Read idege AYỊSAYA 6 Bible Online

AYỊSAYA 6 - idege bible

AYỊSAYA 6

¹Ẹ-ẹpwụ nya ẹka ọlẹ ká Usiya Adịrahụ gbu, m̀ chẹhị ka yẹ Ọngọlahị kọ hụhụ u-uhye nya ẹchị-adịrahụ nyamwụ ọlẹ kọ la gidogboo. Awụrụ ogbileji nyamwụ myị̀ ube ịgọgọ pwẹẹpwẹẹ wuu.

²Ang ịhịhị ilila-lila ịlẹ kị wụrụ ịSẹrafụ juwa hụ̀ dagaga ju u-uhye nyamwụ. Ọnyọnyọọnyị nyaa ju achwọ ịrwọnyẹ. Achwọ imiiye nyaa ri ọ-kpa ke ahị nyaa, achwọ imiiye ịkịla ri ọ-kpa ke ịnyịrọ nyaa, achwọ imiiye ịkịla ihihi ri ọ-kpa hụ̀.

³Ang ịhịhị ịwẹ juwa be ẹkọ byi awụlẹ yẹkẹẹ, “Ịgọgọ, ịgọgọ, ịgọgọ! Amkpaa Agụgụ. Odehe wuu myị la ụmụmẹ nyamwụ”

⁴Omyi-ẹla ọlẹ ká ịSẹrafụ ịịwa juwa ya ta awụlẹ du ká Ube nya Amkpaa hụ́ kpuka-kpuka ju ka itiwe nyamwụ. Ube ayịdang wuu myị ri ịmwụ-ịmwụ.

⁵Ọọwa, m̄ yẹkẹẹ, “M̀ gbu hụrụ lẹ, chajị ẹla ọlọnụ nyam ju ibyi. M̀ kụ ẹpwa ta angịlẹ ká ẹla ọlọnụ nyaa ju ibyi ịnyịnyị. M̀ tị kpa ẹhị nya ịlọm yẹ Adịrahụ Amkpaa Agụgụ!”

⁶Ọọwa, ịSẹrafụ ọhẹ à hụ̀ warị wẹ ẹga nyam, lụwụla nya ila ọlẹ kọ hu bwu ogidi labụwa lẹlẹ.

⁷Ọ ya ụwụla nya ila ọọwa gum egbinụ lẹ, ọ byim yẹkẹẹ, “Yẹ mẹ, ọlẹ ká ụwụla nya ila ọlẹ gung egbinụ wẹẹ eje nya ang onyobyi o-wung wu myị lẹ. Ị hịnyọhi ịhọbịrị nyang hang lẹ.”

⁸Ọọwa, m̀ wo ká Ọngọlahị juwa towo yẹkẹẹ, “Oowo m̄ tị́ ka du ẹrụ lẹẹ-ẹ̀? Oowo à tị́ ka myị ẹrụ ọlẹ hahị kpá lẹẹ mẹ?” Ụka ọọwa, m̄ wẹ yẹkẹẹ, “Am lẹẹ lẹ, dum mẹ.”

⁹Ọọwa, ọ byim am nyị yaje angịnyị yẹkẹẹ, “Ụrụ lẹ, anụ ka juwa ke wo ẹla nyam kpá há ka gbeng. Ánụ tị ka jẹ ọdawụlẹ nya ẹlẹlẹhẹ kaka. Ọyẹyẹ lẹ, anụ ka juwa yẹ myị, ma, ánụ tị ka jẹ ịngịhyẹ ogu myị kaka.”

¹⁰Ọọwa, ọ byim yẹkẹẹ, “Họ ká irya omeme nya angịwẹ a kpụ idu, ká arụ nyaa ā kpụ ẹla tịyẹ-tịyẹ, ká ahị nyaa ā kpụ idu chwiichwii, chajị kị ka jẹ-ẹ̀ yọyị lee o-wo ẹla bala ọ-jẹ ang myị̀myị ka. Họ ịnyị chajị kị ka yẹ lẹhị, bala o-wo lụrụ bala ọ-jẹ lọkịlẹtụ nyaa kpụ ị ka yẹ irya da wẹ ẹga nyam ịị la uda ọhọhọ ka.”

¹¹Ọọwa, m̄ tọọ wo yẹkẹẹ, “Ọ tị́ la lịnyị tata ka ba anyị-ị̀ wẹẹ, Ọngọlahị?” Ọ wẹ yẹkẹẹ, “Gbee ká epweji ịtụka ịwẹ ka ta ayịreji kpụ egwawụ-egwawụ, la ọngọnọngọhẹ ọ-kụ ụwa ka, ká ọpyị ayịdang wuu ka dụwa luhwo-luhwo.

¹²M̀ ka ku angịnyị rụ hwẹẹẹ ká ọpyị ọlẹ wuu lẹpwụ-lẹpwụ ka da eyiri da eyiri.

¹³Ó-riri ká kọ hi lala ọngọ ookpokpo ẹ-ẹpwụ nya angị iwo kem ọ-ọpyị ọlẹ wẹwẹ, ị ka taa ayịreji. Isirẹlụ ka hi lala ẹchụ nya okoji ọlẹ kịị chị eku hi ju eji.” Ẹchụ nya okoji ọọwa tị ka ri ẹjẹ ọlịgọgọ ọlẹ kọ ka bwu kpehe myịmyị wẹẹ.