyịịla nyaa aalẹ angịịwa ju ka ẹpwụ nya okpunyi. Ịyẹ ọmwịịnyọ ụka kị hị nọnọ kwẹẹ juwa gbu.

³Ma an a tị lẹ, anụ kẹwẹ wẹ ẹgẹlẹ wẹẹ, anụ anyị alẹng nya anyang alụhwa, anụ anyị ịtụma nya alakpara bala alachị.

⁴Oowo anụ tị wẹẹ kpa họọ? Oowo anụ tị wẹẹ pyị ịnụ nyanụ maa juwa hụlọ ahụ ju juwa da ẹlẹlẹ mile-mile ju-u? Anyị ịtụma nya angị bịrị ehile bala angị kpa angịnyị anụ ri kaa?

⁵Anụ kaa raabwọ ha ihye ijiga ịlẹ kị ka họ ka ọpyị ka ju eyo bwula o-juwa lọ ụya e-ekpeleji nya ekeji ilekpo-lekpo ọnyị myị ọnyị. Anụ angịlẹ kanụ kaa go anyị nyanụ kpa ka kịla iya ẹ-ẹpwụ nya ajwọ bala ikpokpo nya ịba kaa?

⁶Ihye ijiga a ri ajwọ ịhịlị-hịlẹ ịlẹpwụ nya ikpokpo nya ịgbọdọ bala eku nya ajwọ ụ-ụwa a ri ebwo nya ang ịgaga ịlẹ kanụ ga ha ịlọnụ lẹ. Ị wa anụ kaa kịla iya la ere ịnwanwa ha lẹ, ịwa anụ tị kaa kịla iya la ẹjẹ nya ambakpa ha lẹ. Anụ me irya ka ang ịịwa wuu ka kpụm ugbodu nyii myị-ị́?

⁷Anụ kpa ịbẹẹdị nyanụ ka da u-uhye nya ịgbọdọ iluhye ịtụka bala ikiti ịlẹ kị la uhye gụ wuu, ụ-ụwa anụ kaa kịla iya bala o-juwa họ ụya lẹlẹ.

⁸Ẹ-ẹkpẹ nya ukpileku nya ube onune nyanụ bala ẹpwayịrẹtẹ nyamwụ anụ go ekpeku nya ijiga nya alepweji nyanụ rịrị lẹ. Ọọwa lẹ, anụ tụụbwọ him nyẹẹkpẹ dam lẹlẹ dam lẹlẹ. Anụ hu ịnyanụ hwaa ka uhye. Lẹ anụ kpụ uhye nya ịbẹẹdị i-ju ẹpwụ ịtụka nyanụ bala aligu nyanụ ịlẹ kanụ nwụ uri nyaa chajị kanụ ka ba nune lawụlẹ. Ọọwa, anụ họ imyi nya ịnyịrọ nyanụ a wu ẹpwụ lẹlẹ.

⁹Anụ wuleji jẹdịyẹ ka ẹga nya ịMọlẹkị la ida. Anụ gu ida ọwụwụ wụ ịlọnụ pwọọọ bala ọ-họ iru nya ịtangare myị ẹga myị ẹga rịrị kpọrịkọọ lẹ, anụ kele ka raabwọ ha ojiga ịMọlẹkị lẹlẹ. Anụ du angị ku ọmwakpa nyanụ ẹrụ ka ẹga ọlụrụ ọtụka-ọtụka, nyọka tịtọ nya ihye ịlẹ kanụ raabwọ, kpụ kpá anụ dọmwụ du angị iwo ẹrụ hireji ka ejegu pẹtẹẹ.

¹⁰Ịnyịrọ chịịnụ pyẹpyẹ chajị nya agịlata ọgaga ọlụgbẹyị nyanụ kanụ juwa pịlahị nya ihye ịkịla lẹ, ma anụ tị myị chị ẹjẹ kpá yẹkẹẹ, ang ohideeji a lẹẹ kahị lẹẹ họ lẹlẹ-ẹ́, kpa anụ kpụba kaka. Anụ me irya ká imyi nya ijiga ọ-ka raabwọ nyanụ ka danụ ụbwọ lẹ, anụ wẹẹ kịlahị la ọ-họ ịnyịnyịịnyị lẹ, ọ jụụnụ kaka lẹlẹ.

¹¹Ọọwa Amkpaa a taa ịtọ wo yẹkẹẹ, Oowo anụ a tị me ká ihye ịịwa ịlẹ kanụ dachichị juhi nyaa, kanụ wẹẹ me ọnọọkịla jem dọmwụ ri deeri him gbanggbang mẹ. Ọọ-lajị nyọlẹ kam huunu ujiji lụka ọtata lẹ, a du kanụ kpụba lẹka-á?

¹²M̀ ka gba abwẹla ọnyịịla bala ụkụrwọ ọnyịịla kpehe lẹ, ọhẹ-lọhẹ nyaa-á ka lọngịrị danụ ụbwọ myị ka.

¹³Ụka kanụ be ẹkọ nya ụbwọ ọdada lẹ aalẹ, iru nya ijiga nyanụ ịịwa a danụ ụbwọ myị kam yẹ mẹ! Igbachịwụ juwa ka gyaa chịịrụ kpá wuu jaabwọ kị la. Ọhụ ọ-da pilele ọlam-ọlam dọmwụ juwa ka gyaa hụrụ. Ma ọngọngọhẹ ọlẹ kọ hu ọkịlẹtụ ham dahịhilem ka hi ye ọpyị la, bala ọ-ka hi ugu nya ọgbọdọ ịgọgọ nyam la.

¹⁴Amkpaa yẹkẹẹ, Anụ da ụgbẹyị kanụ nwụla ụgbẹyị kanụ tụ ang i-ku iwe ọnyị myị ọnyị hi ụgbẹyị ha angịnyị nyam.

¹⁵Chajị ịịlẹ Agụgụ ọngọlẹ kọ luhye gụ ang wuu ọngọlẹ kọ ri ehe-tehe, ọngọlẹ ká ẹnyị nyamwụ la ịgọgọ a ya lẹ. Ma, m kụ ẹpwa ẹga oluhye bala ịgọgọ ọlala ta angịlẹ kị la dụmwọ ẹ-ẹpwụ nya olegu bala ọ-kpa ịlaa keji, chajị kam ka jẹẹ chị nyaa ahị, kam ka chị ọkịlẹtụ nya angị la dụmwọ ahị.

¹⁶Chajị m ka juwa kịlahị la ẹla ọ-mwọ tanụ pyịyọọ kaka lee ọ-ka juwa ju agbama tanụ ụka wuu kaka, ịnyị ka aalẹ olegu nya angịnyị wuu ka chaa pyẹpyẹ, ugbodu okpukpuru nyaangịnyị ịlẹ kam họ ka ta ayịreji i-ijata nyam.

¹⁷Chajị m wụ ẹjẹ taa ụka ọhẹ chajị imajẹ onyobyi nyaa. M yaa akama, m yahị nyam kpịbaa hyaa ẹpwụ nya agbama nyam. Ma ị kịlahị la egbeju-ọngịrị nyaa, juwa dịrẹ ụgbẹyị nya ịlaa ọlẹ kọ haa.

¹⁸M yẹ ụgbẹyị nyaa wuu lẹ, ma m tị ka haa uda. M ka kpaa bala ọ-ka daa ụbwọ. M tị ka kpụ angịlẹ wuu kị bida ẹjẹ.

¹⁹Nya ọ-ka kpa eje nya ogbo kele ka ugbọọnụ nyaa lẹ. M hu okpunyi ha angịnyị wuu tụ angịlẹ kị ji ẹga ọlụrụ bala angịlẹ kị ji chwẹẹ! Ịnyị Amkpaa a ya lẹ. M ka họ angịnyị nyam uda.

²⁰Ma angịnyị inyibyi lala Ihu ọtụka ọlẹ kọ kaa nọ chịng myị ka. Enyi ọlẹpwụ nyamwụ kaa juwa gu ágbụ, juwa gba ịwa bala ịrị ịlọmwụ nya enyi kpehe.

²¹Ọọwa, Ohe Oluhye a yẹkẹẹ, Okpunyi-í juwa ha angịnyị inyibyi koo.