Read idege AYỊSAYA 64 Bible Online

AYỊSAYA 64 - idege bible

AYỊSAYA 64

¹Ịnọ ang ká ka wụrụ egbamwụ da dodo ka ka hireji weji ká ịgbọdọ ka chẹhị yẹng lẹ, ị ka juhi juwa hụ́ kpákpaakpa ị-ịlahị nyang.

²Jaabwọ ká ila kaa rụ eke nya ịwụ bala jaabwọ ka ila ọchịpwuu lụmẹ kaa họ ká enyi wụ gbụrụ-gbụrụ wẹẹ, kẹwẹ ka chị ọngịrị nyang ehe ha aluji nyang, ká họ ká alepwoja ịkịla a juhi hụ́ kpákpaakpa i-ijata nyang mẹ!

³Ụka ọhẹ juwa ká warị ka họ ang iluhi-uhi ịlẹ kahị kpahị ju ka. Ịgbọdọ ịtụka chẹhị ka yẹng lẹ, ị hụ́ jigi-jigi la uhi ojuju.

⁴Dọmwụ bwu orogo-orogo nyọlẹ ká odehe ọlẹ dọmwụ, ọngọngọhẹ-ẹ wo lee ugbẹhị nya ọngọngọhẹ yẹ Ohe ọkịla dala ahụ ọlẹ kọ họ ụkụrwọ ha angịlẹ kị dahị hiloo ka.

⁵A kaa juwatọ angịlẹ kị kaa họ ang ọnyịịla la ọkẹkẹnị, angịlẹ kị kaa kpịtịya jaabwọ ká tịtọ kị ka jẹdịyẹ ụ-ụgbẹyị nya ọhịhị. Ma a tị wụ ẹjẹ ahị tị juwa kịlahị la ọhọbịrị ọhọhọ kpọkpọọkpọ. Ọlẹ kpá ká dọmwụ wụ ẹjẹ ọtụka-ọtụka wụ tahị lẹ, ahị juwa myịmyị kịlahị la ang ọtịpyọ ọhọhọ kịlahị-ịlahị bwu oyoyi nya alene.

⁶Ahị chịrị la ịhọbịrị bala ang ịnyịịla ịlẹ kpá kahị họ myị ịlọhị lẹhị wẹẹ chịrị lala achịpwụ chajị nyọlẹ kahị myị la ịhọbịrị lụmẹ lẹ, ahị lala apwụ́ nya ekeji ịlẹ kịị pwọ ido ụka kị gbu womboo ịlẹ ka igbachịwụ kaa gyaa ga tụ ẹga myị ẹga da.

⁷Ọngọngọhẹ-ẹ́ juwa kọ be ẹkọ wụrụ ẹnyị nyang ẹ-ẹpwụ nya abwọ ọrịrị ka lee ọ-dọmwụ maga nyọka yụbwọ chịng giri-giri ka, chajị a yẹhị nyang kpịbaa hiihi lẹ. A gbahị kpehe ju aluji nyahị ụ-ụbwọ ọọ-lajị nya ang inyibyi nyahị lẹlẹ.

⁸Ee Amkpaa, ahyu! Ahụ a tị ri adahị lẹ. Ume ahị a tị ri. Ahụ a ri ọngọ me ọta lẹ. Ụkụrwọ nya ụbwọ nyang ahị a ri lẹ.

⁹Ā wụ ẹjẹ tahị kpoye lụmẹ ka. Chuchuu Amkpaa, a tị́ kpịtịya nya ịhọbịrị nyahị pyịyọọ ka. Angịnyị nyang ahị wuu a ri lẹ. Lẹ, yẹhị ahyẹẹrwẹrwa nyahị mẹ.

¹⁰Epweji ịtụka ịlịgọgọ nyang yẹ ka ri ugbileji lẹ. IJerusalẹm ta ayịreji, ị nyẹẹkpẹ dọọ lẹ.

¹¹Ube Ịgọgọ ọtụka ọnyịịla ọ-há ụhị, ẹga ọlẹ ká adahị igogo anyị kaa gwogbo hang, ị tọọ ayịreji la ila lẹ. Ẹga ịnyịịla ịlẹ wuu kị kpụhị ịpyọ lụmẹ yẹ ka ri ayịreji.

¹²Ahyu, Amkpaa ee! ọ ri ọ́ gung ọ-ọkịlẹtụ lee hụng kpiki chajị nya ang ịlẹ wuu kị la ịịwẹ wẹẹ kaka? Ịịwẹ a ka họ kahị ka yẹ akama kpoye nyọlẹ kahị ka kpa myị kaka lẹka?