Read idege AYỊSAYA 62 Bible Online

AYỊSAYA 62 - idege bible

AYỊSAYA 62

¹Ḿ ka chajị nya ịSayọn m̄ ka hu ujiji ka. M̀ tị ka chajị nya iJerusalẹm m ka mwịịnyọ ka gbee ká ka chịda. Ụka ọọwa, ahịgboo nya ọkụrụ-kụrụ nyamwụ ka hụ́ lala ụka ka ahị juwa pyẹ lụtụrụ, lala ahịgboo nya ila owuru.

²IJerusalẹm ee, alepwoja ịkịla ịwẹ wuu ka yẹ ogbo nyang. Ẹnyị onyeewe ị ka kpa be ẹkọ wụrụng lẹlẹ. Amkpaa lịlọmwụ a juwa ka hu ẹnyị ọọwa hang lẹ.

³À ka lala ogbo nya adịrahụ ọlẹ kọ ka há ụhị lụmẹ ha Amkpaa. À ka ri okpo nya adịrahụ ọlẹ kọ há ụhị ụ-ụwa ogidi nya Amkpaa. Okpo ọkụrụ egbeju nya alugbiyegu lee ogang nya angịlẹ kị pwoku ọ-ka ri adịrahụ ogidi nya Ohe Oluhye nyang ịnyị.

⁴Ị́ ka myịmyị-ị̀ ya wụrụ ọngọlẹ ká Amkpaa pwa nyẹẹkpẹ da kpá ẹnẹnẹhẹ gụ ọwẹ kaka. Ị́ tị ka wụrụ ọpyị nyang epweji lee epwoja ọ-da luhwo-luhwo kaka. Ahụ ọlẹ ká ọrụ pwa nyị́ ẹkpẹ da kaka. Ma ẹnyị onyeewe nyang ka ri Ẹla nyamwụ kpụ Ohe Oluhye ịpyọ. Ị ka wụrụ ọpyị nyang Awụlẹ oyeye lọkẹkẹnị. Chajị ẹla nyang kpụ Amkpaa ịpyọ. Ọ ka lala ọrwahụ ha ọpyị.

⁵Jaabwọ ka onjwo okolobya kaa ye onjwo ọyẹẹnọ ọlẹ kọ jẹ ọlẹng ẹnẹhẹ lẹka ịnyịnyị, ọngọlẹ kọ họng a wẹẹ ka yeng nya ahụ nyamwụ lẹlẹ. Jaabwọ ká ọrwahụ onyeewe kaa hụ́ jojo ju ahụ onyeewe nyamwụ lọkẹkẹnị, ịnyịnyị Ohe Oluhye nyang a ka hụ́ jung lọkẹkẹnị lẹlẹ.

⁶U-uhye nya egwalọ nyang ahụ iJerusalẹm m chụ angịgbeji ịlẹ kị ka juwa raabwọ chajị nyang la ọ-tụ ọnụ pịrị ụka ọhẹ-lọhẹ kaka. Ị ka juwa kpụ Amkpaa ịtịya nya iru nya ọnụ ọmyịmyị nyamwụ ịlẹ kọ myị pyii lẹ.

⁷Ị́ ka myị Amkpaa ka mwụ ịnyọ ka gbee pwụ ụka kọ ka kpa iJerusalẹm nyà tịrẹkpẹ wuu, họọ kọ ka ru ohi am odehe ọlẹ wuu ka ẹga kọ ba.

⁸Amkpaa nwa iro la upwuriri nyamwụ bala ugburụbwọ ẹgẹga nyamwụ, lẹ ọ ka họọ jịra pyii lẹ. Ḿ ka hu ajẹ nya ambakpa nyanụ bala ang iriri ịkịla ha aluji nyanụ kaka. Alepwoja ịkịla ịwẹ á tị ka nwa ere nyanụ gụ ọwẹ kaka.

⁹Ma anụ angịlẹ kanụ wẹẹ wu ẹrụ kpa ajẹ nya ang oriri ka guru ukuna ka ye ịkaa ri. Anụ ka gwogbo ha Amkpaa. Anụ ka nwa ere nyaa ọ-ọnụụkpa nya ube ọtụka ọraabwọ nyam.

¹⁰Anụ angịnyị nya ala iJerusalẹm ee! Anụ kpehe bwu ẹpwụ nya epweji kanụ da ụgbẹyị gbe aananụ ịlẹ kị wẹẹ jẹ nyà wẹ ẹpwa mẹ. Anụ nwụla ụgbẹyị oluhye kanụ nwụla ajwọ hi ụgbẹyị, kanụ ya ang i-ju ẹjẹẹ wu eji chajị ká alepwoja ịkịla ka jẹẹ,

¹¹Yẹkẹẹ Amkpaa a wẹẹ ya ẹlẹwẹ dodehe ha angịnyị ehe wuu wo lẹ. Anụ ya je angịnyị nya ala iJerusalẹm wuu kị jẹ yẹkẹẹ, Amkpaa juwa warị ka chịnụ da. Ọ ka kpa angịlẹ wuu kọ gba kpehe dịrẹ ịlọmwụ warị.

¹²Angịnyị ka wụrụụnụ yẹkẹẹ, angịnyị ịgọgọ nya Ohe Oluhye, angịnyị ịlẹ ká Amkpaa chịda. Ị ka wụrụ iJerusalẹm epweji ọtụka ọlẹ kọ há Ohe Oluhye lụmẹ. Epweji ọlẹ ká Ohe Oluhye-é tụụbwọ hi ka.