Read idege ALA ILIVAYỊ 10 Bible Online

ALA ILIVAYỊ 10 - idege bible

ALA ILIVAYỊ 10

¹Ụka ọọwa, ịNadabụ bala Abihu, anyị alẹng nya Erọn go ịja nya ịtangare nyaa. Ị chụ awụrụ-ila juwa bala ọ-chụ ịtangare gurwaa lẹ, ị kpa kaka ha Amkpaa lẹlẹ. Ila nya ịtangare ọwẹ-ẹ́ tị la ịgọgọ ka chajị Amkpaa-á byaa nyị kpa wẹ ọwa ka.

²Lụka ọmwaaa lẹ, Amkpaa-à du ila kaka rwaa lẹ, ị gbu ụ-ụwa ị-ịlahị nyamwụ lẹlẹ.

³Ọọwa, iMosis à byi Erọn yẹkẹẹ, “Amkpaa lẹẹ ya ẹla rụ́ ẹla ọlịịwẹ ụka kọ yẹkẹẹ: Angị myị ẹrụ ham wuu ka chihi ju ịgọgọ ọlala nyam, I-ịlahị nya angịnyị wuu ị ka ya ụmụmẹ nyam pyẹ.” Erọn-ń tị ya ẹla bwu ọnụ myị ka.

⁴Ọọwa, iMosisi à wụrụ iMichẹlụ bala Elisafan anyị nya ọnyịnịna nya adịda nya Erọn lẹ, ọ byaa yẹkẹẹ, “Anụ kẹwẹ wẹẹ̀, kanụ go egu nya aananụ ịlẹ bwu ẹga nya Ọdụ Ọlịgọgọ kpa kpehe hi ẹpwụ nya ịkampụ mẹ.”

⁵Ịnyị, ị wẹ lẹ, ị ya abwọ chị ịwụrụ nya egu ịwẹ kpa kpaa kpehe hi ịkampụ jaabwọ ká iMosisi byaa lẹlẹ.

⁶Ọọwa, iMosisi à byi Erọn ayịdang bala Eliyesa bala Itamaa anyị ịkịla nya Erọn yẹkẹẹ, “Ānụ pẹhi inyi nyanụ dachị-dachị lee o-gu ịwụrụ nyanụ ene nya ang-ẹjẹẹ nya owuru ọkpakpa koo. Ó-ri kanụ họ ịnyị, anụ ka gbu, Amkpaa ka wụ ẹjẹ ta alụma wuu lẹpwụ-lẹpwụ. Ala Isirẹlụ aananụ kem à ka bida chajị nya angịlẹ ká Amkpaa du ila kaka rụ lẹẹ lẹlẹ.

⁷Ānụ rụ hi ọnang nya Ọdụ Ọlịgọgọ kọọ, ó-ri ịnyị ka, anụ ka gbu chajị ị chịnụ ịgọgọ bwula ida ọlịgọgọ nya Amkpaa ọlẹ kị ya hụnụ.” Ọọwa, ị họ jaabwọ ká iMosisi byaa lẹlẹ.

⁸Amkpaa byi Erọn yẹkẹẹ,

⁹“Ahụ bala anyị nyang ā nwa ere ọ-ya ọngịnyị lee ere ọnyọọngịrị ọhẹ-lọhẹ ene kanụ ka jụ ka Ọdụ Ọlịgọgọ koo. Ó-ri kanụ họ ịnyị, anụ ka gbu. Ọwẹ ri ẹhile ọlẹ ká anyị ịtụma nyang ka kpa pyịyọọ.

¹⁰Anụ ka jẹ ang ọ-chị ịgọ ju ham datị hi ang ọ-da gbagbịla bala ọ-jẹ ang ọcharị-charị hi ang-ibyi.

¹¹Anụ ka mẹjẹ ala Isirẹlụ ehile ịlẹ wuu kam ya du iMosisi kịlaa.”

¹²Ọọwa, iMosisi à byi Erọn bala anyị imiiye ihihi nyamwụ ịlẹ ká ẹnyị nyaa ri Eliyesa bala Itamaa yẹkẹẹ, “Anụ hu ọrụ nya ajẹ nya ang-ẹrụ ohihi ọlẹ kị ya kịla iya ha Amkpaa mẹ. Ánụ ya họ ịkaa ọmịrịị mịrị-ka kpá lẹ, anụ ya ri ụ-ụwa ịkịka nya ogidi mẹ, chajị iya ọwẹ la ịgọgọ lụmẹ.

¹³Ẹ-ẹga ọlịgọgọ ọhẹ ānụ ka hụ ryoo lẹ. Ọwẹ ri ebwo ọlẹ kọ ri ịnyang bala anyị alẹng nyang bwu ẹpwụ nya iya ịlẹ kị kịla ha Amkpaa. Jaabwọ ká Amkpaa dam ehile à wẹ lẹ.

¹⁴Ahụ bala anyị alẹng tụ anyị anyang nyang ka ya ẹmẹ bala ugbẹta ịlẹ kị ya kịla iya o-nyí kile-kile ha Amkpaa wẹ ri ẹ-ẹga ọcharị-charị. Ebwọ ịwẹ ri ịlẹ kị gà hang bala anyị nyang bwu ẹpwụ nya iya nya ọhọlawụlẹ ịlẹ ká ala Isirẹlụ kpa wẹ Amkpaa.

¹⁵Ị ka kpa ugbẹta bala ẹmẹ ịwẹ warị ba ẹ̀ga i-ju eyo ịlẹ kị ya kịla iya ju ila-à wẹ warị wẹ Amkpaa. Ẹ̀ga ịwẹ à ka ri nyang bala anyị nyang pyịyọọ jaabwọ ká Amkpaa ya lẹlẹ.”

¹⁶Ụka ọọwa, iMosisi tịtọ nya ẹmwụ nya iya ọ-hụ́ ọhọbịrị lẹ, ọ yẹ kị jwọọ ila ene-ene lẹlẹ. Ẹlẹwẹ wụ iMosisi ẹjẹ ta Eliyesa bala Itamaa. Ọọwa, ọ taa wo yẹkẹẹ,

¹⁷“Ịyẹ tị́ du kanụ ri ang okiliya ọ-hụ́ ọhọbịrị ẹ-ẹga ọlịgọgọ ka? Ọ la ịgọgọ lụmẹ, Amkpaa tị ya ọwẹ hanụ chajị nyọka hụ́ ịhọbịrị nya alụma hụrụ.

¹⁸Ọọ-lajị nyọlẹ kị kpa ịwọ nya ẹmwụ okiliya ọwẹ wẹ ẹpwụ nya Ọdụ Ọlịgọgọ ka lẹ, ịnọ anụ ka ya iyo nyamwụ ri ụ-ụwa jaabwọ kam danụ ehile.”

¹⁹Erọn tị wẹ byi iMosisi yẹkẹẹ, “Yẹ wẹẹ, alẹ oleeri ọlẹ ị kịla iya ọ-hụ́ ọhọbịrị bala iya ọ-rụ ila nyaa lẹ, ẹbyị ọlịịlẹ tị họm. Ó-ri kam dọmwụ ri iyo nya iya ọ-hụ́ ọhọbịrị ọlẹ, ọọwa ka kpụ Amkpaa ịpyọ abwọhẹ-ẹ́?”

²⁰Ụka ká iMosisi wo ọwẹwẹ nya Erọn lẹ, ọ woo ẹpwụ.