Read idege ALA ILIVAYỊ 1 Bible Online

ALA ILIVAYỊ 1 - idege bible

ALA ILIVAYỊ 1

¹Ụka ọhẹ, Amkpaa be ẹkọ wụrụ iMosisi bwu Ọdụ nya Amkpaa lẹ, ọ byoo yẹkẹẹ,

²“Ya ehile ịlẹ je ala Isirẹlụ, ká byaa yẹkẹẹ, ‘Ụka ká ọngọhẹ nyanụ-ụ́ ka ya iyo oleji kịla iya ha Amkpaa, ẹna lee ẹmwụ nyamwụ ọhẹ ọ ka kpa lẹ.

³“ ‘Ó-ri ẹna kọ ka ya kịla iya ọ-rụ ila aalẹ, ẹna ọlẹng ọlẹ ká ehe-é họ ka ọ ka kpa lẹ. Ọ ka ya ẹna ọọwa ha ọ-ọnang nya Ọdụ nya Amkpaa chajị ká Amkpaa ka ye iya nyamwụ.

⁴Ọngọọwa ka yụbwọ ba ẹna ọọwa e-egbeju. Ọọwa, Amkpaa-à ka ye ku ọmwakpa nya ọlẹng ọwẹ nya ang okiliya ọ-hụ́ ịhọbịrị nyamwụ lẹlẹ.

⁵Ọọwa lẹ, kọ nwụ ẹna ọwẹ i-ijata nya Amkpaa mẹ. Angịkiliya anyị nya Erọn ka hu ịwọ nyamwụ ha Amkpaa bwula ọ-yọọ hụ ịkịka inine nya ogidi ọlọnang nya Ọdụ nya Amkpaa.

⁶Ọ ka da iyo ọwẹ ugba bala ọ-wọọ guru ẹ̀gẹgẹẹga.

⁷Anyị nya Ẹrọn ka ya ịwụ guru memeeme ogidi okiliya kị ka ya ila jwoo.

⁸Ọọwa lẹ, kị go egbeju bala eyo tụ ẹ̀ga ịkịla nyamwụ guru u-uhye nya ila ologidi mẹ.

⁹Ọ tị ka hụ́ ang-ẹpwụ bala ata nya iyo ọwẹ lenyi. Ọọwa, ọngọkiliya-à ka jụ iya ọwẹ lẹpwụ-lẹpwụ ila u-uhye nya ogidi lẹlẹ. Ọwẹ à ri iya ọ-rụ ila lẹ. Iya ọwẹ kaa chị Amkpaa oru kwọkwọ.

¹⁰“ ‘Ọ́ tị ri ẹmwụ embiri lee ọkpịlọ kọ ka ya kịla iya ọ-rụ ila aalẹ, ẹmwụ ọlẹng ọlẹ ká ehe-é họ ka ọ ka hu ha lẹ.

¹¹Ọ ka nwụ ẹmwụ ọọwa o-oye ọlẹtẹ nya ogidi okiliya ị-ịlahị nya Amkpaa. Angịkiliya ka ya ịwọ nyamwụ yẹ hụ ịkịka inine nya ogidi.

¹²Ọlẹng ọọwa-á wọ ẹmwụ ọwẹ kpá, ọngọkiliya ka go egbeju bala eyo tụ ẹ̀ga nyamwụ ịkịla guru u-uhye nya ila ologidi.

¹³Ọngọọwa ka hụ́ ang-ẹpwụ bala ata nyamwụ lenyi. Ọngọkiliya-à ka hwaa ha Amkpaa bwula ọ-jwaa ila wuu u-uhye nya ogidi lẹlẹ. Ọwẹ à ri iya ọ-rụ ila lẹ. Iya ọwẹ kaa chị Amkpaa oru kwọkwọ.

¹⁴“ ‘Ọ́ tị ri ọchịnụ ká ọngọọwa-á wẹẹ ka kpa kaka kịla iya ọ-rụ ila ha Amkpaa aalẹ, enewulo lee ẹchụ́ nya okiripete ọ ka kpa lẹ.

¹⁵Ọngọkiliya ka pyọọ imyi dachị, gbọọ egbeju pyaarịị lẹ, ọ ka jụ egbeju nyamwụ ila u-uhye nya ogidi lẹlẹ. Ọ ka pá ịwọ nya ọchịnụ ọwẹ hụ ịkịka nya ogidi.

¹⁶Ọọwa lẹ, kọ gbọọ unugbo la ang ịlẹpwụ nya unugbo[1] kọ ya da ka ịkịka ọlọmwẹnụ-ụtụrụ nya ogidi, ẹga kịị go agbụ guru mẹ.

¹⁷Ọ ka boo ụchwọ, la ọ-hụlọọ hi awụlẹ ka. Ọọwa, ọ ka chọọ ila wuu lẹpwụ-lẹpwụ u-uhye nya ogidi lẹlẹ. Ọwẹ à ri iya ọ-rụ ila lẹ. Iya ọwẹ kaa chị Amkpaa oru kwọkwọ.