Read idege AYỊSAYA 8 Bible Online

AYỊSAYA 8 - idege bible

AYỊSAYA 8

¹Ụka ọkịla, Amkpaa ya ẹla tam yẹkẹẹ, “Hu uginikpo ọtụka ọhẹ ká da gede-gede bọọ yẹkẹẹ, ‘Nu lagaga, wụwụ lagaga’.

²M̀ ka byi Uraya ọngọkiliya bala ịSẹkaraya ọnyị iJeberekaya kị ri angị kpẹẹkpẹẹ kị ka wẹ kaka ri ibeenu nya ẹlẹwẹ lẹ.”

³Ụka nọ nọ chẹẹ lẹ, ahụ nyam à ma ọnyị ọlẹng lẹ, Amkpaa-à byim yẹkẹẹ, “Ẹnyị nya ọnyị nyang ọlẹ ka ri ‘Nu lagaga, wụwụ lagaga’.

⁴Ene ká ọwẹ ka nwa kpụ kọ ka jẹ-ẹ̀ ya ‘Ịnam lee Adam’ kpá, adịrahụ nya ala Asiriya ka wẹ kaka mwẹla ta epweji nya ịDamasịkọsị bala ịSameriya, kọ ka gọ ang-ụdụ ịlụwa wuu kpa rụ.”

⁵Amkpaa ya ẹla tam myịmyị yẹkẹẹ,

⁶“Ajị nyọlẹ ká angịlẹ pwa enyi ọ-mwụ dụmwọ-dụmwọ ọlọba nya iChilowa, kị dachichi juwa chị ọkẹkẹnị ju IResin Adịrahụ bala iPeka Adịrahụ wẹẹ,

⁷am Ọngọlahị juwa ka kpa adịrahụ ọtụka nya ala Asiriya jahị daa lẹ. Ị ka wẹ tutuutu lala ọhụụ nya enyi o-bu Ihu iYufuretisi, ọlẹ kọọ myị̀ chị ụpwụ chị ụmẹ kpoye nya ọnụụka nyamwụ wuu.

⁸Ị ka wẹ kaka pyẹ yịrị iJuda yịrị, myị̀ ẹga myị ẹga pwẹẹpwẹẹ lala enyi.” Ohe Oluhye jam tahị! Ọ ka pyẹ achwọ nyamwụ kpa chẹwụ ke ọpyị ọlẹ.

⁹Anụ alẹpwụma datị-datị ee, anụ nwụlanọ nya ẹwụ mẹ, ánụ tịị chị uko nya ịlọnụ. Anụ alọpyị ịlụrụ, anụ wo mẹ, anụ ju agidi nya ẹwụ mẹ, ánụ tịị chị uko nya ịlọnụ.

¹⁰Anụ kpa ijẹẹhị nya ẹwụ ọnyị myị ọnyị kpehe mẹ, ọ́ tị ka họ ụkụrwọ ka. Anụ tụguru ya ẹla-obyi jaabwọ myị abwọ kọ haanụ mẹ, ọ tị ka ri ịtakpi, Ohe Oluhye jam tahị.

¹¹Amkpaa dam ọna lọngịrị-ọngịrị, byim am nyị ba ụgbẹyị ọlẹ ká angịkịla nyị wẹẹ dịrẹ jẹ koo. Ọ yẹkẹẹ,

¹²“Ā hu ọ-kọ ju awụlẹ nya angịnyị lala ịngịngịhyẹ kọọ, ā tị ju uhi nya ang ịlẹ kịịwa wẹẹ ju uhi ka.

¹³Am Amkpaa Agụgụ ri Ohe Oluhye Ọlịgọgọ, am ā ka ju uhi lẹ, ā ju uhi nya ịngịngịhyẹ ọkịla kaka.

¹⁴M̀ ka ri ẹga kanụ ka ye ẹwụ ọ-chịke, ẹ-ẹga nya ala Isirẹlụ bala iJuda lẹ, m̀ ka lala ẹjwọ ọlẹ ká angịnyị ka chị ụchụụ bala ẹjwọ ọlẹ kọ ka chị angịnyị keji. Ẹ-ẹga nya ala iJerusalẹm lẹ, m̀ ka lala ụnya ọlẹ kọ ka wu angịnyị.

¹⁵Angịnyị lụmẹ-lụmẹ ka chị ụchụụ, ị ka mileji, dabwọ pwụrẹ-pwụrẹ. Ụnya ka waa bẹẹ.”

¹⁶Anụ angịjụgbẹyị nyam ee, anụ kpahị ju ehile bala ọmẹjẹ i-bwu ẹga nya Ohe Oluhye, kanụ kpa ya je angịkịla.

¹⁷Amkpaa nyẹẹkpẹ da ala Isirẹlụ angịnyị nyamwụ kpá odu ịnyị, m̀ ka dahịhiloo, ya ẹhị nyam rịrị ka ẹga nyamwụ.

¹⁸Am bala anyị ịlẹ ká Amkpaa ya ham jam lala ang-ẹjẹẹ ịlẹ ká Amkpaa Agụgụ ọlẹ kọ kụ Ọgbọdọ nya ịSayọn hu mẹjẹ ala Isirẹlụ.

¹⁹Angịnyị ka ya anụ nyị ka ẹga nya alegino bala alọmwụ ịlẹ kịị chayị bala o-ya ẹla ju ịlaa nwini-nwini mẹ. Angị ịhịhị ka jẹ-ẹ̀ jẹ ẹlẹlẹhẹ bwu ẹga nya egu-ūú?

²⁰Anụ-ụ̀ chụ ẹla nyaa kaka pwoku ehile bala ọmẹjẹ nyam am Amkpaa mẹ. Ịnyaa-á datị hi ịnyam aalẹ, ẹla nya ịlẹhị-ị́ juwa ẹ-ẹpwụ nyaa ka[3].

²¹Angịnyị nyam ka ga tụ ẹgẹgẹẹga da lọkịlẹtụ ọ-kpụ enyi bala imyị ọlẹpwụ. Imyi ọnwụnwụ bala agbama ọlẹpwụ nyaa du kị ka gọlọ ju adịrahụ nyaa bala Ohe Oluhye nyaa. Ị ka yọyị ka uhye,

²²yọyị weji, ị́ tị ka yẹ ịngịngịhyẹ dala akama bala ọjụjụ bala ukpowu okpemkpem kaka. Ị ka kwaa rụ kaka ju ẹpwụ nya ukpowu ọọwa.