Read idege AYỊSAYA 58 Bible Online

AYỊSAYA 58 - idege bible

AYỊSAYA 58

¹Anụ chị eko lomyi gboo jaabwọ myị abwọ kanụ ka chị ka ba myị mẹ, anụ chụ omyi nyanụ hi ka. Anụ hu omyi nyanụ hwaa ka uhye lala ẹkụrwẹ mẹ. Bwuru egbeju ọnyọọngịrị nya ala Isirẹlụ angịnyị nyam ya jaa mẹ!

²Ị kaa juwa raabwọ ham ẹnụ myị ẹnụ ịlẹhị lẹẹ, ị byi ịlaa kị juwa tịtọ kị ka jẹ agbayị nyam bala ọ-ka ju ihi nya ehile nyam. I ya ẹla lala epwoja ọlẹ kọ kaa họ abwẹla ọnyịịla họ ma họ, lala ụka kị kaa deeri hi ehile nya Ohe Oluhye nyaa ka. Ị tịtọ nya eje nya abwẹla ọnyịịla bwu ẹga nyam. Ọ kpaa ịpyọ nyọka tụ ju Ohe Oluhye chwẹẹ.

³Iru nya angịnyị juwa tịtọ wo yẹkẹẹ, anyị a tị du kahị ka juwa hụ limyi, ma ka tị juwa chẹhị yẹ ka-a? Amkpaa waa yẹkẹẹ, Anụ yẹ mẹ, ụka kanụ wẹẹ hụ limyi, ang nya ụbwọ nya ịlọnụ ịlẹ kị baanụ bala ọ-kpụnụ ịpyọ anụ wẹẹ ku bala ọ-myị ẹrụ ha kem lẹ, anụ tị juwa yẹ angị họ ụkụrwọ ilekpeleji nyanụ akama juwa taa pyị eji.

⁴Yẹ mẹ, ụma nya ọ-hụ limyi ọwẹ kanụ wẹẹ kaa hụ wẹẹ, arụ ọrụrụ bala uya ọmama juwa kpawụlẹ ịchwọ, tụụbwọ pịrị ang oriri gbanggbang, la imajẹ ọlala. Anụ me irya ká ụma nya ọ-hụ limyi ọlịịwẹ ka lọ m ka wo abwọ ọrịrị nyanu-u?

⁵Ụma nya ọ-hụ limyi ọlịịwẹ, m chụ lẹẹ ká angịnyị ka juwa yẹ ịlọmwụ akama. Ka ọngịnyị ka juwa hiri egbeju kpọkọọ lala ụ̀tọ́ nya ugo ọ-jụ ịcha bala ọ-ka hu awụrụ nya ida ọbaba kụrụ gọ agbụ wụ ịnyị-ị? Anụ ka wụrụ ọwẹ ọ-hụ limyi, ẹnụtụrụ ọ-kpụm am Amkpaa ịpyọ kam ka yẹ-ẹ?

⁶Ụma nya ọ-hụ limyi ọlẹ kam chụ lee tịtọ lẹẹ ịịlẹ: Anụ ka kpụba la ọ-họ angịlẹ kị kaa họ ụkụrwọ e-ekpeleji nyanụ ri. Anụ ka yi agba hi angịlẹ kanụ ya agba ju, anụ ka yi ogbilo hi angịlẹ kanụ ya ogbilo nya abwẹla onyobyi da o-omyi. Kanụ tụụbwọ hi angịlẹ kanụ tụ pyị eji kị rụ ka ẹpwa nya ịlaa wụlẹlẹ mẹ.

⁷Ọ-hụ limyi ọlẹ kam tọ ri anụ chụ ang oriri nyanụ ha angịlẹ ká imyi nwụ, kanụ kpa ikpehika ịlẹ kị la ẹpwa ka warị wẹ ẹpwa nyanụ. Ụka kanụ yẹ angịnyị jị lọhị-lọhị, anụ ya apwụ dụrwaa, anụ yahị kpịbaa hi o-ji lọhị-lọhị nya ọngịnyị ọọnang ọlẹ kanụ ri ịwọ ookpokpo lee bwu chii ka.

⁸Ụka ọọwa, ahịgboo nya ogbo nyamwụ ka wuru lala ahịgboo nya ẹnụ ụka ka ẹnụ juwa kpehe lụtụrụ, uda ọhọhọ nyaa ka pwụ eji ahyaahị lala enyi a rụ bwu ụ́gbụ lẹ. Ụka ọọwa abwẹla ọnyịịla nyang ka jilahị nya. Ọọwa lẹ ijata ojiji bala ogbo nya Amkpaa a ka juwa gbenu ịkịka ọnyị myị ọnyị lẹlẹ.

⁹Ụka ọọwa, ó-ri kanụ raabwọ aalẹ Amkpaa ka wẹ lẹ. Ó-ri kanụ be ẹkọ wụrụm nya ụbwọ ọdada, m ka myị ẹkọ lẹ.

¹⁰Ó-ri kanụ myị bwu ang oriri nyanụ ha angịlẹ kị imyi nwụ, kanụ da angịlẹ kị ji ẹpwụ nya akama ụbwọ, ụka ọọwa aalẹ, ahịgboo nyanụ ka wuru ẹpwụ nya ukpowu, ukpowu nyanụ ka yẹ lala ahịgboo nya ẹ-ẹpwụ-ẹnụ.

¹¹Ụka ọọwa am Amkpaa ka gbenu kịlahị-ịlahị ụka wuu, ọ ka họ kanụ ka wu ẹpwụ la ang ịnyịịla iriri ọ-ọpyị ọchẹnụ kịragba bala ọ-ka họ ka ekpinegu nyanụ ka la gogo. Anụ ka lala ọpyị nya ẹrụ ọlẹ kọ ju enyị lụmẹ yẹẹyẹẹ kọ kaa há ang, lala ẹmwụ-enyi ọlẹ ọlẹ kọ kaa nwụ kaka.

¹²Anyị nyanụ ka wule egwalọ inyogo nya epweji ịtụka ịlẹ kị tụrụ ju eji bala ọ-nwụ ọmwụ uji nya egwalọ inyogo mẹ. Ụka ọọwa ị ka wụrụụnụ yẹkẹẹ, angị nwụla egwalọ ịlẹ kị bene, angị ma agbayị ịla opeje ẹpwa da bala ọ-mẹ ẹpwang ịkụkụ nya angịnyị tịrẹkpẹ lẹlẹ. Angị nwụla agbayị nya opeje ka angịnyị ka tịrẹkpẹ ka kụ ẹpwa lẹlẹ.

¹³Amkpaa yẹkẹẹ, “Ó-ri kanụ kpa Ẹnụtụrụ Ọhịnyọ Lụkụrwọ chị ịgọgọ jwoo kanụ rụnyẹ ku ang nya ụbwọ nya ịlọnụ ịlẹ kị kpụnụ ịpyọ kem ẹnụ ọọwa ka aalẹ, kọ ri kanụ hu ẹnụtụrụ ịgọgọ nyam nya o-ju apyobwuna nya ụbwọ ịlọnụ ka kanụ jwoo ihi, la o-hwoo nọ juwa kpa tụ aha bala ọ-họ ụkụrwọ ẹnụ ọọwa lee juwa ga agịlata ẹnụ ọọwa kaka.

¹⁴Ụka ọọwa aalẹ, anụ ka ye ọkẹkẹnị bwu ẹga nyam am Amkpaa chajị nya ịgba ọ-gba ham. M ka họ ka angịnyị ka junu ihi ẹga myị ẹga am odehe ọlẹ wuu.”