Read idege AYỊSAYA 65 Bible Online

AYỊSAYA 65 - idege bible

AYỊSAYA 65

¹Amkpaa yẹkẹẹ, “Angị myị raabwọ rị bịlẹm ịngịngịhyẹ ka, m̀ kụ hwohwoohwo nyọka wẹ abwọ ọrịrị nyaa. Alẹpwụma ịlẹ kị dọmwụ tịtọ nyam tọ ka, m̀ godayị jam byaa ya ‘m̀ lẹẹ lẹ.’

²Lụtụrụ-ụtụrụ gbee da ka alobyi, m̀ lẹẹ ke abwọ gbe angị la egbeju-ọngịrị, kị juwa dịrẹ ụgbẹyị onyobyi nya ịlaa, juwa họ irya-irya nya ịlaa kem.

³Ịị du agbama jum ụka wuu lang onyobyi ọ-họ chahị jum. Ịị kpụ eteji ha ekpeku tụ ẹrụ-ẹrụ da, juwa ju ịtangare ila a-ada nya ijiga.

⁴Lepwodu jijiiji, ịị kele ka ẹpwụ nya ágbụ bala iworu kaka ya ẹla ta alegu. Ịị ri iyo nya ikomba, hu enyi-ọma nya iyo nya ojiga nwa bwọọọ.

⁵Ịị byi angịkịla yẹkẹẹ, ‘Anụ rụ hwẹẹ hiihi, chajị ahị la ịgọgọ lụmẹ, ānụ yụbwọ guhi koo!’ Angịwẹ lala ịmwụ-ila ọlẹ kọ juwa jụm a-ahị, ị ri ịla ọlẹ kọ-ọ̀ myị̀ myị kaka.”

⁶“M̀ da ẹla nyaa ju yẹta bọọ beji lẹ, ḿ ka hwaa ujiji kpong-kpong ka, m̀ ka nwaa uri chọnụ-chọnụ nya ang onyobyi ọlẹ kị họ.

⁷Uri ọọwa ri ajị nya ịhọbịrị nyaa tụ ịnya adaa igogo anyị. Ịwa anyị ju ịtangare ila ị-ịgbọdọ, ị chị oyoyi ju ị-ịgbọdọ ịịwa ịnyịnyị. Lẹẹlẹ, m̀ ka yaa akama jaabwọ kọ pwoku.”

⁸Amkpaa yẹkẹẹ, Jaabwọ ka angịnyị kaa kpahị ju iku nya alakọnụ ọnyịịla kẹmkẹm, chajị nyori ịhyẹ nyaa ka há ere wẹẹ, ịnyịnyị m̄ ka kpahị ju angịnyị nyam lẹ. Ḿ ka ta angịnyị nyam ayịreji wuu ka.

⁹M̀ ka kpa anyị ịtụma nya iJekọbụ ịlẹ kị bwu imwawụ nya iJuda, ịlẹ kịịwa ka yẹ ọpyị ịla ịgbọdọ nyam la. Angịlẹ kam chụ ịwa a ka hi ugu ri lẹ, anchẹ nyam a tị kụ ẹpwa ụ-ụwa lẹ.

¹⁰Ụteeji nya ịCharọn ka yẹ ri ẹga ọ-kpa ịkpịlọ ri amẹ. Ikpokpo nya Akọ ka ri ẹga ọmwịịnyọ nya iyo ịlẹpwa, chajị nya angịnyị nyam ịlẹ kị tịtọ nyam.

¹¹Ma anụ angịlẹ kanụ tụụbwọ hi Amkpaa, angịlẹ kanụ deeri hi ịSayọn ịgọgọ nyam nyẹẹkpẹ dọọ, kanụ juwa raabwọ ha ịGadị ohe nya ụrụrụ ọháha bala meni ohe nya ẹpwa ohyẹẹkpẹ-ẹkpẹ nya angịnyị juwa yi ere ju awụlẹ kpa kịlaa wẹẹ.

¹²M ka chajị nya ọọwa họ ká ẹma nya ẹwụ á ka ri ogu nya igu ọnyẹẹgẹga ogbugbu nyanụ lẹ, anụ hirikpẹẹ ha angịlẹ kị ka chịnụ imyi, chajị ụka kam ya ẹla, anụ myị ke ụrụ ka, ma ọkọkọ nya ọọwa anụ juwa họ angịnyịbyi ị-ịlahị nyam, ọọwa lẹ, anụ chụ ọ-ka họ ang ịlẹ kị wụm ẹjẹ lẹlẹ.

¹³Chajị nya ọọwa a du lẹ ka Ọngọlahị Ohe Oluhye yẹkẹẹ, anchẹ nyam ịlẹ kị kaa raabwọ bala o-jum ihi ka ye ang ri lụmẹ-lụmẹ bala o-ye nwa, ma imyi tị ka nwụnụ. Anchẹ nyam ka ye ang ri wu ẹpwụ, anchẹ nyam ka ye nwa, ma imyi-enyi tị ka nwụnụ.

¹⁴Anchẹ nyam ka juwa mwu eje la ọkẹkẹnị nya ọkịlẹtụ ọ-kpụ ịpyọ, ma anụ ka chị eko bwu ẹpwụ nya ọkịlẹtụ ọjụjụ, anụ ka bida la ang ọjụjụ ọlẹpwụ nya olegu.

¹⁵Angịnyị ịlẹ kam chụ ka kpa ẹnyị nyanụ họ lala ọlọ ọ-ga ju. Am kpangga am Ohe Oluhye Agụgụ ka goonu nwụ, anụ ka gbu kẹhị.

¹⁶Ọngọngọhẹ kọ jam ọ-ọpyị ọlẹ, kọ diro ahị ọwawa ẹpwa, ka ye ahị ọwawa bwu ẹga nya Ohe Oluhye ọngọ chịla o-hu ọkịlẹtụ ha. Ọngọngọhẹ ọlẹ kọ tịtọ nyọka myị ọnụ am ọ-ọpyị ọlẹ aalẹ, ka nwa iro la ẹnyị nya Ohe Oluhye ọngọchịla o-hu ọkịlẹtụ ha. Chajị akama inyogo wuu ka ri ang ịchịpwrụ ịlẹ ká deeri hi ka ẹkpẹ, ịlẹ kị kpịbaa him.

¹⁷Amkpaa yẹkẹẹ, “M juwa ka họ epwoohe onyeewe bala odehe onyeewe. Ị́ ka kpịtịya nya ang onyogo lee ọ-ka me irya chajị nyaa myịmyị kaka.

¹⁸Ma, anụ chị ọkẹkẹnị kanụ ya ụya gbe oyi myị oyi chajị nya ang inyeewe ịlẹ kam wẹẹ ka họ mẹ. Chajị iJerusalẹm onyeewe ọlẹ kam wẹẹ ka họ wẹẹ ka myị̀ la ọkẹkẹnị, angịnyị nyamwụ ka chị ọkẹkẹnị.

¹⁹Am lịlọm ka myị̀ la ọkẹkẹnị, chajị nya iJerusalẹm bala angịnyị. Ị́ ka wo omyi nya ida ojeje ụ-ụwa lee eko ọchịchị kpá ẹnẹnẹhẹ kaka.

²⁰Anjwo ichiche ịlụbwọ-ọ́ ka gbu lenjwo kaka lee ọngọgbahị ọhẹ-lọhẹ ọ-ka juwa kọ ri ehe tata kaka lẹka. Angịlẹ kị dọmwụ gu ẹka ohu (100) gu wẹẹ, ị ka me irya jwaa lala anjwo ikolobya bala ịyẹẹnọ. Ó-ri ka angịnyị á gbu ẹ-ẹkpẹ nya ẹka ohu (100) ogugu lẹ, ọ mẹjẹ nyori m̀ ye angịịwa akama chaj nya ịhọbịrị nyaa lẹ.

²¹Ị ka me obyi, ị tị ka nune ẹ-ẹpwa nyaa. Ị ka wu ẹrụ nya alakọnụ, ị ka hya egbe nyaa nẹ.

²²Ị́ ka me ẹpwang angịkịla ka kwaa ẹpwa ka. Ị́ ka wu ẹrụ, angịkịla ka hya egbe ịlụwa ri ka. Jaabwọ kị hịhị tata, ịnyịnyị angịnyị nyam a ka ri ehe tata lẹ. Angịnyị ịlẹ kam chụ ka ya ụya ẹ-ẹpwụ nya ụkụrwọ nya ụbwọ nyaa.

²³Ụkụrwọ ọlẹ kị nwụ ịlaa họ-ọ́ ka ri ang ododu ka. Anyị nyaa-á ka tọ ang ọmwaaa lee ayịreji ọtata ka. M ka wahị haa kpá tụ anyị ịtụma nyaa pwụ ụka myị ụka.

²⁴Ene ká abwọ ọrịrị-ị́ ka cheju ọ-ọnụ nyaa m̀ ka waa lẹ. Ụka kị juwa kpa ẹla kpa ya wẹẹ, m̀ ka wo lẹ.

²⁵Ikirom bala imilodo ka juwa ri ang ẹ-ẹga ookpokpo lawụlẹ, egabẹ ka ri ego nya ang ịlọtẹwụụ lala iyo ịlẹpwa. Ma, ilo tị lẹ, ọrụ opyi à ka ri ang oriri nyaa lẹ, ị́ ka la uhi-uhi gụ ọọwa kaka. Ụ-uhye nya ịSayọn ọgbọdọ ịgọgọ nyaa ịngịngịhyẹ ọlẹ kọ ka họ ọngịnyị ang lee ọ-ta ang ayịreji á ka ji kaka.”