Read idege AYỊSAYA 63 Bible Online

AYỊSAYA 63 - idege bible

AYỊSAYA 63

¹Ọọwo à tị́-ị̀ wẹẹ warị bwu Ẹdọm? Ọlẹ kọ bwu epweji nya ịBọsịra la awụrụ ogbileji ọlẹ kọ la ọmịla nyẹrị-nyẹrị la ụ́hị ọtụka ọlẹ. Am ọngọlẹ kam ri Amkpaa ọlẹ kọ la ọngịrị nyọka chịda myị à wẹẹ warị kam ka ya ọkụrụ-kụrụ dodehe lẹ.

²Anyị a tị́ du ká ịwụrụ nyang la ịmịla ịịwẹ-ẹ̀ lala ịnya angị kaa chị alakọnụ ere-è?

³Ọọwa, Amkpaa a wẹ lẹlẹ. M̀ chị alepweji ịkịla ata jaabwọ ká angị chị ere kaa kpa ata dà alakọnụ yụụyụ̀ụyụụ. Ọngọngọhẹ-ẹ́ tị juwa tam ka. M̀ chaa ata lagbama nyam. Ikẹjẹ-awụrụ nyam m̄ kpa baa apatẹ lẹ. Ọọwa lẹ, ịwọ nyaa à da pwụrwa-pwụrwa chịm ị-ịwụrụ wuu laa chịrị lẹẹ lẹlẹ.

⁴Chajị ụka nya ọ-họ kwiwa ha angịnyị nyam ju chwẹẹ, ụka kam ka chị angịnyị nyam da bwu ụbwọ nya aluji nyaa, ka yẹ aluji nyaa akama.

⁵Ejiri wum ụka kam chẹhị dagaga ju wuu kam yẹ ọngọngọhẹ kọ juwa ka dam ụbwọ kaka, ọngọ ka dam ụbwọ á ji kaka. M̀ yẹhị kụ kee, ọngọngọhẹ-ẹ́ juwa ka wum kpa kaka. Ọọwa lẹ agbama nyam à họ kam lọngịrị gụ ọọwa lẹlẹ. Ọọwa lẹ, ugburụbwọ nyam ayịdang à kpa ọkụrụ-kụrụ wam lẹlẹ.

⁶Ẹ-ẹpwụ nya agbama nyam m̀ chị alẹpwụma ịkịla ịbẹnẹ, daa abwọ yịgẹ-yịgẹ. M̀ chaa ịwọ hụrụ.

⁷M ya ọhaha ọnahị nya Amkpaa ọlẹ kọ kaa gbu enyi ka dodehe, chajị nya ang ịnyịịla ịkpịnya ịlẹ kọ họ chịla ọ-ka gwogbo họọ, chajị nya ang ịlẹ wuu ká Amkpaa họ hahị bala ọnahị ọtụka ọlẹ kọ họ ala Isirẹlụ chajị nya ahyẹẹrwẹrwa bala ọháha nyamwụ ọlẹ kọọ juwa pyịyọọ.

⁸Chajị Amkpaa yẹkẹẹ, Angịnyị nyam a wẹ lẹ. Ị ka dam lụgbaa ka. Ọọwa lẹ, ọ chaa da lẹlẹ.

⁹Bwu ẹpwụ nya akama nyaa ịlẹ wuu kị la, olegu-ẹrụ ọhẹ-lọhẹ á chaa da koo ma Amkpaa Ọngọchịda lịlọmwụ a chaa da lẹ. Ẹ-ẹpwụ nya ọháha bala ahyẹẹrwẹrwa nyamwụ ọ kpa gbaa kpehe lụka ọ-kẹkpẹ lẹ.

¹⁰Ma, kpọkpọọkpọ ị tị la egbeju-ọngịrị tọọ pyịpyị họ la olujwo mwẹẹkpẹ tọ Olegu Ịgọgọ nyamwụ. Ọọwa lẹ, Amkpaa a mwọọgịlẹ yẹ ka ri oluji nyaa lẹ, ọ dẹwụ taa lẹlẹ.

¹¹Ụka ọọwa, ị kpịtịya nya ẹnụtụrụ nya iMosisi ọnchẹ nya Amkpaa ọngọlẹ kọ chị alegbejụ nyaa da bwu ẹpwụ nya Ihu ịtụka lẹka? Ale Amkpaa ọlẹ kọ hu olegu ịgọgọ nyamwụ ju ka ẹpwụ nya iMosisi anyị a tị́ ji mẹ?

¹²Ale ugburụbwọ ọtụka nya Amkpaa ọngọlẹ kọọ bwula ọngịrị nyamwụ kpa họ ang ịtụka ịlẹ bwula iMosisi ọlẹ kọ chị enyi ọlẹpwụ nya Ihu ọtụka ebwo ị-ịlahị nyaa ọlẹ kọ kpa iru nya angịnyị nyamwụ kpoye bwu ẹpwụ nya ụjẹ-ẹmwụ nya enyi okpori-kpori ọlẹ kọ họ ká ẹnyị nyamwụ ka ru ohi gbe oyi myị oyi.

¹³Oowo à tị́ kpaa kpoye nya ụjẹ-ẹmwụ nya enyi okpori-kpori? Amkpaa kpaa lala anyịrẹ ịnyịịngịrị u-ugbileji ị tị chị keji kpong-kpong ka.

¹⁴Lala iyo ịlẹpwa ịlẹ kaa kpa ka ikpokpo ọlẹga ka ọpyị ju eyo, ịnyị olegu ịgọgọ nya Amkpaa a ya ọmwịịnyọ ha angịnyị nyamwụ lẹ. A kpa angịnyị nyang ụgbẹyị lẹ. Ọọwa, a kpa ogbo wẹ ẹnyị nyang lẹlẹ.

¹⁵Amkpaa ee, hiri ẹhị nyang kpẹẹ bwu epwoohe weji ka yẹhị. Hiri ẹhị nyang kpẹẹ ka yẹhị bwu epwoohe ẹga ọlịgọgọ bala ọlụmụmẹ nyang. Ale ọháha bala ọngịrị nyang à tị́ ji. Ale ahyẹẹrwẹrwa bala ọháha nyang à tị ji? Ā kpaa rụ hiihi ka.

¹⁶Chajị ahụ a ri adahị lẹ. Ọ ri nya ịlẹhị adahị igogo anyị Ebiraham bala iJekọbụ a jẹẹhị ka, Amkpaa ee, Ahụ a ri adahị kpọkpọọkpọ lẹ. Ọngọ gbahị kpehe ụka wuu ẹnyị nyang a ri bwu orogo-orogo lẹ.

¹⁷Ahyu Amkpaa ee! Anyị a tị́ du ka myị kahị hwahị ụgbẹyị nyang ọlẹ kahị wẹẹ la ọkịlẹtụ ọngịrị ọlẹ kọ du kahị mwẹẹkpẹ juhi nyang kaka mẹ? Chuchuu tịrẹkpẹ warị chajị nya anchẹ nyang ịlẹ kị kaa myị ẹrụ hang, chajị nya iru nya angịnyị nyang ịlẹ kị ri angịnyị ugu nyang ụka wuu.

¹⁸Ahị angịnyị ịgọgọ nyang ịnọ ye iJerusalẹm lụka okpii. Ma lẹẹlẹẹ tị wẹẹ, aluji tụrwọọ ju eji bala ẹpwang ịgọgọ lẹ.

¹⁹Ahyu, a họhị ẹla pyii lala ahụ nyaa ri olegbeju nyahị ẹnẹnẹhẹ lẹka, ahị mwẹẹkpẹ lala alepwoja ịkịla ịlẹ kị kaa be ẹkọ wụrụ ẹnyị nyang kpong-kpong ka.