Read idege AYỊSAYA 9 Bible Online

AYỊSAYA 9 - idege bible

AYỊSAYA 9

¹Ọ lịnyị la kpá nyaa lẹ, angị ji ẹpwụ nya akama-á ka juwa ẹ-ẹpwụ nya ọjụjụ pyịyọọ ka. Ene-ene lẹ, ị chị oyoyi ju alimwawụ nya iSebulọn bala alimwawụ nya ịNafụtali. Ị-ịlahị tị lẹ, aloye ọwẹ bwu Ihu nya iMeditareniya yahị da ka ọpyị ọlọmwẹnụ-ụtụrụ o-oye ọkịla nya Ihu ịJọdan lalaala kaka ju ka ịGalili ọlẹ ká alụma ịkịla kụ wuu ka la ihi-ihi ọtụka-ọtụka.

²Angịlẹ kị jẹdịyẹ ẹ-ẹpwụ nya ukpowu ene-ene, yẹ ahịgboo ọtụka lẹ. Ị kụ ẹ-ẹpwụ nya arụrụ nya igu ene-ene, ahịgboo tị juwa hụ́ haa lẹẹlẹẹ lẹ.

³Amkpaa ee, à họ angịnyị nyang lụmẹ gụ olene lẹ, à ya ọkẹkẹnị ọtụka-ọtụka haa lẹ. Ị chị ọkẹkẹnị ju ọhọhọ nyang jaabwọ ká angịnyị kaa chị ọkẹkẹnị lụka nya ang-ẹrụ ọwụwụ, lee jaabwọ ká angịdẹwụ kaa chị ọkẹkẹnị ụka kị ka ya ang-ẹwụ gịla awụlẹ.

⁴À bịrị ogbilo ọlẹ kọ ri olo ha angịnyị nyang lẹ, tụ ugboji ọlẹ kịị kpa waa abẹkpẹ. À kụrụ ẹpwụma ịlẹ kị kaa ba angịnyị nyang ẹtẹ, jaabwọ ká kụrụ ala iMidiyan ha angịnyị nyang ugbeene.

⁵Ụka ọọwa, egbatẹ nya alẹwụ i-jahị da angịnyị nyang, tụ ịwụrụ nyaa ịlẹ kị rị ịwọ biri-biri ka ri ang ịlẹ kị ka go ju ka ẹpwụ nya ila, ká ila ka rwaa wuu.

⁶Ị ma ọnyị hahị lẹ! Ị ya ọnyị ọlẹng hahị lẹ! Ọwa-à ka ri olegbeju nya ọpyị lẹ. Ị ka wụrụ ẹnyị nyamwụ Ọngọ ju angịnyị ọhụ Ọlẹbyẹbyị, Ohe Oluhye Ọtụka Adịda o-gbe oyi myị oyi Adịrahụ nya Okpunyi.

⁷Ọngịrị nya ọpyị ọkpakpa nyamwụ ka nwà kịlahị-ịlahị pyịyọọ, okpunyi ka ji ọpyị nyamwụ pyịyọọ. Ọ ka hụ ẹ-ẹchị nya iDevidi Adịrahụ kwiwa nyamwụ juwa kpa ọpyị ẹ-ẹpwụ nya ẹla ọ-họ kpakpa bala abwẹla ọnyịịla bwu ọlẹẹlẹẹ gbe oyi myị oyi. Amkpaa chị eje lọkịlẹtụ nyamwụ wuu nyọka họ ká ala ịwẹ ka họ jịra.

⁸Ọngọlahị ya ẹla tụ ala Isirẹlụ pyịpyị, ịwa anyị ịtụma nya iJekọbụ.

⁹Ala Isirẹlụ wuu ịlẹ kị kụ ịSameriya ka jẹ ẹla ọọwa. Ịwa-à tị lẹẹ hi ọbọọchẹ bala ọ-chị ọgọm lẹẹ yẹkẹẹ,

¹⁰“Ị tụrụ ebe nyahị ịlẹ kị me la ịbịlọọkụ kpá odu ịnyị, ahị ka me ebe ịkịla lajwọ-ajwọ. Ị tụrụ ekeji nya isikamọ nyahị kpá odu ịnyị, ahị ka ya ekeji isida ịlahịchịng gụgụ wuu ku ọmwakpa nyaa.”

¹¹Amkpaa du aluji nyaa kuukuu yahị daa, aluji nya iResin Adịrahụ wẹẹ yahị daa.

¹²Ala iSiriya ọ-ọmwẹnụ-ụtụrụ bwu oye ọhẹ, ala iFilisitiya ọ-ọmwẹnụ-obyi bwu oye ọkịla, ịwa wuu ji ikopya nyaa da gbe ọ-ka be ala Isirẹlụ ri. Ọwẹ-ẹ́ tị ri ocheju nya agbama nya Amkpaa lẹka, ọ hu ụbwọ nyamwụ hwaa yahị daa wẹẹ.

¹³Akama ịwẹ ká Amkpaa Agụgụ yaa wuu, ala Isirẹlụ-ụ́ yẹ irya da nyà tịrẹkpẹ wẹ ẹga nyamwụ lẹka.

¹⁴Lẹẹlẹ, Amkpaa juwa ka chị ala Isirẹlụ ọbẹnẹ tụ alegbeju nyaa wuu ẹnụ alẹ-alẹ. Ọ ka ma abwọ bala egbile nyaa wuu.

¹⁵Alegbeju bala ịbagọ anyị à ri angị kụ ịlahị lẹ, alọmwụ ịlẹ kị wẹẹ mẹ ịnịịkịla jẹ angịnyị à ri alẹkpẹ nyaa lẹ.

¹⁶Angị kpaa kụ ịlahị kpaa kaka hwahị, ị wu ichinji, jẹ ọlẹ kị ji datị kaka.

¹⁷Ịnyị à du ká ẹla nya ikolobya-á kpụ Ọngọlahị ịpyọ ka lẹ, ọ́ dọmwụ ka jujwo nya anyị-egu bala ihụ-egu ka, chajị angịnyị wuu ri alọkwọ i-ju Ohe Oluhye ihi ka, bala ọ-kaa ya ẹla onyobyi ụka wuu. Ọwẹ-ẹ́ tị ri ocheju nya agbama nya Amkpaa lẹka, ọ hu ụbwọ nyamwụ hwaa yahị daa wẹẹ.

¹⁸Anụ tị́ jẹ lẹ, ang onyobyi kaa pyẹ lala ila, ọọ rụ ang lala ila-à rụ amẹ bala ejwo, ọọ rụ ipyinu ịnyịnyị lịmwụ ọtụka-ọtụka kpúnaaa.

¹⁹Amkpaa Agụgụ rụ ọpyị ila lagbama ọtụka nyamwụ, ta angịnyị ayịreji lala ịwụ ịlẹ kị kaa ya ju ila, ị chị awụlẹ ọbẹnẹ la o-jujwo nya awụlẹ ka.

²⁰Angịnyị nu awụlẹ ang ri, jẹkpẹ da, jahị da ẹga myị ẹga kị yẹ ang oriri, imyi tị kịnyaa juwa nwaa kpọkpọọkpọ. Ọ kpuu ị go anyị nya ịlaa nwụ ri!

²¹Ala ịManasẹ bala ala Ifurem gba mịla awụlẹ, ị jahị kpata kaka bábá ju ala iJuda. Ọwẹ-ẹ́ tị ri ocheju nya agbama nya Amkpaa lẹka, ọ hu ụbwọ nyamwụ hwaa yahị daa wẹẹ.