Read idege AYỊSAYA 61 Bible Online

AYỊSAYA 61 - idege bible

AYỊSAYA 61

¹Olegu Ịgọgọ nya Ọngọlahị Ohe Oluhye juwa u-uhye nyam, chajị Amkpaa ya ida nyamwụ hụm; ọ dum ẹrụ ọnyịịla tọ angịlẹ kị tụ pyị eji. Nya ọ-ka họ angịlẹ ká ọkịlẹtụ nyaa bịrị uda, nyọka ya ẹrụ ọnyịịla nya ọ-gba kpehe je anyịhị i-wu kpa bwu ọgbẹwụ, bala alagba ọ-ka la ịlaa.

²Ọ dum ẹrụ kam ka ya ẹka nya ọnahị nya Amkpaa dodehe yẹkẹẹ, Ụka ká Amkpaa ka chị angịnyị nyamwụ da pwụ lẹ. Ụka kị ka kụrụ aluji nyaa. Ọ dum ẹrụ kam ka kpụ́ angị bida ẹjẹ.

³Nya ọ-ka nwụla ang nọ ha angịlẹ kị juwa bida ụ-ụwa e-epweji nya ịSayọn. Ọkẹkẹnị bala ọkịlẹtụ ọkpịpyọ ọkọkọ nya ida ọbaba, eje nya ogbo ọkọkọ nya ẹla ọjụjụ. Ị ka lala ekeji ịlẹ ká Amkpaa lịlọmwụ ju. Ang ọnyịịla kem ị ka họ lẹlẹ. Ohe Oluhye ka la ogbo nya ang myị ang ọlẹ kọ họ.

⁴Ị ka ma epweji ịlẹ kị ta ayịreji tata lụka nya alene nwụ́. Ị ka nwụla epweji ịtụka ịlẹ kị tụrụ ju eji lụka lụrụ-lụrụ. Ịlẹ kị bịrị chị ụ-ụwa iru nya oyi lụmẹ-lụmẹ kẹkpẹ.

⁵Angga i-bwu odehe à ka godayị rịrị juwa kpa ang ha iyo ịlẹpwa nyanụ ri lẹ. Anyị alẹng nya alepwoja ịkịla à ka juwa bwuru eji nya ẹrụ bala ọ-ka họ ụkọ ju ẹrụ nyanụ lẹ.

⁶Ma, anụ tị lẹ, ị ka wụrụụnụ angịkiliya nya Ohe Oluhye Amkpaa. Ị ka junu ẹnyị anchẹ angị ị-myị ẹrụ nya Ohe Oluhye nyahị. Anụ ka ya ụya ẹpwụ nya ụdụ nya alepwoja ịkịla. Anụ ka juwa kpa ụdụ nyaa hi ọbọọchẹ.

⁷Oyoyi nyanụ bala ẹpẹpẹ o-hu junu myị kam lẹ. Chajị nyọlẹ ká oyoyi nyanụ lụmẹ mwụ aba ba lẹ, ẹpẹpẹ o-hu ju a ka ri ebwo nya ang ọlẹ kịịwa la pyịyọọ lẹlẹ.

⁸Amkpaa Ohe Oluhye yẹkẹẹ, Eje nya abwẹla ọnyịịla ham angịnyị o-nu ang lagbụrụ bala ọ-họ angịnyị ri wụm ẹjẹ. M̀ ka nwụ angịnyị nyam uri kpẹẹkpẹẹ la ọ-chịla o-hu ọkịlẹtụ ha. M̀ ka nwa iro o-gbe oyi myị oyi taa.

⁹Anyị ịtụma nyaa ru ohi ẹ-ẹpwarịrị nya alepwoja ịkịla bala adaa igogo anyị ẹ-ẹpwarịrị nya iru nya angịnyị. Angịlẹ wuu kị yaa ka jẹ kị ri angịlẹ ká Amkpaa wahị ha.

¹⁰M̀ ka chị ọkẹkẹnị ọtụka-ọtụka ẹ-ẹpwụ nya Amkpaa. Ugbodu Okpukpuru nyam ka hu hwaa ka uhye ẹ-ẹpwụ nya Ohe Oluhye nyam. Chajị ọ kụrụm awụrụ nya ọchịda. Ọ ya awụrụ ogbileji nya abwẹla ọnyịịla dakụrụm, jaabwọ ká ọrwahị onyeewe kaa họ ịnyangga ya okpo ọkụrụ egbeju kụrụ. Jaabwọ ka ahụ onyeewe kaa họ ịnyangga kpa kọ kaa hu ajwọ ịkpịnya lụmẹ kụrụ.

¹¹Chajị jaabwọ ka ajẹ ame bala apwụ kaa bwu kpehe bwu ịpyị bala jaabwọ ká ọpyị ọlẹpwụ nya iku kaa họ ka ang ịlẹ kị bwu u-uhye nyamwụ kaa bwu juwa nwa ka uhye, lnyịnyị Agụgụ Ohe Oluhye a ka họ ká abwẹla ọnyịịla bala ogbo à ka bwu kpehe ị-ịlahị nya lepwoja ịkịla wuu lẹ.