Read idege AYỊSAYA 66 Bible Online

AYỊSAYA 66 - idege bible

AYỊSAYA 66

¹Amkpaa yẹkẹẹ, “Epwoohe ri ẹchị-adịrahụ nyam, odehe à ri ẹga ọ-ya ẹta rịrị nyam lẹ. Ụma nya ẹpwa ọlanyị kpá anụ tị́ ka nwụ ham-m̀ wẹẹ? Ụma nya ẹpwang ọlanyị kpá m̄ tị́ jẹ-ẹ̀ mwụ ịnyọ-ọ̀?

²Am lịlọm à tị́ họ epwoohe bala odehe, du ká ang ịwẹ wuu ji. Am Amkpaa-à wẹẹ kpa ọnụ ya ẹlẹwẹ lẹ. “Angịnyị ilikẹjẹ nyam ri angịlẹ kị kpa ịlaa keji juwa la olujwo ọtọtọ, bala o-ju ihi nya omyi nyam.

³Angịhyẹ tị juwa hu ẹna kịla iya, angịkịla wu ọngịnyị nwụ timajẹ, angịhyẹ ya ọnyị-ọkpịlọ kịla iya, angịkịla wu ebwu nwụ, angịhyẹ ya ang-ẹrụ kịla iya, angịwụlẹ ya ịwọ nya okomba kịla iya, angịhyẹ ju ịtangare ila, juwa kpụ eteji ha ekpeku. Ọngọngọọng pẹ ụgbẹyị nya ịlọmwụ, irya omene nyaa wuu ri ọ-ka họ angi-ibyi kem.

⁴Lẹẹlẹ, m̀ ka haa elego ị ka yẹ, akama ịlẹ kịị hi jájaaja hi wuu kpangga m̄ ka kpa warị chaa ọgụ lẹ. Ang odudu ri yẹkẹẹ, ụka kam be ẹkọ wụrwaa ị́ myị ke ụrụ lam ka, ị mwọọgịlẹ juwa họ ang ịtịpyọ juwa che ba ang ịlẹ kị wam ẹjẹ.”

⁵Anụ ka ju uhi nya omyi-ẹla nya Amkpaa ee, anụ wo ẹla ọlẹ kọ wẹẹ ya tanụ mẹ: “Ajị nyọlẹ kanụ jum ihi, du ká aananụ baanụ ẹtẹ, juwa beenu deeji ọọ-lajị nyam. Ị kpanụ họ juwa byinu yẹkẹẹ, ‘Amkpaa-ā chị ụmụmẹ nyamwụ ehe, kọ chịnụ da kanụ hyo rụ kahị yẹ mẹ-ẹ̀!’ Ịwa-ịwa oyi à tị ka ju lẹ.

⁶Anụ wo iru ọlẹ kọ lalẹẹ tá e-epweji wẹẹ! Anụ wo ọmọnyọ o-bwu Ube nya Amkpaa wẹẹ! Am Amkpaa-à wẹẹ yẹ aluji nyam akama lịkata ọkpụkpụ ọtụka ọwẹ lẹ!

⁷“A wo jẹ ká ọnyang ma ọnyị la ọ-hya ụma ene ka-á? Ká ọnyang ya ọnyị ma kpá ene ká ang nya ọnyị ka yoo iwe-é?

⁸Ọngọhẹ wo ụma nya ẹla ọlịịlẹ ẹnẹhẹ lẹ-ẹ́? Oowo tị́ yẹ ẹla ọlịnyị jẹ? Epweji kaa nwa kaka ri ẹpwụma ẹnụ alẹ-alẹ-ẹ̄ẹ́? Lee alọpyị ọhẹ tị́ hu kpuu kaka lịlaa ẹ-ẹpwụ nya ẹhị ọ-mwụ biri ịịwẹ? Anụ tị yẹ wẹẹ, ịSayọn ka hya ụma nya ọnyị hya kpá kpuu lẹ, ọ gu anyị nyamwụ bwọọọ lẹlẹ!

⁹Anụ me kam kpa ọngịnyị pwụ okube, m̄ ka mọọ ọnyị lokpunyi ka-á? Am ọngọ ya anyị ha ọngịnyị ka kụ ụwa tọọ ori-ụma ku-ú?” Amkpaa-à wẹẹ ya ẹla lẹ.

¹⁰“Anụ angịlẹ wuu ká iJerusalẹm haanụ, anụ chị ọkẹkẹnị ta iJerusalẹm kanụ yụya balọọ. Anụ angị bida chajị nyamwụ lẹ-gbalẹ-gbalẹ, anụ chị ọkẹkẹnị lụmẹ-lụmẹ tọọ ugbẹnyị mẹ.

¹¹Anụ ka yụya ju ọpyẹpyọọọ nyamwụ lẹ, anụ ka ye ri ụ-ụwa, jaabwọ ká ọnyị ka ye enyi-ẹmẹ nya ịnamwụ nyẹ wu ẹpwụ lẹ.”

¹²Amkpaa yẹkẹẹ, “M̀ ka họ iJerusalẹm ka pyẹ pyọọọ kịlahị-ịlahị, m̀ ka tụ ụdụ nya alẹpwụma ịkịla wuu kaka rịrọọ, anụ ka ye ri lala ịnịna-à ya ẹmẹ ha ọnyị nyẹ, hwoo kpaa a-ata bala o-hwoo kụrụ omyi.

¹³Jaabwọ ká ịnịna kaa kpụ ọnyị nyamwụ ẹjẹ, ịnyịnyị m̄ ka kpụụnụ ẹjẹ i-iJerusalẹm lẹ.

¹⁴Ụka kanụ yẹ ká ang ịwẹ-ẹ́ juwa lịnyị, anụ ka chị ọkẹkẹnị, anụ ka la ọkpịra-kpịra. Anụ ká jẹ ụka ọọwa nyori m̀ kaa da angịnyị nyam ụbwọ, m̀ tị kaa ju agbama ta aluji nyam.”

¹⁵Anụ tị́ jẹ lẹ, Amkpaa juwa ka wẹ lila, ọ ka kụ ang ọrụnyẹ warị lọngịrị-ọngịrị lala ugbọchịrị ẹ-ẹpwụ nya agbama ọtụka nyamwụ. Ọ ka kpa ila yẹ aluji nyamwụ akama.

¹⁶Amkpaa ka kpa oge bala ila yẹ angị ịtịpyọ wuu akama, angịlẹ kọ ka nwụ wuu ka ju iru.

¹⁷Amkpaa yẹkẹẹ, Ụka wẹẹ wẹ kanụ ka ta ayịreji wuu lawụlẹ-awụlẹ, anụ angịlẹ wuu kanụ-ụ̀ hụ́ ịlọnụ charị-charị ya ogu dawụlẹ hyọọọ kele kaka kpụ eteji ha ijiga, juwa ri iyo nya ikomba bala ijiga-ibiri bala iyo i-ju ibyi ịkịla wuu.

¹⁸M̀ yẹ ang myị ang ịlẹ kị kaa họ tụ irya ịlẹ kị kaa me. Lẹẹlẹ, m̀ tụbwọọ ka wẹẹ kaka tụ alẹpwụma bala aloja wuu guru, kam ka mẹ ọngịrị ọlala nyam jaa,

¹⁹kị ka jẹ am nyaa wẹẹ yaa akama lẹ. Angịnyhẹ nyaa ịlẹ kị ka hi lọhịhị lẹ, m̀ ka gyaa du ka ẹpwụma ịkịla. M ka gyaa du hwẹẹ ka ẹpwụ nya ụma ịlẹ kị wo ohi oruru lee ụmụmẹ nyam ẹnẹhẹ lẹka. Ẹpwụma ịlẹ kam ka kwaa ka ri iSipeen bala iLibya bala iLidiya ọpyị nya angị da ịcha ịtụka ịịwa bala iTubaalụ bala iGirisi. Ị ka juwa ya ụmụmẹ nyam pyẹ ẹ-ẹpwụma ịwẹ wuu.

²⁰Ụka ọọwa, ị ka kpa ala Isirẹlụ aananụ ịkịla nyà bwu ẹpwụma ịkịla wam lala ang ọ-ga ham. Ị ka kpaa nyà warị wẹ ọgbọdọ ịgọgọ nyam ọla iJerusalẹm. Ị ka kpaa nyà u-uhye nya ibyiyó bala anyịrẹ ịkamẹlụ bala ang ịrụnyẹ bala angị ị-kpa kpa olo warị jaabwọ ká ala Isirẹlụ kaa kpa ajẹ nya ang-ẹrụ ẹ-ẹpwụ nya ịja ịcharị-charị kaka ha ọhaha u-Ube nya Amkpaa.

²¹M̀ ka chụ angịhyẹ nyaa kị ka ri angịkiliya bala ala iLivayị ị-myị ẹrụ ha Amkpaa.

²²“Jaabwọ ká epwoohe onyeewe bala odehe onyeewe ọlẹ kam juwa ka họ ka godayị giri-giri lọngịrị nyam, ịnyịnyị-ịnyịnyị anyị ịtụma nyanụ bala ẹnyị nyanụ à ka gbu-enyi kaka lẹlẹ.

²³Ẹ-ẹpwụ nya Ọya Onyeewe bala Ẹnụtụrụ Ọhịnyọ Lụkụrwọ ọnyị myị ọnyị wuu angịnyị wuu ka warị ka gbịgba ham i-iJerusalẹm.

²⁴Ụka kị ka yegiri nya ọrụrụ, ị ka yẹ iru nya egu nya angịlẹ kị la egbeju-ọngịrị tam. Ekpunjuju ịlẹ kị ryaa-á ka jẹ-ẹ̀ gbu kpá ẹnẹnẹhẹ kaka. Ila ọlẹ kọ tị juwa rwaa-á tị ka jẹ-ẹ̀ myị̀ kpá ẹnẹnẹhẹ kaka ịnyịnyị. Egu nyaa ịwẹ ka byị angịnyị ehe wuu ahị lọyẹyẹ.”