Read idege AYỊSAYA 7 Bible Online

AYỊSAYA 7 - idege bible

AYỊSAYA 7

¹Ụka ká adịrahụ Ehasị ọnyị nya iJotam ọnyị ọtụma nya Usiya Adịrahụ nya ala iJuda juwa ri adịrahụ wẹẹ, iResin Adịrahụ nya ala iSiriya bala iPeka ọnyị nya ịRẹmaliya Adịrahụ nya ala Isirẹlụ be iJerusalẹm ẹpwa lẹlẹ. Ị́ tị lọngịrị kụrwọọ myị ka.

²Ụka ká oja ọwẹ pwụ ụrụ nya alẹpwa nya adịrahụ nya iJuda nyori ala iSiriya bala ala Isirẹlụ nyị yẹkpẹ chị awụlẹ yahị da iJuda, ọhụ-ụ́ ba adịrahụ bala angịnyị nyamwụ e-eji kaka. Ị ju uhi juwa hụ́ lala ụrụrụ.

³Ụka ọọwa, Amkpaa byi Ayịsaya yẹkẹẹ, “Ahụ bala iChiyajachubu ọnyị ọlẹng nyang kanụ kaka tọ Ehasị Adịrahụ mẹ. Anụ ka yọọ ụ-ụgbẹyị ọlẹga ka angị họ ịpwụ kaa họ ụkụrwọ ọ-ọbaba nya ụgbụ ọlẹ ká enyi kaa tụda bwu ẹmwụ-enyi oluhye.

⁴Anụ byoo kọ kpahị ju, juwa kụ kee mẹ, ọ ju ugbodu. Ọ ju uhi lee o-gu ugbodu ene koo. Agbama nya iResin Adịrahụ bala ịnya ala iSiriya angịnyị nyamwụ bala ịnya iPeka Adịrahụ lala ekpijịwụ ịlẹ ká ila juwa myị̀ hi.

⁵Ala iSiriya tụ ala Isirẹlụ bala adịrahụ nyaa me obyi jung. Ị juwa yẹkẹẹ,

⁶‘Anụ kẹwẹ kahị be iJuda ẹpwa, chị uhi ju alụwa, kahị gyaa gịla ịlọhị, kahị hu ọnyị nya ịTabiili ri adịrahụ nyaa mẹ.’

⁷“Ọngọlahị Amkpaa tị yẹkẹẹ, ‘Ị́ ka họọ myị ka.’ Ọ́ ka lịnyị ka!

⁸Ang odudu ri Ẹpwụma nya iSiriya-á lọngịrị gụ ịDamasịkọsị kọ ri egbeju-ẹpwa nyaa ka, ịDamasịkọsị-ị́ tị lọngịrị gụ iResin Adịrahụ nya alụwa ka. Ẹ-ẹpwụ-ẹpwụ nya ẹka iwo ịrwọnyẹ kụrụ ịrụ (65), aluji ka kụrụ Isirẹlụ bịrọọ chịkẹ-chịkẹ, ọ́ ka hi godayị ri ẹpwụma nya ịlaa myị kaka.

⁹Ẹpwụma nya Isirẹlụ-á lọngịrị gụ ịSameriya kọ ri egbeju-ẹpwa nyamwụ ka. ỊSameriya-á tị lọngịrị gụ iPeka Adịrahụ nya alụwa ka. Ó-ri ká Adịrahụ bala angịnyị nyamwụ-ụ́ godayị kpọọ lọmyịmyị ka aalẹ, ị́ ka godayị rịrị pwụ ọbaba myị ka.”

¹⁰Amkpaa du ẹrụ ọkịla tọ Ehasị yẹkẹẹ,

¹¹“Bịlẹm am Amkpaa Ohe Oluhye nyang kam ya ang-ẹjẹẹ hang ká ka jẹ nyori m̀ ka ta aluji nyang ayịreji ịnyịlẹhị mẹ. Ang-ẹjẹẹ ọlẹ ká ka tịtọ ka ri ang o-bwu ejegu myị lee ang o-bwu uhye-ọgba pyiipyii myị.”

¹²Ehasị tị wẹ yẹkẹẹ, “Eheehe. Ḿ ka tịtọ nya ang-ẹjẹẹ ọhẹ ka. Ḿ ka ma Amkpaa yẹ koo.”

¹³Ọọwa, Ayịsaya-à yẹkẹẹ, “Anụ anyị ịtụma nya iDevidi, anụ ke ụrụ kanụ wo mẹ. Ánụ jẹ kọ ri ang ọtịpyọ nyọka ma ugbodu ojuju nya angịnyị ehe yẹ ka-á? Ọọwa anụ wẹẹ ma ugbodu ojuju nya Ohe Oluhye yẹ kpịlọ lẹ-ẹ́?

¹⁴Ọ hiigu, Ọngọlahị lịlọmwụ ka ya ang-ẹjẹẹ hanụ. Ang-ẹjẹẹ ọọwa ri ọyẹẹnọ ọhẹ kọ juwa lẹnyị juwa ka ma ọnyị ọlẹng ọlẹ kọ ka wụrụ ẹnyị nyamwụ Ịmanụwẹlụ.

¹⁵Ene ká ọnyị ọọwa ka nwà kpụ kọ ka jẹ ang ọtịpyọ hi ang ọnyịịla kpá, ọ ka juwa nwà enyi-ẹmẹ nya ẹna bala ọ-nẹ inwa lẹ.

¹⁶Ene nya ụka ọwẹ lẹ, ịpyị nya ịdịrịhụ imiiye ịlẹ kị wẹẹ chị uhi jung ka kpụ egwawụ-egwawụ wuu lẹ.

¹⁷“Amkpaa juwa ka kpa akama ọtụka wẹ uhye nyang bala angịnyị nyang bala ẹpwụma tụ ugbiyegu nyang. Ụka nya akama ọọwa ka tịpyọ gụ ụka ọkịla ọhẹ-lọhẹ mwiiji nyọlẹ ka ọpyị-adịrahụ nya Isirẹlụ chị ebwo hi ala iJuda. Amkpaa ka kpa adịrahụ nya ala Asiriya warị.

¹⁸“Ụka ká ẹnụ ọọwa-á pwụ, Amkpaa ka chị ajị byịịị ká ala Ijipiti ka pá tuu warị lala ịjị bwu apa ọnyị myị ọnyị nya Ihu ịNayịlị, ká ala Asiriya tịtị ka mwụ tọọọ warị lala inwa.

¹⁹Ị ka wẹ bwọọọ kaka pyẹ yịrị ẹga myị ẹga nya ọpyị. Ị ka chịkụ ọ-ọkpọọ bala uku nya ajwọ bala ẹga ká ejwo ji tụ ẹga ị-kpa iyo ileji ri wuu.

²⁰“Ụka ká ụka ọọwa-á pwụ, Ọngọlahị ka diro ọngọ pwọ inyi bwu oye ọlaanyị nya Ihu nya iYufuretisi. Ọngọọwa ri adịrahụ nya ala Asiriya kọ ka warị ka pwọọnụ ịchwọ bala inyi ilegbeju nyanụ bala egbii ịlịnyịrọ nyanụ.

²¹“Ụka ká ụka ọọwa-á pwụ, ó-ri ụgba nya ẹnụ ookpokpo bala embiri imiiye kem ká ọlẹrụ-ụ́ jụ la myị wẹwẹ,

²²ị ka ju enyi-ẹmẹ lụmẹ gbee ká ayịdang ka ye ang ri nwa ịlọmwụ. Angị ịmanyị-ịmanyị ịlẹ kị ka hi lọhịhị jam dọmwụ ka ye enyi-ẹmẹ nwa bala o-ye inwa nẹ.

²³“Ụka ká ụka ọọwa-á pwụ, ẹrụ ịlẹ ká ọmwụ nya alakọnụ lala ụnọ lẹpwụ-lẹpwụ ji kọ ka kpụ okpoko onyoowuru ụnọ lẹpwụ-lẹpwụ ịnyịnyị ka yẹ ri ejwo-ejwo bala amẹ wuu.

²⁴Angịnyị ka kele ka da urwe ụ-ụwa leda bala ịcha, chajị ụwa wuu ka myị̀ ipyinu lejwo bala agaama kịrịnyọọ.

²⁵Ịgbọdọ ịlẹ ịlẹ ịnọ kị kaa kpa wu ẹrụ ene ka ri ejwo-ejwo. Ọngọngọhẹ-ẹ́ ka myị-ị̀ ka ụwa kaka. Ịna bala ịmwụ kem à ka kele kaka rị amẹ ụ-ụwa lẹlẹ.”