Read idege AYỊSAYA 59 Bible Online

AYỊSAYA 59 - idege bible

AYỊSAYA 59

¹Anụ yẹ mẹ, Ụbwọ nya Amkpaa-á la kpii nyọka chịnụ da myị ka lẹka lee ụrụ nyamwụ ọ-la ilo nyọka wo ẹla ka lẹka.

²Ma ọkọkọ nya ọọwa ang onyobyi nyanụ a ri ang ọhịlabwọ ọlẹ kọ ku iwe ọlẹ kọ chịnụ ebwo hi Ohe Oluhye nyanụ lẹ. Ọhọbịrị nyanụ a tị du kọ yahị kpịbaa hiinu lẹ, ọọwa lẹ, ọ wo abwọ ọrịrị nyanụ kaka lẹ.

³Abwọ nyanụ chịrị la ịwọ nya angịnyị ọnwụnwụ nyanụ myị la ang-ibyi ọhọhọ. Egbinụ nyanụ myị la ọnọọkịla omeme. Ẹla nya imajẹ-imajẹ kem ẹlẹlẹ a kaa gba kpehe lẹlẹ.

⁴Ọngọngọhẹ-ẹ́ kaa da ụpwụ kpa ọngịnyị ka ịkọtụ bala o-ba ẹla nya ịlẹhị jẹ kaka. Ọngọngọhẹ nyanụ á kaa da ụpwụ la abwẹla ọnyịịla ka, ọngọngọhẹ ju ka ẹpwụ nya ehile la ẹla nya ịlẹhị lee ọkpẹẹkpẹẹ kaka. Ị kpụ nịrọ ehwo nya ala i-me ịnịịkịla. Ị jẹ ẹnyị nya ang onyobyi lẹ, ị ma anyị ri ang-ibyi lẹlẹ.

⁵Ị chị eji nya ịgbịjị anyị, i wo ekiiwu nya abakpa, ị da apwụ lẹlẹ. Ọng myị ọng kọ ri eji nyaa lẹ à kaa gbu lẹlẹ. Eji nyaa ịlẹ kị bene a kaa chị anyị ri ịgbịjị lẹlẹ.

⁶Obyi onyobyi ịlẹ kanụ me ju angịnyị ka kpụ igu myị lala eji nya ịgbịjị. Eji nyamwụ ookpokpo a be ene ịlo a ka kpehe bwu ụwa gẹgịlẹ lẹlẹ. Ma obyi omeme ịtịpyọ ịwẹ á juwa ka họ ịngịngịhyẹ ọnyịịla hanụ ka, ịwẹ wuu ri ang i-hi deeji lala apwụ ọlẹ ká ekiiwu nya abakpa ịdapwụ.

⁷Ụka wuu obyi omeme nyanụ ri ọ-ka họ ang onyobyi, anụ tụmwụ bịrị ụka nyọka họ ọwẹ kaka. Anụ kaa chị agaga ka nwụ ikpehika nya anyị nya angịnyị ịlẹ kị jẹ ang onyobyi ka. Anụ kaa gu iyabwọ rịrị e-eji bala ayịreji ọtata rụ nyẹẹkpẹ da, ẹga myị ẹga kanụ ka.

⁸Ị jẹ ang ọlẹ kị wụrụ okpunyi nya ịlẹhị ka, abwẹla ọnyịịla á juwa ọ-ọgụ nyaa kpong-kpong ka. Agbayị nyaa wuu ịlẹ kị da la kụrwọ-kụrwọ. Ọngọngọhẹ ọlẹ kọ jẹdịyẹ bwu ụgbẹyị nyaa á kaa la okpunyi ẹnẹnẹhẹ kaka.

⁹Chajị nya ọọwa a du lẹ, ka angịnyị yẹkẹẹ, Ịnọọ ịnyị a mịlẹ du lẹẹ ka eje nya abwẹla ọnyịịla ọ-nwụ họ á ji bwu ẹga nya angị tụụhị pyị eji ka lẹẹ. Ịnọọ, ịnyị a mịla du ká Ohe Oluhye á myị chịhị da bwu ụbwọ nya angị tụụhị pyị eji ka lẹẹ lẹ. Abwẹla ọnyịịla á tị wuhi ọyị kaka. Ahị godayị yẹhị rịrị gbe ahịgboo ma tị yẹ wẹẹ. Ẹga wuu ri ukpowu. Ahị yẹhị rịrị gbe ohwoo nya ahị ọpyẹpyẹ, ma ahị tị jam jẹdịyẹ ẹ-ẹpwụ nya owu ọchịchị kpemkpem.

¹⁰Ahị juwa kpa abwọ ma kpokpookpo tụ ugulọ da lala alidu, lẹ ahị juwa ma kpokpookpo lala angị ju egbahị kaka lẹlẹ. Ahị kịlata mileji la ẹpwẹnụ lala ụka nya odu ohihi lala ụka kahị mwẹẹkpẹ juwa ẹ-ẹpwụ nya ejegu.

¹¹Ahị chị arụ lala ịnarwọ, ahị mwu eru lida ọbaba lala enewulo. Ahị yẹhị rịrị gbe eje ọkpakpa ọchịchị, ọ tị ri ododu. Ahị yẹhị rịrị gbe ọchịda bwu ẹga nya Ohe Oluhye, ọ tị ji lụrụ hiihi.

¹²Chajị ang inyibyi ịlẹ kahị họ bang ju iru lụmẹ, ịhọbịrị nyahị ahị ayịdang yeje wuhi. Ehile ọbịrịị-bịrị nyahị jam tahị ịlẹhị, ahị jẹ ang inyibyi nyahị wuu.

¹³Ahị la egbeju-ọngịrị tụng pyịpyị, ahị pwang rwarụ, ahị tịrẹkpẹ hi ọ-ka bang ahụ Ohe Oluhye nyahị jẹ. Ahị juwa me ịnịịkịla ịlẹ ká ọkịlẹtụ nyahị jẹ ẹlẹlẹ nyaa ka.

¹⁴Ebe nyahị ku eje nya abwẹla ọnyịịla da kẹkpẹ, abwẹla ọnyịịla-á ka jẹẹ lọngịrị tụ wẹ ọnaabwọ myị kaka, Ẹla nya ịlẹhị kịlata mileji ojiya nya alụma, angị họ ẹla nya ịlẹhị-ị́ ye ẹga ụ-ụwa kaka.

¹⁵Ẹla nya ịlẹhị ku amwụ lẹ, du ka ọng myị ọng ọlẹ kọ hu abwọ hi ang onyobyi ọhọhọ lẹ aalẹ, a ri ang o-wu ri nya angị inyibyi lẹlẹ. Ụka ká Amkpaa yẹ ọwẹ lẹ, ọ wọọ ẹjẹ lụmẹ chajị nyọlẹ ka abwẹla ọnyịịla á ji ka.

¹⁶Ọ la Amkpaa ahịbwuu lụmẹ nyọlẹ kọ yẹ ka ọngọngọhẹ-ẹ́ ji nyọka raabwọ chajị nya ọ-da angịlẹ kị tụ pyịpyị ụbwọ kaka. Ọọwa lẹ, ugburubwọ ọnyẹẹgẹga nya ịlọmwụ ọwa ayịdang ọ kpa gbaa kpehe bala ọkụrụ-kụrụ ọọwa lẹ. Abwẹla ọnyịịla nyamwụ a godayị rịrị kpakpaakpa lẹ. Chajị nya ọọwa a du ká ọwa ayịdang lịlọmwụ jụ kele nyọka chịnụ da bwula ọngịrị ụmụmẹ nyamwụ bala eje nya abwẹla ọnyịịla nyamwụ lẹ.

¹⁷Abwẹla ọnyịịla a ri ọkụmada o-ke ọkịlẹtụ nyamwụ lẹ. Ọngịrị nya ọchịda a ri okpo ọkụrụ egbeju nyamwụ lẹ. Ọ hu ọ-họ kwiwa kụrụ ịlọmwụ lala awụrụ ogbileji. Ọ hu agbama nya ọngịnyị nya Ohe Oluhye oriri dabarị ịlọmwụ lala ịgbagiri ọ-dakụrụ.

¹⁸Ọ ka yẹ aluji nyamwụ akama jaabwọ ká ọ-họ tịpyọ nyaa la. Ọ ka nwụ uri tịrẹkpẹ ha angịlẹ kọ waa ẹjẹ. Tụ aluji ịlẹ kị kụ ọpyị ọlụrụ.

¹⁹Ụka ọọwa angịlẹ kị ji ọmwẹnụ-obyi ka ju uhi nya ẹnyị nya Amkpaa. Alọmwẹnụ-ụtụrụ ka ju ihi nya ogbo nyamwụ. Chajị ọwa ayịdang ka lala ọhụụ nya enyi ọnyọọngịrị bala igbachịwụ nya ukpenyi ọtụka ọlẹ ká Amkpaa juwa da.

²⁰Amkpaa ya ẹla ta angịnyị nyamwụ yẹkẹẹ, M̀ juwa ka warị wẹ iJerusalẹm ka gbanụ kpehe bala ọ-ka chịnụ anụ anyị nya iJekọbụ ịlẹ kanụ yẹ irya da hi ịhọbịrị nyanụ.

²¹Amkpaa yẹkẹẹ, Ọlẹ kam lẹẹ lẹ, iro ọlẹ kam lẹẹ nwa taa a lẹẹ lẹ. Olegu Ịgọgọ nyọlẹ kọ juwa u-uhye nyanụ wẹẹ bala ẹla nyam ọlẹ kọ juwa u-uhye nyanụ wẹẹ bala ẹla nyam ọlẹ kam hu ju ka ẹpwụ ọnụ nyanụ wẹẹ, ọ ka gba kpehe bwu ọnụ nyanụ kpá kaka lee ọ-gba kpehe hi ịnụ nya angịnyị nyanụ kpa lee ọ-gba kpehe hi ịnụ nya anyị ịtụma nya anyị nyanụ kpa ẹnẹnẹhẹ kaka, dọmwụ kpá pyịyọọ gbe oyi myị oyi.