Read idege AYỊSAYA 60 Bible Online

AYỊSAYA 60 - idege bible

AYỊSAYA 60

¹Wuleji ká wuru ahịgboo nyang mẹ. Chajị ahị nyang pyẹ lẹ. Ogbo nya Amkpaa juwa hụ u-uhye nyang lẹ.

²Anụ yẹ mẹẹ, ukpowu ka chị kụrụ alepwoja ịkịla ilodehe ọlẹ kpá kpemkpem. Ma, u-uhye nyang ahụ tị lẹ, ahịgboo nya Amkpaa juwa chị kụrụng. Ahịgboo nya ijata ojiji nyamwụ ka hi ehe u-uhye nyang.

³Epwoja ịkịla ilodehe ka jẹdịyẹ warị wẹ ahịgboo nyanụ. Ịdịrịhụ ka warị wẹ ahịgboo nya ahị ọpyẹpyẹ nyang.

⁴Anụ hu ahị nyanụ hwaa, kanụ yọyị dagaga ju kanụ yẹ ang ọlẹ kọ wẹẹ họ. Angịnyị nyanụ juwa tụ ịlaa guru kị ka nyà wẹ ẹpwa lẹ. Anyị alẹng nyanụ ka nyà bwu ẹga ọlụrụ hwẹẹ. Angị kpẹhị rịrị anyị anyang ka hwaa e-egbirabwọ lala anjwo ichichẹ kpa nyà.

⁵Ụka ọọwa, egbahị nyanụ ka hụ tangtang la ahịgboo, ọkịlẹtụ nyanụ ka myị la ọkẹkẹnị. Ị ka kpa ụdụ ọkpụkpụ nya alepwoja ịkịla warị wanụ bwu oye ọkịla nya Ihu ọtụka.

⁶Iru nya ụnọ nya anyịrẹ-ịkamẹlụ ka warị bwu iMidiyan bala Efa. Ágba nya ịkamẹlụ nya ala iMidiyan bala Efa ịwẹ kpa okpoko ịgọm bala ọja nya ekeji kịla iya ilẹ wuu kị ka bwu ịChẹba ka warị, ị ka kpa okpoko ịgọm bala ọja nya okoji ọ-kpa kịla iya. Ọọwa iru nya angịnyị ka ya ogbo nya Amkpaa nya ang ịlẹ kọ họ.

⁷Ụka ọọwa, ị ka kpa ịkpịlọ nya ala ịKẹdaa warị wanụ nya iya ọkịlaakịla lẹ, ị ka kpa imilodo nya ala iNebayotu nyọka ya kịla iya u-uhye nya ogidi ọlẹ ká Amkpaa ka ye. Amkpaa họ ka ube ịgọgọ nyamwụ ka myị̀ la ogbo gụ olene.

⁸Oowo anyị a tị́ wẹẹ hụ tụ egbamwụ da lala enewulo ịlẹ kị juwa nyà kele ka iwindo nyaa?

⁹Nya ịlẹhị ịnyị, angị kụ ẹpwa ba Ihu ba, ka juwa godayị kụ kee yẹhị rịrị gbem. Ụgbọ nya enyi nya ala ịTaachichi ka warị wuu, ka kpa angịnyị nya Ohe Oluhye nyà wẹ ẹpwa bwu ẹga ọlụrụ lẹ, ị ka kpa okpoko onyoowuru bala okpoko ịgọm nyaa ba ịlaa nyọka ya ogbo ha Amkpaa Ohe Oluhye nyanụ, Ọngọ Ọlịgọgọ nya ala Isirẹlụ, ọngọlẹ kọ họ alepwoja wuu junu ihi.

¹⁰Amkpaa byi iJerusalẹm yẹkẹẹ, Anyị ịlọpyị ịkịla ka warị ka ma egwalọ nyanụ mẹ. Ịdịrịhụ nyaa ka warị ka myị ẹrụ hanụ. Ọ ri nya ịlẹhị, m̀ kpa agbama yẹnụ akama ụka ọhẹ lẹ, ma lẹẹlẹẹ m ka kpa ọnahị nyam yẹ ahyẹẹrwẹrwa nyanụ lẹ.

¹¹Lẹnụ bala lodu ogirigba nyanụ ka wụrụ da dodo, chajị ka ịdịrịhụ nya alepwoja ịkịla ka kpa ụdụ ọkpụkpụ nyaa warị wanụ.

¹²Ma, epwoja ọnyị myị ọnyị ọlẹ kọ myị hanụ ka ka ta ayịreji.

¹³Ogbo nya iLibanọn ka ri nyang, ekeji ịlẹ kị wụrụ ịsayịpịrẹsị bala ịpayịn bala ijupa, ịwa ị kpa họ ká ẹpwang ịgọgọ nyam ka ha ụhị lẹ. Ị ka kpa ekeji ịwẹ warị ka mang ahụ iJerusalẹm nwụ.

¹⁴Anyị alẹng nya angịlẹ kị kaa tụụnụ pyị eji ka warị ka hirikpẹẹ hanụ, angịlẹ kị kaa yẹhị danụ bwee ka warị ka hirikpẹẹ ya arụụ kụ eji a-ata nyanụ. Ị ka wụrụụnụ epweji ọtụka nya Amkpaa. ỊSayọn epweji ọtụka nya Ohe Oluhye ọlịgọgọ nya ala Isirẹlụ.

¹⁵Ụka ọlẹ ịnọ ka wụ angịnyị ẹjẹ kị deeri hing epweji ọlẹ ịnọ ká angịnyị nyẹẹkpẹ da ka hi uhwo ene-ene. M ka họ ka ka lụmẹ-ụmẹ bala ọ há ụhị. A ka ri ẹga ọkẹkẹnị pyịyọọ gbe oyi myị oyi.

¹⁶Anụ ka nwa enyi ẹmẹ nya epwoja ịkịla datị-datị. Anụ ka nwa ụdụ nya ịdịrịhụ. Ọọwa lẹ, anụ ka jẹ kam a ri Amkpaa ọngọ chịda nyanụ lẹ, Am a ri ọngọ gbanụ kpehe Agụgụ Ohe Oluhye nya iJekọbụ lẹ.

¹⁷M ka kpa okpoko ịgọm warị wanụ ọkọkọ nya okpoko onyobiri, ọkọkọ nya oje-oje, okpoko onyoowuru ọkọkọ nya okoji lẹ, m ka ya okpoko onyobiri ya hanụ lẹ. M ka ya oje-oje hanụ ọkọkọ nya ajwọ. Alegbeju nyanụ a ka myịmyị tụụnụ pyịpyị gụ olene kaka. M ka họ kị ka gbeji la abwẹla ọnyịịla bala okpunyi.

¹⁸Agbụrụ ọhọhọ á ka ji ọpyị nyanụ ọngọhẹ ka wo pyẹm gụ ọwẹ kaka. Ang ọta ayịreji bala ang ọbịrịị-bịrị a ka pwụ oyi nya ọpyị nyanụ kaka. Ụka ọọwa anụ ka wụrụ egwalọ nyanụ nya ọchịda. Igirigba nyanụ eje nya ogbo lee ohi oruru.

¹⁹Bwu ọlẹẹlẹẹ kịlahị, ẹnụ ọchịchị a ka ri ahịgboo nyanụ kaka. Lee ọya o-ri ahịgboo nyanụ lodu kaka. Ma am lịlọm kam ri Amkpaa a ka ri ahịgboo nyanụ o-gbe oyi myị oyi lẹlẹ. Ahịgboo nya ogbo nyam ka chị u-uhye nyanụ.

²⁰Ẹnụ nyanụ á ka byi kpá ẹnẹnẹhẹ kaka. Ọya nyanụ á tị ka byi kpá ẹnẹnẹhẹ kaka. Chajị Amkpaa lịlọmwụ a ka ri ahịgboo nyanụ gbe oyi myị oyi lẹ. Ụka ọọwa, ẹnụtụrụ nya ọjụjụ nyanụ ka cheju.

²¹Ọng myị ọng nya angịnyị nyanụ wuu ka họ ang ọnyịịla. Ị ka ye ọpyị la pyịyọọ gbe oyi myị oyi. Ekeji kam hu ju lịlọm a wẹ lẹ. Ụkụrwọ nya ụbwọ nya ịlọm ịnyị, chajị kị ka mẹ ụmụmẹ nyam jẹ angịnyị wuu.

²²Ọdọdẹpwa ọbyẹhị gụ wuu ka yẹ ka ri epwoja ọnyọọngịrị ọtụka. Am a ri Amkpaa lẹ, ụka kọ pwụ ẹnụtụrụ ọọwa lẹ m̄ ka họọ jịra i-ijata lẹ.